ລາວສົ່ງເສີມພັດທະນາການຄ້າແບບຍືນຍົງ

 ວັນທີ 9 ກໍລະກົດ 2019 ທີ່ນະ ຄອນຫຼວງວຽງຈັນສະພາການຄ້າ ແລະອຸດສາຫະກຳແຫ່ງຊາດລາວຮ່ວມກັບສູນການຄ້າສາກົນເປີດໂຄງການສົ່ງເສີມການພັດທະນາການຄ້າແບບຍືນຍົງ ໃນລາວ ເພື່ອສ້າງຄວາມສາມາດ, ສ້າງ ຄວາມເຂັ້ມແຂງໃນການພັດທະນາຫຼັກ ສູດຜູ້ປະກອບການສະໜອງການຊ່ວຍເຫຼືອດ້ານວິຊາການໃຫ້ແກ່ຜູ້ປະກອບການທຸລະກິດຂະໜາດນ້ອຍ ແລະກາງໂດຍສົ່ງເສີມຄວາມຮູ້ພ້ອມເຕັກນິກໃນການຈັດຕັ້ງໃນການເຮັດທຸລະກິດໂດຍເປັນປະທານຂອງທ່ານ ອຸເດດ ສຸວັນນະ ວົງ ປະທານສະພາການຄ້າ ແລະອຸດສາຫະກຳແຫ່ງຊາດລາວ,ທ່ານ ໂຈແຊບ ໂວກເນຍ ຫົວໜ້າໂຄງການ T4SD Hub ສູນການຄ້າສາກົນ, ທ່ານ ສະເຕຟານ ເຣີສ ເອກອັກຄະລັກສະ ທູດ ສະວີເດັນ ປະຈໍາບາງກອກປະເທດ ໄທພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ອຸເດດ ສຸວັນນະວົງ ປະທານກ່າວວ່າ: ໂຄງການດັ່ງກ່າວແມ່ນແນໃສ່ການສ້າງສູນ ຫຼື ໜ່ວຍງານສົ່ງເສີມການພັດທະນາການຄ້າແບບຍືນຍົງ ແລະການບໍລິການຂອງສະພາການຄ້າ ແລະອຸດສາຫະກຳແຫ່ງຊາດລາວ ຊຶ່ງ ຈະເປັນການບໍລິການໃນຫຼາຍຮູບແບບ ສຳລັບຜູ້ປະກອບການທຸລະກິດຂະໜາດນ້ອຍ ແລະກາງໃນລາວຊຶ່ງໄດ້ຮັບການສະໜັບສະໜູນດ້ານວິທີການ ແລະເຄື່ອງມືຕ່າງໆຈາກສູນການຄ້າສາກົນຈະເຮັດໃຫ້ຜູ້ປະກອບການ ຫຼື ວິສາຫະກິດສາມາດເຂົ້າໃຈເຖິງຂະບວນການ ແລະ ຂັ້ນ ຕອນຕ່າງໆກ່ຽວກັບມາດຕະຖານສາກົນໃນກອບເງື່ອນໄຂທີ່ອົງການຮັບຮອງມາດຕະຖານສາກົນກຳນົດໄວ້ເຊັ່ນ: ມາດຕະຖານສິນຄ້າປອດສານພິດ, ການຄ້າແບບຍຸດຕິ ທຳ ແລະອື່ນໆ

  ໂຄງການສົ່ງເສີມການພັດທະນາການຄ້າແບບຍືນຍົງມີເປົ້າໝາຍໃນການສ້າງຄວາມເຂັ້ມແຂງໃນການແຂ່ງຂັນຂອງທຸລະກິດຂະໜາດນ້ອຍ ແລະ ກາງໂດຍຜ່ານການຈັດຕັ້ງປະຕິບັດການຝຶກຫັດການເຮັດທຸລະກິດສີຂຽວ, ເພີ່ມຄວາມຮູ້ ແລະທັກສະທາງດ້ານການກຳນົດມາດຕະຖານຄຸນນະພາບສາກົນແບບຍືນຍົງ ແລະ ກຳນົດເອົາສິນ ຄ້າທີ່ສາກົນຕ້ອງການ, ອຳນວຍຄວາມສະດວກໃນການເຂົ້າຫາຕະຫຼາດສາກົນເປັນຕົ້ນ.

ຂຽນໂດຍ: ວົງມະນີ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์