ລາວເວີນ ແລະຮ້ານອາຫານ 3434 ມອບເຄື່ອງ ໃຫ້ນັກກີລາແລ່ນ-ລານຄົນພິການລາວ

 ວັນທີ 9 ກໍລະກົດ ຜ່ານມາທີ່ສະໜາມກີລາເຈົ້າອານຸວົງ (ສູນ ເກັບຕົວທີມນັກກີລາແລ່ນ-ລານຄົນພິການລາວ) ນະຄອນຫຼວງວຽງຈັນ,ບໍລິສັດລາວເວີນ ມະຫາຊົນ ແລະຮ້ານອາຫານ 3434 ສືບຕໍ່ສະໜັບສະໜູນເຄື່ອງໃຊ້,ອາຫານ ເສີມ ແລະຊຸດກີລາມູນຄ່າ 4,44 ລ້ານກີບໃຫ້ແກ່ທັບນັກກີລາແລ່ນ-ລານຄົນພິການທີມຊາດລາວ ທີ່ກຳລັງເກັບຕົວຝຶກຊ້ອມກຽມເຂົ້າຮ່ວມງານມະຫາກຳກີລາອາຊຽນພາຣາເກມທີ່ປະເທດຟີລິບປິນແລະງານ ມະຫາກຳກີລາພາຣາແລມປິກເກມທີ່ປະເທດຍີ່ປຸ່ນ  ເປັນເຈົ້າພາບໃນປີ 2020.

ຕາງໜ້າມອບໂດຍທ່ານ ສີບຸນ ທຳສີບຸນມີຜູ້ອຳນວຍການບໍລິສັດ ລາວເວີນ ມະຫາຊົນ ແລະຕາງ ໜ້າຮັບແມ່ນທ່ານທອງສະຫວັດວົງສະຫວ່າງປະທານສະຫະພັນກີລາແລ່ນ-ລານຄົນພິການທີມຊາດລາວ, ມີທ່ານສີທາດຈັນທະບູລີຫົວໜ້າກົມກີລາມວນຊົນກະຊວງ ສຶກສາທິການ ແລະກີລາ,ທັງເປັນຮອງປະທານຄະນະກຳມະການພາຣາແລມປິກແຫ່ງຊາດລາວ ພ້ອມ ດ້ວຍພະນັກງານ, ວິຊາການ, ຄູຝຶກ,ນັກກີລາ ແລະພາກສ່ວນທີ່ກ່ຽວ ຂ້ອງທັງ 2 ຝ່າຍ ເຂົ້າຮ່ວມເປັນ ສັກຂີພິຍານ.

ສຳລັບເຄື່ອງທີ່ບໍລິສັດລາວເວີນມະຫາຊົນແລະຮ້ານອາຫານ  3434 ນຳມາມອບໃນຄັ້ງນີ້ມີທັງຜ້າຫົ່ມ, ພັດລົມ, ມຸ້ງ, ຕູ້ເຢັນ, ຊຸດກີລາແລະອາຫານເສີມລວມມູນຄ່າ 4,44 ລ້ານກີບເພື່ອໃຫ້ທັບນັກກີລາແລ່ນ-ລານຄົນພິການທີມຊາດລາວ ໄດ້ ນຳໃຊ້ເຂົ້າໃນການຝຶກຊ້ອມ ແລະ ບຳລຸງຮ່າງກາຍໃຫ້ມີຄວາມແຂງ ແຮງຢູ່ສະເໝີເພື່ອກະກຽມເຂົ້າຮ່ວມງານມະຫາກຳກີລາອາຊຽນພາຣາເກມທີ່ປະເທດຟີລິບປິນເປັນ ເຈົ້າພາບໃນຕົ້ນປີ  2020  ແລະງານມະຫາກຳກີລາພາຣາແລມປິກເກມທີ່ປະເທດຍີ່ປຸ່ນໃນທ້າຍປີ 2020.ຢ່າງໃດກໍຕາມ, ໃນທ້າຍເດືອນກໍລະ ກົດ ນີ້ນັກກີລາແລ່ນ-ລານຄົນພິການທີມຊາດລາວຈະໄດ້ເດີນທາງ ໄປເກັບຕົວຝຶກຊ້ອມຢູ່ປະເທດຍີ່ປຸ່ນພ້ອມທັງເຂົ້າຮ່ວມແຂ່ງຂັນກີລາ ແລ່ນ-ລານຍີ່ປຸ່ນໂອເພັນອີກດ້ວຍ.

ໂອກາດນີ້ທ່ານທອງສະຫວັດວົງສະຫວ່າງ ໄດ້ກ່າວສະແດງ ຄວາມຂອບໃຈແລະຮູ້ບຸນຄຸນເປັນຢ່າງສູງຕໍ່ບໍລິສັດລາວເວີນມະຫາຊົນແລະຮ້ານອາຫານ 3434 ທີ່ ໄດ້ແບ່ງນໍ້າຈິດນໍ້າໃຈແລະທຶນນະຊັບສ່ວນຕົວມາຊ່ວຍເຫຼືອນັກກີລາພວກເຮົາຕະຫຼອດມາ ແລະຄັ້ງນີ້ກໍເປັນອີກຄັ້ງໜຶ່ງທີ່ບັນດາທ່ານໄດ້ ໃຫ້ການຊ່ວຍເຫຼືອຂໍສັນຍາວ່າພວກເຮົາຈະນຳໃຊ້ເຄື່ອງໃຫ້ກຸ້ມຄ່າ ແລະເກີດຜົນປະໂຫຍດສູງສຸດພ້ອມຫວັງເປັນຢ່າງຍິ່ງວ່າຈະໄດ້ຮັບການຊ່ວຍເຫຼືອເພີ່ມອີກຈາກທັງ 2 ພາກສ່ວນ ໃນອະນາຄົດ.

 ພາບ ແລະຂາ່ວຈາກ: ໜັງສືພິມເສດຖະກິດ-ສັງຄົມ

แชร์