ສະຫວັນຕິດເຊື້ອແລ້ວ 1,8 ພັນຄົນ ເສຍຊີວິດເກືອບ 10 ຍ້ອນໄຂ້ຍຸງ

  ພະຍາດໄຂ້ຍຸງລາຍໃນຂອບເຂດທົ່ວປະເທດຍັງຄົງສືບຕໍ່ລະບາດຢ່າງຕໍ່ເນື່ອງສະເພາະແຂວງສະຫວັນນະເຂດ ເສຍຊີວິດແລ້ວເກືອບ 10 ຄົນ ຈາກຜູ້ຕິດເຊື້ອ 1,8 ພັນຄົນ ດ້ານອຳນາດການປົກຄອງແຂວງວາງຫຼາຍມາດຕະການໃນການຕິດຕາມ ແລະຄວບຄຸມການລະບາດ.

  ວັນທີ 5 ກໍລະກົດ 2019 ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ໄດ້ລົງຢ້ຽມຢາມຄົນເຈັບຈາກການລະບາດຂອງພະຍາດໄຂ້ຍຸງລາຍທີ່ນອນປິ່ນ ປົວຢູ່ໂຮງໝໍແຂວງສະຫວັນນະເຂດ ໂດຍການນຳໜ້າພາທາງຂອງ ດຣ ບົງ ສຸວັນພັນທະລັງສີ ຫົວໜ້າພະແນກສາທາລະນະສຸກແຂວງ, ມີຄະນະອຳນວຍການໂຮງໝໍແຂວງກໍ່ໄດ້ຮ່ວມຕິດຕາມໃນຄັ້ງນີ້.

 ໃນໂອກາດດັ່ງກ່າວທ່ານເຈົ້າແຂວງສະຫວັນນະເຂດ ເນັ້ນໜັກໃຫ້ບັນດາແພດ-ໝໍຈົ່ງພ້ອມກັນເອົາໃຈໃສ່ຕິດຕາມດູແລຄົນເຈັບດ້ວຍຄວາມຮັບຜິດຊອບສູງ ແລະ ມີມາດຕະການຢ່າງເຂັ້ມງວດ. ຈາກນັ້ນທ່ານຍັງໄດ້ເນັ້ນໜັກ 5ປ ເພື່ອເຜີຍ ແຜ່ໃຫ້ພໍ່ແມ່ປະຊາຊົນກໍ່ຄືບັນດາຄອບຄົວຈົ່ງພ້ອມກັນປະຕິບັດ ເຊັ່ນ: (1ປ) ປິດພາຊະນະທີ່ເກັບນໍ້າໃນເຮືອນ ແລະ ນອກເຮືອນເພື່ອບໍ່ໃຫ້ຍຸງມາໄຂ່ໃສ່, (2ປ) ປ່ຽນນໍ້າໃນພາຊະນະເຊັ່ນ: ເຕົ້າດອກໄມ້, ນ້ຳຮອງຕີນຕູ້, ຖານຮອງຈອກນ້ຳ, (3ປ) ປ່ອຍປາຫາງນົກຍຸງລົງໃສ່ອ່າງເພື່ອໃຫ້ປາກິນໜອນນໍ້າ, (4ປ) ປັບປຸງອະນາໄມສິ່ງແວດລ້ອມອ້ອມເຮືອນບໍ່ໃຫ້ມີກະໂປະ, ກະປ໋ອງ,ຢາງຕີນລົດ ທີ່ມີນໍ້າຂັງ, (5ປ) ປະຕິບັດໃຫ້ເປັນວິໄນທຸກໆອາທິດ, ຖ້າເປັນໄຂ້ໃຫ້ໄປພົບແພດດ່ວນ. ຖ້າຫາກທຸກຄອບຄົວ-ທຸກຄົນປະຕິບັດໄດ້ຕາມ 5ປ ດັ່ງກ່າວນີ້ແລ້ວກໍ່ຈະສາມາດຫຼຸດຜ່ອນ ແລະປ້ອງກັນການລະບາດຂອ ງພະຍາດໄຂ້ຍຸງລາຍໄດ້ຢ່າງແນ່ນອນ.

ຕາມການລາຍງານຂອງພະແນກສາທາລະນະສຸກໄດ້ແຈ້ງໃຫ້ຮູ້ວ່າ: ນັບ ແຕ່ເດືອນມັງກອນ 2019 ຫາຕົ້ນເດືອນກໍລະກົດໃນທົ່ວແຂວງມີຜູ້ຕິດເຊື້ອໄຂ້ຍຸງລາຍທັງໝົດ 1.847 ຄົນ, ໃນນັ້ນເສຍຊີວິດ 9 ຄົນ, ໃນນັ້ນຢູ່ເມືອງອາດ ສະພອນຮອດປະຈຸບັນມີຜູ້ເປັນພະຍາດໄຂ້ຍຸງລາຍທັງໝົດ 296 ຄົນ, ເສຍຊີວິດ 5 ຄົນ, ເມືອງອຸທຸມພອນ 243 ຄົນ, ເສຍຊີວິດ 1 ຄົນ, ເມືອງສອງຄອນ212 ຄົນ, ເສຍຊີວິດ 1 ຄົນ, ເມືອງຈຳພອນ 66 ຄົນ, ເສຍຊີວິດ 1 ຄົນ ແລະເມືອງ ພະລານໄຊ 27 ຄົນ, ເສຍຊີວິດ 1 ຄົນ. ສ່ວນເມືອງອື່ນໆກໍ່ໄດ້ຜູ້ຕິດເຊື້ອພະຍາດນີ້ເຊັ່ນດຽວກັນແຕ່ບໍ່ມີຜູ້ເສຍຊີວິດ.

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์