ເກືອບ 60 ບ້ານຖືກໂຄງການສ້າງເຂື່ອນໄຟຟ້ານໍ້າອູ 4 ແຫ່ງ ທີ່ແຂວງຜົ້ງສາລີ

  ທີ່ແຂວງຜົ້ງສາລີໄດ້ມີການສ້າງເຂື່ອນໄຟຟ້າໃສ່ສາຍນໍ້າອູທັງໝົດ 4 ແຫ່ງ ຄື: ເຂື່ອນນໍ້າອູ 4, 5, 6 ແລະເຂື່ອນນໍ້າອູ 7 ຢ່າງໃດກໍຕາມການພັດທະນາຍ່ອມປາສະ ຈາກບໍ່ໄດ້ຜົນກະທົບຕໍ່ສັງຄົມກໍຄືຊຸມຊົນໃກ້ຄຽງໂດຍໃນເຂື່ອນ 4 ແຫ່ງດັ່ງກ່າວມີປະຊາຊົນເກືອບ 60 ບ້ານໄດ້ຮັບຜົນກະທົບໃນທາງກົງ ແລະທາງອ້ອມຂະນະທີ່ວຽກຍົກຍ້າຍຈັດສັນ ແລະຟື້ນຟູຊີວິດການເປັນຢູ່ຂອງຜູ້ຖືກໂຄງການມີຄວາມຄືບໜ້າຕາມລຳດັບ.

  ວັນທີ 17 ກໍລະກົດຜ່ານມາທີ່ແຂວງຜົ້ງສາລີ ຄະນະກຳມະການຍົກຍ້າຍຈັດສັນ ແລະຟື້ນຟູຊີວິດການເປັນຢູ່ຂອງປະຊາຊົນທີ່ໄດ້ຮັບຜົນກະທົບຈາກໂຄງການເຂ່ືອນໄຟ້ຟ້ານໍ້າອູ 4, 5, 6 ແລະ 7 ແຂວງຜົ້ງສາລີ ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດວຽກງານ 6 ເດືອນຕົ້ນປີ ແລະວາງແຜນການ 6 ເດືອນທ້າຍປີ 2019 ຂຶ້ນຢ່າງເປັນທາງການພາຍໃຕ້ການເປັນປະທານຂອງທ່ານ ຄຳຜອຍ ວັນນະສານ ຮອງເຈົ້າແຂວງຜົ້ງສາລີ, ຮອງປະທານຄະນະກຳມະການຍົກຍ້າຍຈັດສັນ ແລະຟື້ນຟູຊີວິດການເປັນຢູ່ຂອງປະຊາຊົນທີ່ໄດ້ຮັບຜົນກະທົບຈາກໂຄງການເຂື່ອນໄຟ້ຟ້ານໍ້າອູຈຳນວນ 4 ແຫ່ງ ດັ່ງກ່າວ ແລະ ເຂົ້າຮ່ວມກອງປະຊຸມມີບັນດາທ່ານຄະນະກຳມະການທີ່ມາ ຈາກພະແນກການ, ອົງການຕ່າງໆ ແລະ ເມືອງ ຜົ້ງສາລີ, ໃໝ່, ຂວາ, ສຳພັນແລະເມືອງຍອດອູ.

   ກອງປະຊຸມໄດ້ມີການເປີດເຜີຍໃຫ້ຊາບວ່າ: ເຂື່ອນໄຟຟ້ານໍ້າອູ 5 ແລະ 6 ແມ່ນມີບ້ານທີ່ຖືກຜົນກະທົບທາງກົງ ແລະ ທາງອ້ອມທັງໝົດ 17 ບ້ານ ຮອດປະຈຸບັນສຳ ເລັດການຍົກຍ້າຍປະຊາຊົນໄປຢູ່ບ້ານຈັດສັນໃໝ່ ແລະ ຈັດສັນທີ່ດິນແລ້ວ 100%, ກໍ່ສ້າງເສັ້ນທາງເຂົ້າເຂດການຜະລິດ, ຈັດສັນອາຊີບຄົງທີ່ໃຫ້ປະຊາຊົນໂດຍການສ້າງກຸ່ມການຜະລິດປູກຝັງ, ລ້ຽງສັດຕາມທ່າແຮງຂອງແຕ່ລະບ້ານຊຶ່ງມີຄອບຄົວທີ່ຖືກຜົນກະທົບພົ້ນທຸກແລ້ວ 132 ຄອບຄົວ.

  ສຳລັບເຂື່ອນໄຟຟ້ານໍ້າອູ 4 ແລະ 7 ມີຜູ້ຖືກກະທົບທາງກົງ ແລະທາງອ້ອມກວມໃນ 5 ເມືອງ 40 ບ້ານ 1.421 ຄອບຄົວ ປະຈຸບັນສຳເລັດການຕັ້ງເຮືອນໃໝ່ໃຫ້ປະຊາຊົນຢູ່ບ້ານຈັດສັນໃໝ່ແລ້ວ 7 ບ້ານ 164 ຫຼັງ, ຕິດຕັ້ງໄຟຟ້າຕາຂ່າຍ 22 ກິໂລໂວນ 6 ບ້ານ, ສຳເລັດການກໍ່ສ້າງນໍ້າລິນ-ນໍ້າສະອາດໃຫ້ທຸກບ້ານທຸກຄອບຄົວ, ສຳເລັດການກໍ່ສ້າງສຸກສາລາ 1 ແຫ່ງ, ກໍ່ສ້າງເສັ້ນທາງເຂົ້າບ້ານ 7 ບ້ານ, ກໍ່ສ້າງຫ້ອງການບ້ານ 7 ຫຼັງ, ກໍ່ສ້າງຕະຫຼາດ 1 ຫຼັງ, ກໍ່ສ້າງໂຮງຮຽນປະຖົມ 6 ຫຼັງ, ສຳ ເລັດການກຳນົດ ເຂດຜະລິດໃນເບື້ອງຕົ້ນຂອງ 3 ບ້ານ, ສຳເລັດການສຳຫຼວດເສັ້ນທາງເຂົ້າເຂດການຜະລິດຂອງ 2 ບ້ານ.

-------------------------

ຂຽນໂດຍ: ສົມຄິດ ແກ້ວນວນລາ 

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ     

แชร์