ພຸດທະສາສະນິກະຊົນ ຮ່ວມໃສ່ບາດ ບຸນເຂົ້າພັນສາ

ບຸນເຂົ້າພັນສາເປັນວັນສຳຄັນທາງພຸດທະສາສະໜາ, ເປັນບຸນປະເພນີໜຶ່ງທີ່ຊາວພຸດທະສາສະນິກະຊົນທັງຫຼາຍເຄີຍປະຕິບັດກັນມາແຕ່ປູ່ຍ່າຕາຍາຍ ແລະໄດ້ສືບທອດກັນມາຕາມຮີດຄອງປະເພນີ.

ວັນບຸນເຂົ້າພັນສາແມ່ນຈັດຂຶ້ນ ໃນມື້ຂຶ້ນ 15 ຄໍ່າ ເດືອນແປດ  ເຖິງມື້ຂຶ້ນ 15 ຄໍ່າເດືອນ 11 (ຖ້າປີໃດມີເດືອນແປດສອງຫົນກໍຈະນັບເດືອນແປດຫຼັງໄປ), ເປັນວັນສໍາ ຄັນທາງພຸດທະສາສະໜາເປັນວັນທີ່ພະເຖຣະຈະອະທິຖານວ່າຈະປະຈຳຢູ່ທີ່ໃດທີ່ໜຶ່ງຕະຫຼອດໄລຍະເວລາ 3 ເດືອນຕາມທີ່ພະທຳວິໄນສັນຍາໄວ້ ໂດຍບໍ່ໄປຄ້າງຄືນບ່ອນອື່ນ ຫຼື ເຄີຍເອີ້ນຕິດປາກກັນ ວ່າຈຳພັນສານັ້ນເອງ.

ສະເພາະບຸນເຂົ້າພັນສາປີ 2019 ນີ້,ແມ່ນກົງກັບວັນທີ 16 ກໍລະ ກົດ,ຊຶ່ງພຸດທະສາສະນິກະຊົນໃນຂອບເຂດທົ່ວປະເທດກໍໄດ້ນໍາເອົາເຄື່ອງປັດໄຈໄຊຍະທານຂອງຕົນ ເປັນຕົ້ນຜ້າອາບນໍ້າຝົນ,ຜ້າໄຕຈິວອນ, ທຽນພັນສາ,ເຄື່ອງສັງຄະ ທານ,ເຂົ້າປາອາຫານ ແລະປັດໄຈອື່ນໆໄປຖວາຍແດ່ພະສົງສາມະເນນຢູ່ແຕ່ລະວັດຕ່າງໆ ຕາມກໍາ ລັງສັດທາດ້ວຍຈິດອັນຜ່ອງໃສເພື່ອລະນຶກເຖິງຄຸນພະລັດຕະນະໄຕກໍຄືຄຸນແກ້ວ 3 ປະການຄື: ຄຸນພະພຸດ,ຄຸນພະທໍາ ແລະຄຸນພະສົງພ້ອມທັງອຸທິດສ່ວນບຸນກຸສົນໄປເຖິງດວງວິນຍານຂອງບັນພະບູ ລຸດ, ຄຸນບິດາ-ມານດາ, ຄູ-ອາ ຈານ,ເຈົ້າກຳນາຍເວນ ແລະ ອື່ນໆທີ່ໄດ້ລ່ວງລັບໄປແລ້ວ.ສ່ວນຕອນແລງຊາວພຸດໄດ້ພານຳດອກໄມ້ທູບທຽນມາຮ່ວມກັນທີ່ສາລາໂຮງທໍາຂອງແຕ່ລະວັດຮັບສີລິ ແລ້ວວຽນທຽນຮອບພະອຸໂບສົດສາມຮອບເພື່ອຟັງທໍາມະເທສະໜາ.

ສໍາລັບຝ່າຍສົງກໍມີເຄື່ອງສັກກາຣະບູຊາມີດອກໄມ້ທູບທຽນໃສ່ຂັນສົມມາຄາຣະວະພະພຸດທະຮູບ.ສ່ວນໃນມື້ແຮມ1 ຄໍ່າເດືອນ ແປດນີ້,ຫຼັງຈາກໄຫວ້ພະສູດມົນ ແລ້ວພະພິກຂຸສົງສາມະເນນກໍຈະມີສົມມາຄາຣະວະພະເຖຣານຸເຖຣະຕາມລຳດັບພັນສາພະສົງອົງຈະຢູ່ ຈຳພັນສາໃນອາວາດນັ້ນໆກໍພາກັນວ່າຄຳເຂົ້າພັນສາຕາມລຳດັບພັນສາໄປເທື່ອລະອົງໆລະສາມເທື່ອຈົນຄົບໝົດທຸກອົງ.

 ພາບ ແລະຂາ່ວຈາກ: ໜັງສືພິມເສດຖະກິດ-ສັງຄົມ

 

แชร์