ຊາວໜຸ່ມແຂວງສາລະວັນ ຮັບເອົາຊາວໜຸ່ມ ອາສາສະໝັກຈາກ ມຊ

ໃນວັນທີ 11 ກໍລະກົດຜ່ານມາຄະນະບໍລິຫານງານຊາວໜຸ່ມ ແຂວງສາລະວັນຈັດພິທີມອບ-ຮັບກິດຈະກຳຊາວໜຸ່ມອາສາສະໝັກ “ອ້າຍ-ເອື້ອຍສອນນ້ອງ” ປີທີ 2 ໃຫ້ກັບແຂວງສາລະວັນ,ໂດຍການເປັນປະທານຂອງທ່ານຈັນສີລອນສີສົມບູນ ເລຂາຄະນະບໍລິຫານງານຊາວໜຸ່ມແຂວງ,ທ່ານ ນາງນວນໃສ ແກ້ວເມກຄະນະປະຈຳພັກຮອງເຈົ້າເມືອງໆສາລະວັນ,ທ່ານ ພຽງສະນິດຈັນທະວີໄຊເລຂາຄະນະບໍລິຫານງານຊາວໜຸ່ມມະຫາວິທະຍາໄລແຫ່ງຊາດ, (ມຊ) ມີບັນ ດາແຂກທີ່ຖືກເຊີນຈາກພະແນກການອ້ອມຂ້າງ, ຄູ-ອາຈານພ້ອມດ້ວຍອາສາສະໝັກເຂົ້າຮ່ວມ.

ໂດຍປະຕິບັດຕາມສັນຍາແຮກສ່ຽວລະຫວ່າງຊາວໜຸ່ມແຂວງສາ ລະວັນ ກັບ 4 ສ່ຽວ ໂດຍສະເພາະຊາວໜຸ່ມມະຫາວິທະຍາໄລແຫ່ງຊາດໃຫ້ໄດ້ຮັບການຈັດຕັ້ງປະຕິບັດ ຢ່າງຕໍ່ເນື່ອງ ແລະໄດ້ຮັບຜົນດີເພື່ອປະຕິບັດຕາມມະຕິ VII ຂອງສູນ ກາງຊາວໜຸ່ມ ແລະມະຕິ VI ຂອງຜູ້ແທນຊາວໜຸ່ມແຂວງສາລະວັນກໍ່ຄືແຜນພັດທະນາຊາວໜຸ່ມເຍົາວະ ຊົນແຂວງສາລະວັນ ໃນໄລຍະ 5 ປີ ສະໄໝທີ VI ແຕ່ປີ 2015-20120 ໂດຍສະເພາະໂຄງການໆຫັນເອົາຊາວໜຸ່ມລົງສູ່ຮາກຖານ ແລະໂຄງການເຄື່ອນໄຫວທາງດ້ານວັດທະນະທຳຂອງຊາວໜຸ່ມເຍົາວະຊົນໃນການຈັດຕັ້ງຜັນຂະ ຫຍາຍໃຫ້ປະກົດຜົນເປັນຈິງ,ຄະນະບໍລິຫານງານຊາວໜຸ່ມແຂວງສາລະວັນຮ່ວມກັບຄະນະຊາວໜຸ່ມ ມະຫາວິທະຍາໄລແຫ່ງຊາດ ໄດ້ ຮ່ວມກັນມີກິດຈະກຳ“ອ້າຍ-ເອື້ອຍສອນນ້ອງ”ຂຶ້ນເລີ່ມແຕ່ປີ 2018- 2019 (ເປັນປີທີ 2) ເພື່ອປູກຈິດ ສຳນຶກໃຫ້ຊາວໜຸ່ມກໍ່ຄືເຍົາວະຊົນໃຫ້ຮູ້ຈັກຮັກປະເທດຊາດ, ບ້ານເກີດ ເມືອງນອນ,ຫັນມາເອົາໃຈໃສ່ໃນ ການສຶກສາຮໍ່າຮຽນ,ຍົກລະດັບຄວາມຮູ້, ຄວາມສາມາດ,ຮູ້ຈັກນຳ ໃຊ້ເວລາຫວ່າງໃຫ້ເປັນປະໂຫຍດ ແລະຫຼີກລ້ຽງປະກົດການຫຍໍ້ທໍ້ຈາກສິ່ງເສບຕິດຕ່າງໆໃນຊ່ວງໄລຍະພັກແລ້ງ.

ກິດຈະກຳນີ້ໄດ້ຈັດຕັ້ງປະຕິບັດຢູ່ 1 ເມືອງຄື:ເມືອງສາລະວັນ,ໃນ ນັ້ນມີຊາວໜຸ່ມອາສາສະໝັກຈາກມະຫາວິທະຍາໄລແຫ່ງຊາດທີ່ຈະມາສິດສອນໃນຄັ້ງນີ້ມີ  16 ສະຫາຍ,ຍິງ 7 ສະຫາຍ, ມີຊາວໜຸ່ມ-ເຍົາວະຊົນມາສະໝັກທັງໝົດ 290 ຄົນ,ມີຫ້ອງຮຽນ 11 ຫ້ອງຄື:ປະຖົມ 5 ຫ້ອງ,ມັດທະຍົມຕົ້ນ 4 ຫ້ອງ, ມັດທະຍົມປາຍ 2 ຫ້ອງ, ມີ 4 ວິຊາ ຮຽນຄື: ວິຊາພາສາລາວ-ວັນນະຄະດີ, ຄະນິດສາດ,ພາສາອັງກິດແລະຟີຊິກສາດ,ຈະໄດ້ສອນເປັນ ເວລາ 40 ວັນ (ບໍ່ນັບວັນເສົາ-ອາທິດ) ໃນຊ່ວງໄລຍະພັກແລ້ງໂດຍເລີ່ມແຕ່ເດືອນກໍລະກົດຫາເດືອນສິງຫາ 2019 ຈິ່ງສໍາເລັດ.

ທັງນີ້ເປັນການເຕົ້າໂຮມຄວາມສາມັກຄີລະຫວ່າງຊາວໜຸ່ມ-ເຍົາວະຊົນລຸ້ນອ້າຍເອື້ອຍ,ຫັນເອົາຊາວໜຸ່ມລົງສູ່ຮາກຖານເພື່ອຮຽນຮູ້ ເອົາແບບແຜນການດຳລົງຊີວິດລະຫວ່າງຄອບຄົວຕົວເອງກັບຄອບຄົວໃນສັງຄົມເປັນການປະກອບສ່ວນໜຶ່ງເຂົ້າໃນພາລະກິດຂອງພັກກໍ່ຄືການສ້າງສາແລະພັດທະປະເທດຊາດ.

ພາບ ແລະຂາ່ວຈາກ: ໜັງສືພິມເສດຖະກິດ-ສັງຄົມ

แชร์