ທາດພູສີ ຈຸດຊົມວິວທຳມະຊາດທີ່ສວຍງາມ

ຫຼວງພະບາງເປັນແຂວງໜຶ່ງທີ່ຕັ້ງຢູ່ພາກເໜືອຂອງປະເທດລາວເປັນແຂວງທີ່ມີຕົວເມື່ອງຕັ້ງຢູ່ກາງຫຸບເຂົາ ແລະອ້ອມຮອບໄປດ້ວຍພູຜາປ່າໄມ້ທຳມະຊາດທີ່ອຸດົມສົມບູນສວຍງາມ ແລະຍັງມີສາຍນໍ້າສອງສາຍໄຫຼລອງໄປມາປ່ອງໃສ່ກັນເປັນອັນໜຶ່ງອັນດຽວກັນດັ່ງນໍ້າໃຈຄວາມສາມັກຄີຮັກແພງກັນຂອງພີ່ນ້ອງຊາວຫຼວງພະບາງ.

ເມື່ອທຸກຄົນເຂົ້າມາເຖິງຕົວເມື່ອງຫຼວງພະບາງສິ່ງທີ່ພົ້ນເດັ່ນທີ່ທຸກຄົນຕ້ອງເຫັນນັ້ນກໍ່ຄື:ທາດພູສີທີ່ມີສີເຫຼືອງອະຮາມງາມສະດຸດຕາທີ່ຕັ້ງຢູ່ຈອມພູໃຈກາງເມືອງນະຄອນຫຼວງພະບາງ,ເປັນອີກສະຖານທີທ່ອງທ່ຽວທີ່ສຳຄັນທີ່ສາມາດດຶງດູດແຂກພາຍໃນແລະຕ່າງປະເທດຢາກຂຶ້ນໄປທ່ຽວຊົມແລະສຳພັດເຖິງແມ່ນວ່າຈະຕ້ອງຜ່ານ ຄວາມອິດເມື່ອຍ ໂດຍການຍ່າງ ຂຶ້ນຂັນໄດເຖິ່ງ 328 ຂັ້ນ, ແຕ່ມັນກະຄຸ້ມຄ່າເພາະທິວທັດທຳມະຊາດເທິງນັ້ນມັນຊ່າງສວຍງາມຈົນສາມາດລືມຄວາມອິດເມື່ອຍທີ່ມີມາທັ້ງໝົດໄປເລີຍກະວ່າໄດ້.ບໍລິເວນຈຸດຊົມວິວນັ້ນສາມາດເບິ່ງເຫັນໄດ້ແບບ360 ອົງສາ,ດ້ານໜຶ່ງຈະເຫັນແມ່ນໍ້າຂອງໄຫຼເລາະລຽບຕາມສັນພູຢືດຍາວຈົນສຸດສາຍຕາ.ອີກດ້ານໜຶ່ງຈະເບິ່ງເຫັນສະພາບພາຍໃນຕົວເມືອງ,ສາຍນໍ້າຄານໄຫຼລອງປ່ອງໃສ່ແມ່ນໍ້າຂອງປະຈົບກັນເປັນນໍ້າໜຶ່ງອັນດຽວ ແລະພູຜາປ່າໄມ້ ນ້ອຍໃຫ່ຍເກາະກ່າຍກັນຢ່າງຢຶດຍາວເບິ່ງຄ້າຍກັບວ່າຫຼວງພະບາງມີກຳແພງໃຫ່ຍອ້ອມຮອບຕົວເມື່ອງໄວ້,

ບໍ່ພຽງແຕ່ເທົ່ານັ້ນຊ່ວງຍາມ ແລງຈະເປັນຊ່ວງທີ່ມີລົມເຢັນໆອາກາດທີ່ບໍລິສຸດນັກທ່ອງທ່ຽວທັງພາຍໃນແລະຕ່າງປະເທດມັກຈະຂຶ້ນມາຫຼາຍທີ່ສຸດເພື່ອຖ່າຍຮູບບັນທຶກພາບເປັນຄວາມຊົງຈຳກັບບັນຍາກາດກ່ອນຕາເວັນຕົກດິນເພາະຈະມີແສງສີສາດສ່ອງຢ່າງສວຍງາມກ່ອນຕາເວັນຈະລາຫຼັບຂອບຟ້າໄປ.

ພາບ ແລະຂາ່ວຈາກ: ໜັງສືພິມເສດຖະກິດ-ສັງຄົມ

• 15/07/2019