ຫວຽດນາມເກີນດຸນການຄ້າ 1.590 ລ້ານໂດລາ

    ສສ ຫວຽດນາມໄດ້ດຸນການຄ້າເປັນຈຳນວນຫຼາຍໃນໄລຍະ 6 ເດືອນຕົ້ນປີນີ້ຫຼັງຈາກພາກພື້ນອາຊຽນແຫ່ງນີ້ໄດ້ປະໂຫຍດຈາກສະຖານະການຄວາມຕຶງຄຽດທາງ ການຄ້າລະຫວ່າງອາເມລິກາ ແລະ ສປ ຈີນ.

  ຕາມຂ່າວຕ່າງປະເທດລາຍງານວ່າຂໍ້ມູນຈາກກົມພາສີລະບຸໃນວັນທີ 13  ກໍລະກົດທີ່ຜ່ານມາ ຫວຽດນາມໄດ້ດຸນການຄ້າທີ່ 1.590 ລ້ານໂດລາສະຫະລັດ ໃນໄລຍະເດືອນມັງກອນ-ມິຖຸນາ ເກີນກວ່າ ທີ່ລັດຖະບານຄາດຄະເນວ່າປະ ເທດຈະຂາດດຸນ 43 ລ້ານໂດລາ ຊຶ່ງມູນຄ່າການສົ່ງອອກຂອງຫວຽດນາມໃນໄລຍະ 6 ເດືອນຕົ້ນປີນີ້ ເພີ່ມຂຶ້ນ 7,2% ຢູ່ທີ່ 122.530 ລ້ານໂດລາ ເປັນຜົນມາຈາກການ ສົ່ງອອກສິນຄ້າໄປຍັງອາເມລິກາທີ່ຂະຫຍາຍຕົວເພີ່ມຂຶ້ນເຖິງ 27,4% ແລະ ສ ເກົາຫຼີເພີ່ມຂຶ້ນ 16,8%, ຫວຽດນາມໄດ້ດຸນການຄ້າຈາກອາເມລິກາ 17.100 ລ້ານໂດລາ ໃນໄລຍະ 5 ເດືອນຕົ້ນປີນີ້ເພີ່ມ ຂຶ້ນຈາກ 12.940 ລ້ານໂດລາໃນໄລຍະເວລາດຽວກັນຂອງປີກ່ອນ ແຕ່ຂະນະດຽວກັນຫວຽດນາມຂາດດຸນການຄ້າກັບຈີນທີ່ 16.290 ລ້ານໂດລາ ເພີ່ມຂຶ້ນຈາກ11.050 ລ້ານໂດລາ.

 ກົມພາສີອາກອນຫວຽດນາມລະບຸວ່າໃນເດືອນມິຖຸນາຫວຽດນາມສ້າງສະຖິຕິໄດ້ດຸນການຄ້າທີ່ 1.930 ລ້ານໂດລາ ຫຼາຍກວ່າລັດຖະບານຄາດຄະເນໄວ້ວ່າຈະເກີນດຸນການຄ້າທີ່ 400 ລ້ານໂດລາ ສ່ວນການສົ່ງອອກໃນເດືອນມິຖຸນາຫຼຸດລົງ 2,2% ເມື່ອທຽບກັບເດືອນກ່ອນໜ້ານີ້ທີ່ 21.430 ລ້ານໂດລາ ຂະນະທີ່ການນໍາເຂົ້າຫຼຸດລົງ 15,9% ຢູ່ທີ່ 19.490 ລ້ານໂດລາ.

-----------------------------

ໜັງສືພິມເສດຖະກິດ-ສັງຄົມ

แชร์