ຕາດຕະແລ ແຫຼ່ງທ່ອງທ່ຽວທີ່ສວຍງາມ ຂອງແຂວງອຸດົມໄຊ

ຕາດຕະແລໃນເມືອງຮຸນ ແຂວງອຸດົມໄຊເປັນອີກເຂດໜຶ່ງທີ່ສຳຄັນຂອງຫຼາຍໆນໍ້າຕົກຕາດ,ແຕ່ບ່ອນນີ້ອາດຈະແຕກຕ່າງຈາກບ່ອນອື່ນຍ້ອນເປັນແຫຼ່ງທ່ອງທ່ຽວທີ່ສາມາດເຂົ້າເຖິງທຳມະຊາດໃນເຂດປ່າດົງດິບໄດ້ຕາມອັດທະຍາໄສດ້ວຍການບໍລິການອັນເປັນກັນ ເອງ,ພ້ອມທັງອາບ ແລະເບິ່ງນໍ້າທີ່ໄຫຼມາຈາກຕີນພູຜ່ານໂງ່ນຫີນລົງມາແລະກິນອາກາດສົດໆພາຍໃນ ປ່າພາຍໃຕ້ຮົ່ມສີຂຽວທີ່ຫາເບິ່ງ ຍາກໃນເຂດເມືອງເໜືອ.

ສະຖານທີ່ທ່ອງທ່ຽວແຫ່ງນີ້ ເປັນຈຸດດຶງດູດນັກທ່ອງທ່ຽວແຫ່ງສຳຄັນຍ້ອນອາກາດເຢັນສະບາຍປະກອບກັບພູຜາປ່າໄມ້ທີ່ປົກຄຸມເປັນຜູ້ຜະລິດອາກາດສົດໆ, ຊຶ່ງ ເປັນນໍ້າຕົກຫຼາຍຊັ້ນຕໍ່ກັນລົງມາ 7ຊັ້ນດ້ວຍກັນໂດຍມີທັງໃຫຍ່-ນ້ອຍແຕກຕ່າງກັນ ແລະມີຄວາມສູງ 161 ແມັດ ແລະກວ້າງເປັນແຕ່ລະຊັ້ນຕ່າງກັນຄື: ຊັ້ນ 1 ສູງ 7 ແມັດ, ກວ້າງ 8 ແມັດ; ຊັ້ນ 2 ສູງ 15 ແມັດ, ກວ້າງ 7 ແມັດ; ຊັ້ນ 3 ສູງ 15 ແມັດ, ກວ້າງ 11 ແມັດ; ຊັ້ນ 4 ສູງ 16 ແມັດ, ກວ້າງ 27 ແມັດ; ຊັ້ນ 5 ສູງ 40 ແມັດ, ກວ້າງ 27 ແມັດ; ຊັ້ນ 6 ສູງ 13 ແມັດ, ກວ້າງ 28 ແມັດ; ແລະຊັ້ນ 7 ສູງ 55 ແມັດ, ກວ້າງ 35 ແມັດ. ຕາດຕະແລຕັ້ງຢູ່ຫ່າງຈາກເທສະບານ ເມືອງຮຸນແຂວງອຸດົມໄຊ  ປະມານ 40 ກວ່າກິໂລແມັດ.

ຕຳນານເລົ່າຂານປາກຕໍ່ປາກສືບຕໍ່ກັນມາວ່າ:ແຕ່ປາງກ່ອນມີບ່າວເງືອກຊື່ທ້າວພັກໄດ້ລົງໄປຫຼິ້ນບຸນຢູ່ຫຼວງພະບາງ,ໄປເຫັນສາວເງືອກຊື່ວ່ານາງ ຄຳຜິວ ທີ່ອາໄສ ຢູ່ນໍ້າຄານ.ທ້າວ ພັກເກີດມີຄວາມຮັກມັກກັບນາງຄຳຜິວ ແລະໄດ້ລັກເອົານາງຄຳຜິວມານຳ,ຕໍ່ຈາກນັ້ນມາມີບ່າວເງືອກທີ່ຢູ່ຫຼວງພະບາງເຄີຍຮັກມັກກັບນາງ ຄຳຜິວມາກ່ອນໄດ້ນຳໄປເອົານາງຄືນຈົນເກີດມີການຕໍ່ສູ້ກັນຂຶ້ນຢ່າງດຸເດືອດ.ທ້າວພັກເຫັນດັ່ງນັ້ນ,ຈຶ່ງໄດ້ກໍ່ສ້າງດ່ານຕ້ານກັນໄວ້ເປັນຈຸດໆຢູ່ທີ່ນໍ້າ ຕະແລ ແລະດ່ານແຕ່ລະດ່ານດັ່ງກ່າວກໍ່ກາຍໄປຕາດຕະແລໃນປະຈຸບັນ.

ພາບ ແລະຂາ່ວຈາກ: ໜັງສືພິມເສດຖະກິດ-ສັງຄົມ

แชร์