ປ່ອຍປາສະຫຼອງວັນປ່ອຍປາ, ອະນຸລັກສັດນໍ້າ ແລະສັດປ່າແຫ່ງຊາດ

  ວັນທີ 13 ກໍລະກົດ 2019 ທີ່ອ່າງນໍ້ຊວງ ເມືອງນາຊາຍທອງ ນະຄອນຫຼວງວຽງຈັນ ໄດ້ຈັດພິທີສະເຫຼີມສະຫຼອງວັນປ່ອຍປາ, ອະນຸລັກສັດນໍ້ ແລະສັດປ່າແຫ່ງຊາດຂຶ້ນຊຶ່ງເປັນກຽດເຂົ້າຮ່ວມ ໂດຍທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ມີ ທ່ານ ລຽນ ທິແກ້ວ ລັດຖະມົນຕີກະຊວງກະສິກຳ ແລະປ່າໄມ້, ພ້ອມດ້ວຍບັນດາລັດຖະມົນຕີ, ຮອງລັດຖະມົນຕີ, ທ່ານເຈົ້າເມືອງ, ບັນດາທ່ານຫົວໜ້າກົມທີ່ກ່ຽວຂ້ອງ ແລະຜູ້ຕາງໜ້າອົງການສາກົນທີ່ກ່ຽວຂ້ອງດຂົ້າຮ່ວມ.

  ທ່ານ ຫຼ້າສາຍ ນວນທາສິງ ຫົວໜ້າພະແນກກະສິກຳ ແລະປ່າໄມ້ນະຄອນຫຼວງວຽງຈັນ ກ່າວວ່າ: ຂະບວນການນີ້ໄດ້ມີຄວາມສຳຄັນເພື່ອເປັນການປູກຈິດສຳນຶກແນວຄວາມຄິດໃຫ້ແກ່ເຍົາວະຊົນລາວບັນດາເຜົ່າ,ບໍ່ວ່າອະນຸຊົນ,ເຍົາວະຊົນ,ຊາວໝຸ່ມ ຫຼືລຸ້ນອາວຸໂສກໍລ້ວນແຕ່ຕ້ອງເຂົ້າຮ່ວມຂະບວນການອະນຸລັກສັດນໍ້າ ແລະສັດປ່າ (ປ່ອຍປາ) ໃຫ້ມີຄວາມອຸດົມສົມບູນຄູ່ກັບທຳມະຊາດເພື່ອປັບປຸງລະບົບນິເວດວິທະຍາ ແລະ ສິ່ງແວດລ້ອມຂອງນະຄອນຫຼວງວຽງຈັນກໍຄືທົ່ວປະເທດໃຫ້ອຸດົມສົມບູນ, ເນື່ອງຈາກນະຄອນຫຼວງວຽງຈັນ ມີແມ່ນໍ້າ, ຫ້ວຍ, ຄອງ, ໜອງ, ບຶງ ແລະ ອ່າງນໍ້າຫຼາຍແຫ່ງມີເນື້ອ ທີ່ໜ້ານໍ້າ ກວມ10,49 ເຮັກຕາ ເທົ່າກັບ 26,8% ຊຶ່ງອຳນວຍຄວາມສະດວກໃຫ້ແກ່ການລ້ຽງ, ການອະນຸລັກສັດນໍ້າ ແລະສັດປ່າ,ໃນນັ້ນໄດ້ນຳໃຊ້ເຮັດການປະມັງແລ້ວ 1,9 ພັນເຮັກຕາ ເພື່ອເຮັດໃຫ້ບັນລຸເປົ້າໝາຍໃນການສ້າງນະ ຄອນຫຼວງວຽງຈັນ ເປັນເມືອງທີ່ອຸດົມສົມບູນທາງດ້ານສະພາບແວດລ້ອມ ແລະ ມີສັດນໍ້າ-ສັດປ່າຄູ່ກັບຄວາມຫຼາກຫຼາຍຊີວະນາໆ ພັນທີ່ສວຍງາມ ແລະຮັ່ງມີ, ນະຄອນ ຫຼວງວຽງຈັນໄດ້ມີນະໂຍບາຍສົ່ງເສີມການປ່ອຍສັດນໍ້າ-ສັດປ່າ ໃນ 2 ຮູບແບບຄື: ປ່ອຍສັດນໍ້າ ແລະ ສັດປ່າເພື່ອເປັນແຫຼ່ງຂະຫຍາຍພັນຕາມທຳມະຊາດໂດຍແມ່ນພາກລັດ, ອົງການຈັດຕັ້ງມະຫາຊົນທຸກຊັ້ນຄົນພ້ອມດ້ວຍພະສົງສຳມະເນນເປັນຜູ້ຮັບຜິດຊອບປ່ອຍຮ່ວມກັນກັບກຸ່ມບ້ານ; ຂະບວນປ່ອຍສັດນໍ້າ-ສັດປ່າສູ່ທຳມະຊາດ ແລະປ່ອ ຍລົງໜອງລ້ຽງເອງສ້າງຄວາມສົມດູນທາງດ້ານລະບົບນິເວດທາງດ້ານສະບຽງອາຫານ ແລະເປັນສິນຄ້າໂດຍແມ່ນພາກສ່ວນບຸກຄົນກໍຄືເອກະຊົນ,ບໍລິສັດ, ນັກທຸລະກິດເປັນຜູ້ຈັດຕັ້ງປ່ອຍພາຍໃຕ້ການຊີ້ນຳຂອງເບື້ອງລັດ, ໃນນັ້ນສະເພາະນະຄອນຫຼວງວຽງ ຈັນແມ່ນໄດ້ຈັດຕັ້ງຄະນະກຳມະການກວດກາສະກັດກັ້ນການລັກລອບຊື້-ຂາຍ ສັດນໍ້າສັດປ່າຂຶ້ນເພື່ອກວດກາຕາມສະຖານທີ່ຕ່າງໆເປັນຕົ້ນແມ່ນຕາມຕະຫຼາດ ແລະສະຖານທີ່ຕ່າງໆຢູ່ພາຍໃນນະຄອນຫຼວງ ພ້ອມທັງໄດ້ມີການໂຄສະນາເຜີຍແຜ່ລະ ບຽບການ, ກົດໝາຍຕ່າງໆທີ່ກ່ຽວຂ້ອງໃຫ້ພໍ່ແມ່ປະຊາຊົນແມ່ຄ້າຊາວຂາຍ ແລະ ບັນດາໂຮງງານຕ່າງໆ ເພື່ອປູກຈິດສຳນຶກໃຫ້ເຂົາເຈົ້າເຂົ້າໃຈ ແລະ ຮັບຮູ້ຄວາມໝາຍຄວາມສຳຄັນຂອງການອະນຸລັກສັດນໍ້າ ແລະສັດປ່າ ຊຶ່ງປີນີ້ ນວ ແມ່ນໄດ້ແຜນສືບຕໍ່ປ່ອຍປາຢູ່ໃນ 9 ຕົວເມືອງ ຈຳນວນ 3,5 ແສນໂຕ ເພື່ອເປັນແຫຼ່ງຂະຫຍາຍພັນ ຕາມທຳມະຊາດ, ແນໃສ່ສ້າງສົມດູນທາງດ້ານລະບົບນິເວດດ້ານສະບຽງອາຫານ ແລະເປັນສິນຄ້າ.

  ທ່ານ ທອງພັດ ວົງມະນີ ຮອງລັດຖະມົນຕິກະຊວງກະສິກຳ ແລະປ່າໄມ້ກ່າວວ່າ: ການກຳນົດເອົາວັນທີ 13 ກໍລະກົດ ຂອງທຸກປີເປັນວັນປ່ອຍປາ, ວັນອະນຸລັກສັດນໍ້າ ແລະສັດປ່າແຫ່ງຊາດກໍ່ເພື່ອເປັນການລະນຶກເຖິງວັນຄ້າຍວັນເກີດຂອງທ່ານປະທານ ສຸພານຸວົງ, ປະທານປະເທດຄົນທຳອິດຂອງ ສປປ ລາວ ທີ່ມີຄຸນງານຄວາມດີ ແລະຜົນງານອັນໃຫຍ່ຫຼວງທີ່ໄດ້ອຸທິດໃຫ້ແກ່ພາລະກິດແຫ່ງການຕໍ່ສູ້ກູ້ຊາດກໍ່ຄືການປົກປັກຮັກສາ ແລະສ້າງສາພັດທະນາປະເທດຊາດຂອງເຮົາອີກປະການທີສອງແມ່ນເພື່ອ ເປັນການປູກຈິດສຳນຶກໃຫ້ແກ່ອະນຸຊົນ, ເຍົາວະຊົນຂອງຊາດ ກໍ່ຄືລູກຫຼານຜູ້ເກີດໃໝ່ໃຫຍ່ລຸນໃຫ້ມີສະຕິຮັກຫວງແຫນສັດນໍ້າ ແລະ ສັດປ່າທັງເປັນການປຸກລະດົມທົ່ວປວງຊົນເຂົ້າຮ່ວມການຄຸ້ມຄອງ, ປົກປັກຮັກສາ, ພັດທະນາ ແລະ ນຳໃຊ້ສັດນໍ້າ ແລະ ສັດປ່າແນໃສ່ເພື່ອເຮັດໃຫ້ປະຊາກອນສັດນໍ້າ ແລະ ສັດປ່າໃຫ້ນັບມື້ມີຄວາມອຸດົມສົມບູນ ແລະກາຍເປັນທ່າແຮງໃນການຄໍ້າປະກັນດ້ານສະບຽງອາຫານ, ໂພສະນາການກໍ່ຄືການປັບປຸງຊີວິດການເປັນຢູ່ຂອງປະຊາຊົນລາໃຫ້ນັບມື້ດີຂຶ້ນ ແລະ ປະການທີສາມແມ່ນເພື່ອເປັນການສືບສານຮີດຄອງປະເພນີໃນຊ່ວງເຂົ້າພັນສາຫ້າມບໍ່ໃຫ້ຂ້າສັດຕັດຊີວິດໃຫ້ມີຄວາມໝາຍຄວາມສຳຄັນຍິ່ງຂຶ້ນ.

  ສຳລັບປີ 2019 ນີ້ມີແຜນຈະປ່ອຍປາຄືນສູ່ທຳມະຊາດຈຳນວນ 50 ລ້ານໂຕ ໃນຂອບເຂດທົ່ວປະເທດ, ສະເພາະນະຄອນຫຼວງວຽງຈັນ ມີເປົ້າໝາຍປ່ອຍປາຈຳນວນ 5,80 ແສນໂຕ ແລະພິທີທາງການໃນຄັ້ງນີ້ຈະປ່ອຍປາທັງໝົດຈຳນວນ 2,92 ແສນໂຕ, ທີ່ໄດ້ປະກອບສ່ວນຂອງທາງພາກລັດ ແລະ ຜູ້ປະກອນການຊຶ່ງປະກອບມີປາປາກ, ປາເຂັງ, ປາເກັດ ແລບ, ປານິນ ແລະປາໄນ, ນອກນີ້ຍັງໄດ້ປ່ອຍພໍ່ພັນ ແລະ ແມ່ພັນປາທໍາມະຊາດຈຳນວນ 550 ໂຕ, ມີປາກົດ 100 ໂຕ, ປາໝູ 100 ໂຕ, ປາເຂັງ 100 ໂຕ, ປາເພ້ຍ 100 ໂຕ, ປາຊວາຍໝາກໄມ້ 100 ໂຕ, ປາເໝັ້ນ 50ໂຕ ແລະ ພິເສດຍັງມີແນວພັນລູກປາຝາທີ່ຈະປ່ອຍໃນເທື່ອນີ້ 99 ໂຕ, ດັ່ງນັ້ນໃນໂອກາດວັນປ່ອຍປາແຫ່ງຊາດປີ 2019 ນີ້ຈຶ່ງຢາກຮຽກຮ້ອງມາຍັງທຸກຊັ້ນຄົນໃນສັງຄົມທັງພາກລັດ ແລະພາກເອກະຊົນ ແລະປະຊາ ຊົນບັນດາເຜົ່າຈົ່ງຮ່ວມແຮງຮ່ວມໃຈກັນເຂົ້າຮ່ວມໃນການຄຸ້ມຄອງ, ການປົກປັກຮັກສາ ແລະ ພັດທະນາສັດນໍ້າ ແລະສັດປ່າໃຫ້ມີຄວາມຍືນຍົງຕະຫຼອດໄປ, ທ່ານ ທອງພັດ ວົງມະນີກ່າວຕື່ມ.

-------------------------

ຂຽນໂດຍ: ພິມພອນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์