ຕຸຕູ່ ໄພທິດາ ໂຕແທນລາວເຂົ້າປະກວດນາງສາວມິດຕະພາບທີ່ເສີນຕູ

  ນາງ ໄພທິດາ ໂພທິສານ ຫຼື ຕຸຕູ່ ນາງສາວມິດຕະພາບລາວ 2019 (Miss Friendship Laos 2019) ຊຶ່ງໄດ້ ຖືກຄັດເລືອກໃຫ້ເປັນໂຕແທນຂອງປະເທດລາວເຂົ້າປະກວດ Miss Friend ship International 2019 ທີ່ເສີນຕູ ປະເທດຈີນ, ໃນວັນທີ 27 ກໍລະກົດ ທີ່ຈະມາເຖິງນີ້, ເພື່ອສະເຫຼີມສະຫຼອງມິດຕະ ພາບໂດຍເນັ້ນໃສ່ການແລກປ່ຽນວັດທະນະທຳຈາກຫຼາຍກວ່າ 50 ປະເທດທົ່ວໂລກ.

ທ່ານ ຄົມປັນຍາ ເພັງວິໄນຍາ ປະທານໂຄງການງານສາວລາວກ່າວວ່າ: ໂຄງການປະກວດ Miss Friendship International 2019 ແມ່ນໂຄງການປະກວດໜຶ່ງເພື່ອສ້າງສາຍພົວພັນລະຫວ່າງການແລກປ່ຽນວັດທະນະທໍາ ແລະການຮ່ວມມືຫຼາຍໆດ້ານ, ການປະກວດດັ່ງກ່າວຈະເລີ່ມເກັບໂຕໃນວັນ ທີ 17 ກໍລະກົດ ເປັນຕົ້ນໄປ ແລະ ຈະມີການຈັດປະກວດຮອບຕັດສິນຂຶ້ນໃນວັນທີ 27 ກໍລະກົດທີ່ຈະມາເຖິງນີ້, ໂດຍມີຫຼາຍກວ່າ 50 ປະເທດຈາກທົ່ວໂລກເຂົ້າຮ່ວມ, ເວທີນີ້ເປັນເວທີທີ່ໃຫຍ່ສົມ ຄວນ ແລະ ມີຄວາມສຳຄັນ, ພ້ອມນັ້ນຍັງໄດ້ສະແດງເຫັນເຖິງສາຍພົວພັນອັນແໜ້ນແຟ້ນລະຫວ່າງປະເທດລາວ ແລະ ປະເທດຈີນອີກດ້ວຍຊຶ່ງການປະກວດຄັ້ງນີ້ລາວ ເຮົາໄດ້ຄັດເລືອກເອົາ ນາງ ໄພທິດາ ໂພທິສານ ຫຼື ຕຸຕູ່, ເນື່ອງຈາກຜູ້ກ່ຽວໄດ້ຮັບລາງວັນ Miss Friendship Laos 2019 ຈາກການປະກວດ Miss Laos ຜ່ານມາ, ພ້ອມດຽວກັນນັ້ນຜູ້ກ່ຽວຍັງມີ ຄວາມສາມາດຫຼາຍດ້ານທີ່ເໝາະສົມກັບ ການປະກວດໃນຄັ້ງນີ້ອີກດ້ວຍ ແລະທາງ ຄະນະກຳມະການຈຶ່ງເຫັນດີໃຫ້ ຕຸຕູ່ ເປັນ ຕົວແທນຂອງປະເທດເຂົ້າປະກວດ ແລະ ກໍນັບວ່າເປັນຄັ້ງທຳອິດຂອງລາວທີ່ໄດ້ສົ່ງນາງງາມເຂົ້າປະກວດໃນເວທີນີ້

  ທ່ານ ນາງ ຕ໋ອດ ລີນ້າ ກ່າວວ່າ: ສຳລັບ Miss Friendship Laos ປີນີ້ແມ່ນໄດ້ມີຄວາມກຽມພ້ອມທຸກດ້ານແລ້ວເກືອບ 99%, ເນື່ອງຈາກວ່າ ນາງ ໄພທິດາ ໂພທິສານ ເປັນຈາກວ່າຜູ້ ກ່ຽວມີປະສົບການດ້ານນີ້ມາແລ້ວ, ພຽງແຕ່ປັບປຸງບຸກຄະລິກກະພາບທັງ ພາຍໃນ ແລະພາຍນອກຂອງນ້ອງ ນາງສາວ, ການພັດທະນາທາງດ້ານ ບຸກຄະລິກການຕອບຄຳຖາມ, ທັກສະການເວົ້າຄ່ອງແຄ່ວ, ຝຶກເວົ້າໃນທີ່ສາທາລະນະ, ການຢູ່ຮ່ວມກັນຫຼາຍຄົນ ແລະ ການຊ່ວຍເຫຼືອຕົນເອງ, ນອກຈາກນັ້ນໃນການປະກວດຄັ້ງນີ້ຈຸດເດັ່ນອີກຢ່າງໜຶ່ງແມ່ນການເຜີຍແຜ່ຊຸດປະຈຳຊາດຊຶ່ງເນັ້ນອອກແບບໃນລັກສະນະແບບລາວໆ ພ້ອມກັບການປະຍຸກໃຫ້ອອກໃນລັກສະນະທັນສະ ໄໝດ້ວຍນັກອອກແບບຈາກຮ້ານສົມໃຈປັກກິ່ງລາຍຫຼວງພະບາງ.

  ພິທີຖະແຫຼງຂ່າວການປະກວດ Miss Friendship International 2019 ທີ່ເສີນຕູປະເທດຈີນແມ່ນໄດ້ຈັດຂຶ້ນໃນວັນທີ 12 ກໍລະກົດຜ່ານມາ, ທີ່ໂຮງແຮມ ແລນມາກ, ໂດຍການເຂົ້າຮ່ວມຂອງທ່ານ ຄົມປັນຍາ ເພັງວິໄນຍາ ປະທານໂຄງ ການງານສາວລາວ, ທ່ານ ນາງ ຕ໋ອດ ລີນ້າ ຄູຝຶກ ແລະຜູ້ຈັດການ Miss Friends hip Laos, ທ່ານ ທະນູສອນ ແກ້ວວຽງຄຳ ແລະທ່ານ ເກດສະໜາ ແພງສົມບັດ ທີ່ປຶກສາໂຄງການ ນາງ ສາວລາວ, ທ່ານ ນາງ ມະຍຸລີ ຄຳວັນດີ ຕົວແທນຈາກ ແອັ ກເຊີນໂປຼ, ພ້ອມດ້ວຍສື່ມວນຊົນເຂົ້າຮ່ວມ.  

 ນາງ ໄພທິດາ ໂພທິສານ ຫຼື ຕຸຕູ່ ອາ ຍຸ 25 ປີ ຈົບຈາກມະຫາວິທະຍາໄລ ແຫ່ງຊາດຄະນະອັກສອນສາດພາກວິຊາພາສາຈີນ, ພ້ອມນັ້ນຍັງມີຄວາມສາມາດ ໃນການຊົງກາເຟ ຫຼື ແຊັມຊົງກາເຟຢອດຂອງປະເທດລາວ, ເຄີຍຜ່ານການປະກວດນາງສາວລາວ, ເວທີເດີນແບບ ແລະການຖ່າຍແບບລົງໃນວາລະສານ ຫຼາຍສະບັບ.

----------------------------

ຂຽນໂດຍ: ພິມພອນ  

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์