ຖໍ້າເຫີບ ອີກທີ່ທ່ອງທ່ຽວງົດງາມ ແລະໜ້າອັດສະຈັນ

  ເມືອງຫີນບູນເປັນອີກເມືອງໜຶ່ງທີ່ມີຄວາມຫຼາກຫຼາຍທາງວັດທະນະທຳ,ມີສະຖານທີ່ທ່ອງທ່ຽວຫຼາຍແຫ່ງທີ່ໜ້າສົນໃຈໂດຍສະເພາະແມ່ນສະຖານທີ່ທ່ອງທ່ຽວ ທາງທໍາມະຊາດ, ປະຫວັດສາດ ແລະວັດທະນະທຳເປັນຕົ້ນແມ່ນຖໍ້າເຫີບ.ຖໍ້າເຫີບຕັ້ງຢູ່ບ້ານນາກະ ຕຶບເມືອງຫີນບູນແຂວງຄຳມ່ວນເປັນຖໍ້າອີກແຫ່ງໜຶ່ງທີ່ມີຄວາມງົດງາມໜ້າອັດສະຈັນໂດຍຖໍ້າແຫ່ງນີ້ ອາດຈະມີໜ້ອຍຄົນທີ່ຈະຮູ້ຈັກເພາະວ່າມັນເປັນຖໍ້າທີ່ຕັ້ງຢູ່ໃນເຂດປ່າດົງທີ່ຕຶບໜາ.ສ່ວນທາງເຂົ້າແມ່ນມາຕາມທາງໄປເຂື່ອນໄຟຟ້າຫີນບູນໄລຍະທາງຈາກທາງເລກທີ 13 ເຂົ້າໄປປະມານ 16 ກິໂລແມັດຜ່ານບ້ານກະແຕັບເຂົ້າໄປຮອດທ່ານໍ້າບ້ານກະຕຶບການທີ່ຈະເດີນທາງເຂົ້າໄປໃນສະຖານທີ່ແຫ່ງນີ້ ແມ່ນຕ້ອງໄດ້ອາໄສການຂີ່ເຮືອຂ້າມນໍ້າໂດຍໃຊ້ບໍລິການຈາກຊາວບ້ານ.

ຕາມການບອກເລົ່າຂອງຊາວບ້ານຖໍ້າເຫີບມີປະຫວັດອັນຍາວ ນານທັງໃນເລື່ອງຂອງສົງຄາມ,ຕຳນານພື້ນສືບແລະປະຫວັດສາດອັນເກົ່າແກ່ປະສົມປະສານກັນເຊັ່ນ:ນິທານສັງສິນໄຊ,ການສ້າງເມືອງເຊື່ອງໄພຈອງເຈົ້າໄຊຍະເສດຖາ,ເມືອງຫຼັບແລຂອງຊາວມອນ-ຂະແມ,ເມືອງເຊື່ອງໄພຂອງເຈົ້າອານຸວົງ ແລະລວມເຖິງສົງຄາມຍີ່ ປຸ່ນ-ຝຣັ່ງໃນລາວ.ຊຶ່ງມີຊາວລີ້ໄພໄດ້ໜີມາເຂົ້າຖໍ້າແລ້ວຍີ່ປຸ່ນນຳມາແລ້ວຄິດວ່າກະບົດຄົງຈະຢູ່ໃນຖໍ້າ ແລະບໍ່ມີທາງອອກເລີຍພາກັນເອົາກ້ອນຫີນມາຕັນທາງອອກຂອງຖໍ້າໄວ້ແລ້ວເກັບເອົາໝາກເຜັດແຫ້ງມາເຜົາອູດ ໂດຍຫວັງວ່າກະບົດຈະອອກມາຍອມຈຳນົນ ຫຼື ຕາຍຢູ່ໃນຖໍ້າແຕ່ເທວາຖໍ້າແຫ່ງນີ້ກັບມີທາງ ທີ່ສາມາດອອກໄປສູ່ອີກເມືອງໜຶ່ງ ທີ່ຢູ່ທາງຫຼັງກົງກັນຂ້າມຊື່ວ່າເມືອງເກົ່າອາຣັນຍາ(ບ້ານນາກະຕຶບປະຈຸບັນ) ຫຼັງຈາກທີ່ລໍຖ້າດົນກໍ່ບໍ່ມີ ແວວວ່າກະບົດຈະອອກມາຈິ່ງພາ ກັນແຕກໜີກັບ.

ສໍາລັບຄ່າບໍລິການຂ້າມເຮືອ ແມ່ນ 5,000 ກີບ/ຄົນ,ຫຼັງຈາກຂ້າມເຮືອແລ້ວເຮົາຕ້ອງໄດ້ຍ່າງຜ່ານທົ່ງນາຂອງປະຊາຊົນ ແລະຜ່ານປ່າໄຮ່ຂອງຊາວບ້ານໄລຍະທາງປະມານ 3 ກິໂລແມັດກໍຈະເຖິງປາກຖໍ້າເຫີບ (ປະຕູສູ່ເມືອງ ເກົ່າອາຣັນຍາຄີຣີວົງກົດ)ສະນັ້ນທ່ານໃດມີຄວາມສົນໃຈຍາກໄປສໍາພັດທໍາມະຊາດຢູ່ຖໍ້າແຫ່ງນີ້ກໍາສາມາດໄປກັນໄດ້ເລີຍ.

ພາບ ແລະຂາ່ວຈາກ: ໜັງສືພິມເສດຖະກິດ-ສັງຄົມ

แชร์