ນາຍົກລົງຊຸກຍູ້ໂຄງການກໍ່ສ້າງສະຖານີລົດໄຟຫຼວງພະບາງ

 ໃນໂອກາດເຄື່ອນໄຫວຢ້ຽມຢາມ ແລະເຮັດວຽກຢູ່ແຂວງຫຼວງພະບາງວັນທີ 15 ກໍລະກົດ ທ່ານ ທອງລຸນ ສີສຸລິດ ນາຍົກລັດຖະມົນຕີພ້ອມດ້ວຍຄະນະໄດ້ເດີນ ທາງໄປຢ້ຽມຢາມຈຸດກໍ່ສ້າງສະຖານີລົດໄຟຫຼວງພະບາງເຂດບ້ານຜິກນ້ອຍນະຄອນຫຼວງພະບາງຫ່າງຈາກຕົວເມືອງປະມານ 10 ກິໂລແມັດ ຊຶ່ງເປັນສະຖານີໃຫຍ່ອີກແຫ່ງໜຶ່ງຂອງໂຄງການກໍ່ສ້າງເສັ້ນທາງລົດໄຟລາວ-ຈີນ ໃຊ້ເປັນສະຖານີຂົນສົ່ງສີນຄ້າ ແລະຂົນສົ່ງໂດຍສານມີເນື້ອທີ່ 147.72 ເຮັກຕາ, ຈຳນວນຕອນດິນຖືກຜົນກະທົບຈຳນວນ 161 ຕອນ, ໃນນີ້ມີດິນເອກະຊົນ 143 ຕອນ, ເນື້ອທີ່ 135.34 ເຮັກຕາ ແລະດິນ ຂອງລັດ 18 ຕອນ ເນື້ອທີ່ 12.59 ເຮັກ ຕາ, ມູນຄ່າການທົດແທນ 24,6 ຕື້ກີບ, ມາຮອດປະຈຸບັນໄດ້ຮັບງົບປະມານ ແລະ ເບີກຈ່າຍໃຫ້ປະຊາຊົນແລ້ວ 30 ຕອນ, ມູນຄ່າ 1,1 ຕື້ກີບ, ຍັງຄ້າງ 113 ຕອນມູນຄ່າ 23,4 ຕື້ກີບ.

 ສະຖານີລົົດໄຟຫຼວງພະບາງແມ່ນໄລຍະການຮັບເໝົາກໍ່ສ້າງໃນສັນຍາທີ 3 ຊຶ່ງແມ່ນບໍລິສັດນໍ້າທາກໍ່ສ້າງຂົວທາງເປັນຜູ້ຮັບເໝົາກໍ່ສ້າງເລີ່ມລົງມືມາແຕ່ເດືອນມັງກອນ 2019ມາຮອດປະຈຸບັນສຳເລັດໜ້າວຽກພື້ນຖານເຊັ່ນ: ການຖົມດິນ, ສ້າງລະບົບລະບາຍນໍ້າ, ກໍ່ສ້າງຕ້ານເຈື່ອນ ແລະອື່ນໆ.

  ພາຍຫຼັງສຳເລັດການຢ້ຽມຢາມຈຸດກໍ່ສ້າງສະຖານີລົດໄຟຫຼວງພະບາງທ່ານນາຍົກລັດຖະມົນຕີພ້ອມດ້ວຍຄະນະໄດ້ໄປເບິ່ງຈຸດທີ່ຈະກໍ່ສ້າງຂົວຂ້າມນໍ້າຂອງລະ ຫວ່າງເມືອງຈອມເພັດ ຫານະຄອນຫຼວງພະບາງຕາມການສຳຫຼວດເບື້ອງຕົ້ນໂຕຂົວຈະມີຄວາມຍາວ 549 ແມັດ, ປະຈຸບັນພວມຢູ່ໃນຂັ້ນຕອນການສໍາຫຼວດອອກແບບລະອຽດ ແລະສະເໜີຮັບຮອງຢ່າງເປັນທາງການ.

------------------------

ຂຽນໂດຍ: ອາພຸດເດດ ບຸບຜາ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์