ເມືອງຜາອຸດົມ ພວມຕົກກ້ານາປີໄດ້ 45%

  ການຜະລິດເຂົ້ານາປີຂອງຊາວນາຢູ່ເມືອງຜາອຸດົມ, ແຂວງບໍ່ແກ້ວ ໃນປີນີ້ແມ່ນມີຄວາມຫຼ້າຊ້າກວ່າປີຜ່ານມາໂດຍສາເຫດແມ່ນດິນຟ້າອາກາດບໍ່ເອື້ອຍອໍາ ນວຍຝົນຕົກໜ້ອຍຊຶ່ງນັບແຕ່ເດືອນມິຖຸນາມາຮອດປະຈຸບັນພວມຕົກກ້າໄດ້ 45% ການໄຖກຽມດິນສຳເລັດແລ້ວ 60% ຂອງເນື້ອທີ່ນາປີທັງໝົດ 2.47 0 ເຮັກຕາ, ຄາດຄະເນວ່າຈະໄດ້ປັກດໍາເຂົ້ານາປີໃນກາງເດືອນກໍລະກົດ ແລະຈະໃຫ້ສຳເລັດການປັກດຳ 100% ໃນທ້າຍເດືອນສິງຫາ.

  ທ່ານ ສົມໄຊ ວັນນະຈອມຈັນ ຫົວໜ້າໜ່ວຍງານສົ່ງເສີມການປູກຝັງ, ຫ້ອງການກະສິກຳ-ປ່າໄມ້ເມືອງຜາອຸດົມ ໃຫ້ຮູ້ວ່າ: ການຜະລິດເຂົ້ານາປີຂອງຊາວນາ ເມືອງຜາອຸດົມ ໃນປີ 2019 ນີ້ ແມ່ນຫຼ້າຊ້າກວ່າປີຜ່ານມາ, ສາເຫດກໍ່ຍ້ອນສະພາບດິນຟ້າອາກາດບໍ່ເອື້ອອຳນວຍ, ຝົນຕົກໜ້ອຍເປັນເຫດເຮັດໃຫ້ຫ້ວຍນໍ້າຫຼາຍສາຍມີປະລິມານເຫືອດແຫ້ງບໍ່ພຽງພໍສຳລັບຫົດເນື້ອທີ່ນາ. ຕໍ່ສາເຫດດັ່ງກ່າວຂະແໜງການທີ່ກ່ຽວຂ້ອງໄດ້ລົງຊຸກຍູ້, ຕິດຕາມ, ກວດກາ, ວາງມາດຕະການໃນການຈັດແບ່ງ ຄຸ້ມຄອງການຊົມໃຊ້ນໍ້າເພື່ອໃຫ້ສົມສ່ວນ ແລະມີຄວາມຍຸຕິທຳໃຫ້ແກ່ ຊາວນາທີ່ມີມູນເຊື້ອດຸໝັ່ນຂະຫຍັນພຽນໃນການອອກແຮງງານໄດ້ພ້ອມກັນສືບຕໍ່ຄາດໄຖ,ປູກເຂົ້ານາປີຂອງຕົນໃຫ້ທ່ວງທັນຕາມລະດູການ. ສໍາລັບແນວພັນເຂົ້າທີ່ຊາວນານິຍົມໃຊ້ສ່ວນຫຼາຍແມ່ນແນວພັນເຂົ້າປູກພື້ນເມື ອງໃນນັ້ນມີເຂົ້າທ່າດອກຄໍາ 11, ເຂົ້າໄກ່ນ້ອຍ ແລະອີກຈໍານວນໜຶ່ງແມ່ນນໍາໃຊ້ເຂົ້າແນວພັນປັບປຸງ (ເຂົ້າກ້າກີບດຽວ). 

ນອກຈາກການເຮັດນາປີແລ້ວຊາວກະສິກອນທີ່ອາໄສຢູ່ເຂດເນີນສູງຍັງໄດ້ປູກເຂົ້າໄຮ່ໝູນວຽນໃນເນື້ອທີ່ 3.929 ເຮັກຕາ, ໃນນັ້ນສາລີແຂງ, ໝາກງາ, ໝາ ກເດືອຍ, ສາລີຫວານ ແລະ ພືດຜັກຊະນິດຕ່າງໆໄວ້ເພື່ອບໍລິໂພກພາຍໃນຄອບຄົວແລ້ວຍັງເປັນສິນຄ້າສົ່ງອອກສູ່ທ້ອງຕະຫຼາດພາຍໃນເມືອງ ແລະ ຍັງຈະມີທ່ວງທ່າຂະຫຍາຍຕົວສົ່ງອອກຕ່າງເມືອງ, ເຂດຕ່າງໆເພື່ອສ້າງລາຍຮັບເຂົ້າມາສູ່ຄອບຄົວຫຼຸດຜ່ອນຄວາມທຸກຍາກເທື່ອລະກ້າວ.

  ທ່ານ ສົມໄຊ ວັນນະຈອມຈັນ ຍັງໃຫ້ຮູ້ອີກວ່າ: ເພື່ອຍົກສູງສະມັດທະພາບຂອງຜົນຜະລິດເຂົ້ານາປີກໍ່ຄືພືດຜັກລະດູຝົນໜ່ວຍງານສົ່ງເສີມການປູກຝັງຫ້ອງ ການກະສິກຳ-ປ່າໄມ້ເມືອງຜາອຸ ດົມ, ຍັງໄດ້ອອກແຮງປິ່ນອ້ອມ ກັບບັນດາຂະແໜງການທີ່ກ່ຽວ ຂ້ອງໄດ້ລົງຊຸກຍູ້ໃກ້ຊິດຕິດແທດກັບຊາວກະສິກອນເປັນຕົ້ນແມ່ນການແນະນຳ, ວິທີການໆນຳໃຊ້ຝຸ່ນ, ພ້ອມທັງສະໜອງອຸປະກອນ, ສະໜອງແນວພັນປູກ, ຢາປາບສັດຕູພືດການບົວລະບັດເຂົ້ານາຫຼັງປູກແລ້ວເພື່ອເຮັດໃຫ້ຜົນຜະລິດມີສີຂຽວງອກງາມຜົນຜະລິດໄດ້ມີປະສິດທິພາບເພີ່ມປະລິມານ ແລະຄຸນນະພາບສູງຂຶ້ນກວ່າເກົ່າ.

---------------------------

ຂຽນໂດຍ: ນໍ້າເໝີຍ 

ພາບ ແລະຂ່າວ: ຈາກໜັງສືພິມເສດຖະກິດ-ສັງຄົມ

แชร์