ສພຂ ຈຳປາສັກ ເປີດກອງປະຊຸມສະໄໝສາມັນເທື່ອທີ 7

  ກອງປະຊຸມສະໄໝສາມັນເທື່ອທີ7 ຂອງສະພາປະຊາຊົນແຂວງຈໍາປາສັກ ຊຸດທີ I ໄດ້ໄຂຂຶ້ນຢ່າງເປັນທາງການທີ່ນະຄອນປາກເຊ ແຂວງຈໍາປາສັກ ໃນວັນທີ17 ກໍລະ ກົດຜ່ານມາ, ໂດຍພາຍໃຕ້ການເປັນປະທານຂອງ ທ່ານ ເມກສະຫວັນ ພົມພິທັກ ປະທານສະພາປະຊາຊົນແຂວງຈໍາປາສັກ, ໃຫ້ກຽດເຂົ້າຮ່ວມຂອງທ່ານ  ບຸນຖອງ ດີວິໄຊ ເຈົ້າແຂວງໆ ຈໍາປາສັກ, ມີບັນດາທ່ານຮອງເຈົ້າແຂວງ, ສະມາຊິກສະພາແຫ່ງຊາດເຂດເລືອກຕັ້ງທີ 15, ສະມາຊິກສະພາປະຊາຊົນແຂວງ ແລະບັນດາແຂກທີ່ຖືກເຊີນເຂົ້າຮ່ວມ.

  ທ່ານ ເມກສະຫວັນ ພົມພິທັກ ໄດ້ກ່າວໄຂກອງປະຊຸມວ່າ: ກອງປະຊຸມຄັ້ງນີ້ຈະໄດ້ສຸມໃສ່ພິຈະລະນາຮັບຮອງຫຼາຍບັນຫາສໍາຄັນຂອງແຂວງຄື: ພິຈະລະນາ ແລະ ຮັບ ຮອງເອົາບົດລາຍງານຂອງອົງການປົກຄອງແຂວງກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບມະມານແຫ່ງລັດ 6 ເດືອນຕົ້ນປີ ແລະທິດ ທາງແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂອງແຂວງ 6 ເດືອນທ້າຍປີ 2019, ການຈັດຕັ້ງປະຕິບັດມາດຕະການຕ່າງໆໃນມະຕິກອງປະຊຸມສະພາປະຊາຊາຊົນແຂວງທີ່ໄດ້ຮັບຮອງໃນໄລຍະຜ່ານມາເປັນຕົ້ນ: ມະຕິວ່າດ້ວຍການຮັບຮອງກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ມະ ຕິກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດມີຄືແນວໃດວ່າມີຂໍ້ສະດວກ ແລະຂໍ້ຫຍຸ້ງຍາກແນວໃດ, ພິຈະລະນາ ແລະຮັບຮອງເອົາບົດລາຍງານຂອງພະແນກກະສີກໍາ ແລະປ່າໄມ້ແຂວງ ກ່ຽວກັບຜົນເສຍຫາຍ, ມາດຕະການແກ້ໄຂກ່ຽວກັບການບຸກລຸກເນື້ອທີ່ປ່າສະຫງວນ, ປ່າປ້ອງກັນ, ປ່າຜະລິດເພື່ອປູກມັນຕົ້ນໃນໄລຍະຜ່ານມາ, ພິຈະລະນາ ແລະຮັບຮອງເອົາບົດລາຍງານຂອງອົງການໄອຍະການປະຊາຊົນແຂວງກ່ຽວກັບການປັບປຸງແບບແຜນ ແລະ ວິທີການໃນການຕິດຕາມກວດກາຂອງອົງ ການໄອຍະການປະຊາຊົນແຂວງຕໍ່ອົງການສືບສວນ-ສອບສວນ ແລະອົງການທີ່ມີສ່ວນພົວພັນໃນການດໍາເນີນຄະດີ.

  ຮັບຟັງການລາຍງານຈາກພະແນກຍຸຕິທໍາແຂວງກ່ຽວກັບວຽກງານໂຄສະນາເຜີຍແຜ່ກົດໝາຍ, ພິຈະລະນາ ແລະ ຮັບຮອງເອົາບົດລາຍງານຂອງຄະນະປະຈໍາສະພາປະຊາຊົນແຂວງຈໍາປາສັກ ກ່ຽວກັບການເຄື່ອນໄຫວວຽກງານ 6 ເດືອນຕົ້ນປີ ແລະທິດທາງວຽກງານຈຸດສຸມ 6 ເດືອນທ້າຍປີ 2019 ຮັບຟັງການລາຍງານຂອງທະນາ ຄານແຫ່ງ ສປປ ລາວ ປະຈໍາພາກໃຕ້ກ່ຽວກັບການຄຸ້ມຄອງອັດຕາເງິນເຟີ້ ແລະນະໂຍບາຍເງິນຕາທີ່ໄດ້ຈັດຕັ້ງປະຕິບັດໃນໄລຍະຜ່ານມາ ແລະ ຮັບຟັງການລາຍງານຂອງພະແນກໂຍທາທິການ ແລະ ຂົນສົ່ງ ກ່ຽວກັບການຄຸ້ມຄອງການນໍາໃຊ້ເງິນກອງທຶນທາງທີ່ກະຊວງໂຍທາທິການ ແລະຂົນສົ່ງໂອນໃຫ້ແຂວງຮັບຜິດຊອບໃນການຄຸ້ມຄອງ ການນໍາໃຊ້ໃນໄລຍະຜ່ານມາ.

---------------------------

ຂຽນໂດຍ: ໂພທິຣາຊ 

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์