7 ແຂວງ ປະກອບຄໍາເຫັນໃສ່ຮ່າງດໍາລັດ ວ່າດ້ວຍລາຍຮັບ

 ວັນທີ 9 ກໍລະກົດ 2019, ກົມຄຸ້ມຄອງຊັບສິນຂອງລັດ, ກະຊວງການເງິນໄດ້ຈັດຕັ້ງກອງປະຊຸມເພື່ອລະດົມແນວຄວາມຄິດປະກອບຄໍາເຫັນໃສ່ຮ່າງດຳລັດ ວ່າດ້ວຍລາຍຮັບ ແລະການແບ່ງລາຍຮັບຈາກຊັບສິນຂອງລັດຂຶ້ນທີ່ໂຮງແຮມຫົງຄໍາແຂວງເຊກອງໂດຍການເປັນປະທານຂອງທ່ານ ເຫຼັກໄຫຼ ສີວິໄລ ຮອງເຈົ້າແຂວງໆເຊກອງ, ທ່ານ ນາງ ກະເສີມສີ ພົມມະວົງສາ ຫົວໜ້າກົມຄຸ້ມຄອງຊັບສິນຂອງລັດ, ມີບັນດາປະທານ-ຮອງປະທານສະພາປະຊາຊົນແຂວງ, ຫ້ອງວ່າການແຂວງ, ຫົວໜ້າພະ ແນກການຂົງເຂດເສດຖະກິດ 7 ແຂວງຄື: ບໍລິຄໍາໄຊ, ຄໍາມ່ວນ, ສະຫວັນ ນະເຂດ, ສາລະວັນ, ຈໍາປາສັກ, ເຊກອງ, ອັດຕະປືເຂົ້າຮ່ວມ.

 ທ່ານນາງ ກະເສີມສີ ພົມມະວົງສາ ກ່າວວ່າ: ດໍາລັດວ່າດ້ວຍລາຍຮັບ ແລະການແບ່ງລາຍຮັບຈາກຊັບສິນຂອງລັດຊຶ່ງມີທັງໝົດ 7 ໝວດ 37 ມາດຕາໂດຍດໍາລັດສະບັບນີ້ ໄດ້ກຳນົດຫຼັກການ, ລະບຽບການ ແລະມາດຕະການກ່ຽວກັບການຄຸ້ມຄອງ, ການຕິດຕາມກວດກາວຽກງານລາຍຮັບຊັບສິນຂອງລັດເພື່ອໃຫ້ມີປະສິດທິພາບ,ປະສິດທິຜົນແນໃສ່ເພື່ອດຸ່ນດ່ຽງງົບປະມານລະຫວ່າງສູນກາງ ແລະທ້ອງຖິ່ນ, ຮັບປະກັນການເກັບລາຍຮັບຊັບສິນຂອງລັດໃຫ້ຖືກຕ້ອງ, ຄົບ ຖ້ວນ, ທັນເວລາ ແລະລວມສູນເຂົ້າງົບປະມານແຫ່ງລັດປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ. ໂດຍລາຍຮັບຈາກຊັບສິນຂອງລັດແມ່ນລາຍຮັບທີ່ເກີດຂຶ້ນຈາກການນໍາໃຊ້ ຫຼືການຂາຍຊັບສິນຂອງລັດຊຶ່ງຕ້ອງໄດ້ມອບລາຍຮັບເຂົ້າລວມສູນເປັນລາຍຮັບງົບປະມານແຫ່ງລັດຊຶ່ງແບ່ງໃຫ້ທ້ອງ ຖິ່ນຄຸ້ມຄອງ ແລະນໍາໃຊ້ ໂດຍດໍາລັດວ່າດ້ວຍລາຍຮັບ ແລະການ ແບ່ງລາຍຮັບຈາກຊັບສິນຂອງລັດໄດ້ມີຂອບເຂດ, ສິດໃນການຄຸ້ມຄອງ ເປັນຕົ້ນແມ່ນທີ່ດິນຂອງລັດທີ່ນໍາໃຊ້ດຳເນີນທຸລະກິດ, ໜ້ານໍ້າ (ຄົງທີ່ ແລະ ເຄື່ອນທີ່), ກິດຈະການອຸດສະຫະກຳ ແລະ ພະລັງງານ, ກິດຈະການກະສິກຳ, ກິດຈະການໆຄ້າ ແລະການບໍລິການ, ກິດຈະການບໍ່ແຮ່, ຄ່າຊັບພະຍາກອນແຮ່ທາດຮັບໃຊ້ກິດຈະການກໍ່ສ້າງ, ຄ່າຊັບພະຍາກອນແຮ່ທາດ, ຄ່າພາກຫຼວງ (ຄ່າຊັບພະຍາກອນນໍ້າທຳ ມະຊາດເພື່ອຮັບໃຊ້ໂຄງການ ເຂື່ອນໄຟຟ້ານໍ້າຕົກ), ຄ່າພາກຫຼວງ (ຄາຊີໂນ), ຄ່າພາກຫຼວງອື່ນໆ,    ຄ່າຊັບພະຍາກອນນໍ້າສໍາລັບກິດຈະການໆຜະລິດ ແລະການບໍລິການ, ຄ່າລິຂະສິດໝາຍເລກທະບຽນທີ່ລັດເປັນຜູ້ກຳນົດ,ຄ່າການຢັ້ງຢືນລິຂະສິດ ແລະ ມາດຕະຖານທາງວິທະຍາສາດ,ຄ່າຄົ້ນຄວ້າຄວາມຖີ່ຂອງການສື່ສານໂທລະຄົມມະນາຄົມ, ຄ່າເວນຄືນ, ຄ່າຫັນປ່ຽນການນໍາໃຊ້ທີ່ດິນ, ຄ່າທຳນຽມເຂົ້າຊົມສະຖານທີ່ທ່ອງທ່ຽວ, ລາຍຮັບຈາກຜົນຂອງການກວດກາ ແລະກວດສອບ ແລະລາຍຮັບບັງເອີນ.

  ພາຍຫຼັງໄດ້ຮັບຟັງການເຜີຍແຜ່ດຳລັດແລ້ວບັນດາຜູ້ເຂົ້າຮ່ວມໄດ້ປະກອບຄໍາເຫັນໃສ່ໂດຍໄດ້ລົງເລິກໃສ່ບາງມາດຕາທີ່ເຫັນວ່າເນື້ອໃນຍັງບໍ່ທັນສອດຄ່ອງກັບຫົວຂໍ້ທີ່ກໍານົດ,ບໍ່ສອດຄ່ອງຕໍ່ກັບການນໍາໃຊ້ໃນປະຈຸບັນ, ການແບ່ງສ່ວນລາຍຮັບບາງອັນລະຫວ່າງສູນກາງ ແລະທ້ອງຖິ່ນເຫັນວ່າເປີເຊັນຍັງຫຼຸດໂຕນກັນຫຼາຍເຮັດໃຫ້ຫຼາຍແຂວງຂາດດຸ່ນງົບປະມານ.

---------------------

ຂຽນໂດຍ: ພຸດທະສອນ

ພາບ ແລະຂ່າວ: ຈາກໜັງສືພິມເສດຖະກິດ-ສັງຄົມ

แชร์