ພະຍາດຫ່ຽວເຫຼືອງກ້ວຍລະບາດໜັກ ກິນເນື້ອທີ່ກາຍເຄີ່ງຂອງສວນກ້ວຍໃນລາວເກືອບ 20 ພັນເຮັກຕາ

  ຊາວສວນກ້ວຍໃນລາວກຳລັງປະເຊີນກັບບັນຫາການລະບາດຂອງພະຍາດຫ່ຽວເຫຼືອງກ້ວຍປະຈຸບັນໄດ້ກວດພົບພື້ນທີ່ລະບາດກວມແລ້ວ 58,33% ຈາກເນື້ອທີ່ສວນກ້ວຍທົ່ວປະເທດທັງໝົດ 19,3 ພັນເຮັກຕາ ຢູ່ບັນດາແຂວງພາກເໜືອ ແລະກາງ, ດຽວນີ້ເບື້ອງລັດກຳລັງເຂັ້ມງວດເຝົ້າລະວັງບໍ່ໃຫ້ລະບາດສູ່ພື້ນທີ່ອື່ນ ແລະແນວພັນກ້ວຍພື້ນເມືອງຂະນະທີ່ພະຍາດດັ່ງກ່າວສາມາດຝັງຕົວຢູ່ໃນດິນດົນກວ່າ 30 ປີ.

  ໃນວັນທີ 11-12 ກໍລະກົດ 2019 ທີ່ສໍານັກງານປົກຄອງເມືອງວັງວຽງ ແຂວງວຽງຈັນ, ສູນປ້ອງກັນພືດສາລະຄໍາ ກົມປູກຝັງກະຊວງກະສິກໍາ ແລະປ່າ ໄມ້ໄດ້ຈັດກອງປະຊຸມວິຊາການກ່ຽວກັບ ລາຍງານສະພາບການລະບາດ, ການປ້ອງກັນ ແລະກໍາຈັດພະຍາດຫ່ຽວເຫຼືອງກ້ວຍພາຍໃຕ້ການເປັນປະທານຂອງທ່ານ ສິລິພົນພິທັກ ສູນຫົວໜ້າສູນປ້ອງກັນພືດສາລະຄໍາພ້ອມນີ້ກໍມີຮອງຫົວໜ້າພະແນກກະສິກໍາ ແລະປ່າໄມ້ແຂວງສາລະວັນ,ຫົວໜ້າ ແລະຮອງຂະແໜງປູກຝັງ ຈາກ 12 ແຂວງທົ່ວປະເທດ, ພ້ອມດ້ວຍພະນັກງານວິຊາການທີ່ກ່ຽວຂ້ອງເຂົ້າຮ່ວມ.

  ໃນຜ່ານມາການປູກກ້ວຍຂອງຊາວກະສິກອນໃນຂອບເຂດທົ່ວປະເທດແມ່ນເປັນຂະບວນຟົດຟື້ນໂດຍສະເພາະການປູກກ້ວຍຫອມຈີນຢູ່ແຂວງພາກເໜືອ, ພາກກາງ ແລະພາກໃຕ້ ເພື່ອສົ່ງອອກ ລວມເນື້ອທີ່ປູກ 19.375 ເຮັກຕາ ການ ລົງທຶນ ແລະຂະຫຍາຍພື້ນທີ່ການຜະລິດ ໄດ້ເຮັດໃຫ້ມີການນໍາເຂົ້າໜໍ່ພັນກ້ວຍ ແລະ ດິນທີ່ຕິດມາຈາກໜໍ່ພັນຈາກ ສປ ຈີນ ທີ່ມີການລະບາດຂອງພະຍາດ ຫ່ຽວເຫຼືອງຂອງກ້ວຍ, ພະຍາດຫ່ຽວ ເຫຼືອງກ້ວຍ ຫຼື TR4 ນີ້ແມ່ນມີຜົນກະທົບສູງຕໍ່ການຜະລິດກ້ວຍພື້ນທີ່ໆມີການລະບາດຕົ້ນກ້ວຍຈະຫ່ຽວເຫຼືອງ ແລະຢືນຕົ້ນຕາຍໃນທີ່ສຸດ, ສາມາດອາໄສ ໃນດິນໄດ້ຫຼາຍກວ່າ 30 ປີ ແລະມີພືດ ອາໄສຫຼາຍຊະນິດເຊັ່ນ: ກ້ວຍຫອມ,ກ້ວຍເລັບມືນາງ,ກ້ວຍນໍ້າ,ໄມ້ປະດັບ ແລະຫຍ້າຕ່າງໆການກະຈາຍຂອງເຊື້ອແມ່ນມີຫຼາຍທາງເຊັ່ນ: ໜໍ່ພັນທີ່ນໍາມາປູກ, ດິນ, ນໍ້າ, ອຸປະກອນລວມເຖິງລະ ບົບການຈັດການຟາມ ແລະອື່ນໆ.

  ຈາກຜົນການສໍາຫຼວດຂອງສູນປ້ອງກັນພືດໃນ 12 ແຂວງທີ່ມີການປູກກ້ວຍຫຼາຍທີ່ສຸດໄດ້ພົບເຫັນພະຍາດຫ່ຽວເຫຼືອງກ້ວຍລະບາດໃນຈໍານວນ 7 ແຂວງ ໂດຍໃນປີ 2017 ພົບການລະບາດຢູ່ ແຂວງບໍ່ແກ້ວ ແລະແຂວງຫຼວງນໍ້າທາ, ມາຮອດປີ 2019 ໄດ້ມີການແຜ່ໄປສູ່ ພື້ນທີ່ອື່ນຄື ແຂວງໄຊຍະບູລີ, ຫຼວງພະ ບາງ, ອຸດົມໄຊ, ວຽງຈັນ ເຖິງນະຄອນ ຫຼວງວຽງຈັນ ລວມອັດຕາສ່ວນການລະ ບາດທັງໝົດທຽບໃສ່ຈໍານວນແຂວງທີ່ມີການປູກກ້ວຍທົ່ວປະເທດກວມແລ້ວ 58,33%.

  ແນວໃດກໍດີເພື່ອຫຼຸດຜ່ອນການລະບາດຂອງພະຍາດດັ່ງກ່າວໄປສູ່ແນວພັນກ້ວຍພື້ນເມືອງ ແລະພືດອື່ນໆທັງເລັ່ງໃສ່ການຮັບປະກັນຄວາມໝັ້ນຄົງທາງດ້ານສະບຽງອາຫານ, ຄວາມໝັ້ນຄົງທາງດ້ານຊີວະນາໆພັນພືດ ແລະເພີ່ມການເຝົ້າລະວັງການລະບາດພະຍາດຫ່ຽວເຫຼືອງຂອງກ້ວຍໄປສູ່ເຂດພື້ນທີ່ການຜະລິດອື່ນໆ ຈຶ່ງຈັດກອງປະຊຸມດັ່ງກ່າວນີ້ຂຶ້ນເພື່ອໃຫ້ພະນັກງານປ້ອງກັນພືດຂັ້ນທ້ອງຖິ່ນເຂົ້າໃຈສະພາບການລະບາດ, ສາເຫດການລະບາດ ແລະມາດຕະການປ້ອງກັນຕະຫຼອດຮອດການກໍາຈັດພະຍາດຫຼ່ຽວເຫຼືອງຂອງກ້ວຍ.

  ໃນໂອກາດນີ້ບັນດາຜູ້ເຂົ້າຮ່ວມກອງປະຊຸມຍັງໄດ້ລົງຢ້ຽມຢາມສວນສາທິດການທົດສອບການນໍາໃຊ້ເຊື້ອຊີວະວິທະຍາໃນການປ້ອງການ ແລະກໍາຈັດພະຍາດຫ່ຽວເຫຼືອງຂອງກ້ວຍທີ່ບ້ານວັງໝ້ຽງ, ເມືອງວັງວຽງ, ແຂວງວຽງຈັນ ໂດຍເຊື້ອຊີວະວິທະຍາທີ່ມີການທົດລອງຢູ່ ຫາກໄດ້ຮັບຜົນດີແມ່ນຈະມີປະໂຫຍດຫຼາຍຕໍ່ການປ້ອງກັນ ແລະກໍາຈັດພະຍາດດັ່ງກ່າວໃນອະນາຄົດ.

  ສຳລັບການປູກກ້ວຍໃນລາວປະຈຸບັນລັດຖະບານແມ່ນໄດ້ມີການສົ່ງເສີມກໍຄືອະນຸຍາດການປູກກ້ວຍສະອາດ ຫຼື ປອດສານພິດເທົ່ານັ້ນພ້ອມໄດ້ມີການຫ້າມນຳໃຊ້ສານເຄມີເຂົ້າໃນຂະບວນການຜະລິດ ແລະຫ້າມນໍາເຂົ້າຢາປາບສັດຕູພືດທີ່ເປັນອັນຕະລາຍຮ້າຍແຮງຫຼາຍສີບຊະນິດທັງນີ້ກໍເພື່ອຮັກສາສີ່ງແວດລ້ອມກໍຄືຜືນດິນທີ່ອຸດົມສົມບູນໃນລາວໃຫ້ຄົງໄວ້ເຊັ່ນລູກເຊັ່ນຫຼານ.

--------------------------

ຂຽນໂດຍ:  ນ. ສີອໍາມອນ ໄຊຍະລາດ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์