ເມືອງງອຍ ປະກາດຈົບຊັ້ນມັດທະຍົມຕົ້ນບຳລຸງ

ວັນທີ 5 ກໍລະກົດຜ່ານມາເມືອງງອຍແຂວງຫຼວງພະບາງໄດ້ຈັດພິທີປະກາດເປັນເມືອງຈົບຊັ້ນມັດທະຍົມຕອນຕົ້ນບຳລຸງທົ່ວເມືອງ ໂດຍເຂົ້າຮ່ວມມີທ່ານຄຳຜາຍສີສະຫວັນ ຮອງລັດຖະມົນຕີກະຊວງສຶກສາທິການແລະກີລາພ້ອມດ້ວຍການນຳຂອງ ແຂວງ, ເມືອງ, ແຂກຮັບເຊີນ ແລະພາກສ່ວນກ່ຽວຂ້ອງເຂົ້າ ຮ່ວມ.

ທ່ານ ກິ່ງແກ້ວບຸບຜາປັນຍາຫົວໜ້າຫ້ອງການສຶກສາທິການແລະກີລາເມືອງໄດ້ຜ່ານບົດສະ ຫຼຸບການຈັດຕັ້ງການຮຽນ-ການສອນຊັ້ນມັດທະຍົມຕອນຕົ້ນບຳລຸງໃນທົ່ວເມືອງວ່າ:ເມືອງງອຍ ປະກອບມີ  75  ບ້ານ, ພົນລະເມືອງ 31.907 ຄົນ, ຍິງ 15.326  ຄົນ,ພາຍຫຼັງສຳເລັດການປະກາດຈົບຊັ້ນປະຖົມບຳລຸງໃນວັນທີ  20  ພຶດສະພາ 2011 ພາກສ່ວນກ່ຽວຂ້ອງໄດ້ສືບຕໍ່ການບຳລຸງຊັ້ນມັດທະຍົມຕົ້ນໃຫ້ປະຊາຊົນກຸ່ມເປົ້າ ໝາຍ 15-30 ປີ ສຳເລັດໃນສົກ ຮຽນ 2016-2017 ຈາກນັ້ນໄດ້ດຳເນີນການປະເມີນຄືນໃນສົກຮຽນ 2017-2018   ແລະ2018-2019 ມີກຸ່ມເປົ້າໝາຍຮຽນຈົບຫຼັກສູດບຳລຸງ 1.452 ຄົນ, ຍິງ 596 ຄົນ, ກຸ່ມເປົ້າໝາຍປະເມີນການສອບເສັງຂັ້ນກະຊວງ 795 ຄົນ, ມີໜ້າເຂົ້າສອບເສັງຕົວຈິງ 781 ຄົນ ກວມ 98,23%, ການ ຈັດຕັ້ງປະຕິບັດຕົວຈິງໄດ້ກຳນົດ ເອົາໄລຍະພັກພາກຮຽນທັງໄດ້ຈັດຝຶກອົບຮົມວິຊາຊີບຂັ້ນພື້ນຖານ ເຮັດໃຫ້ກຸ່ມເປົ້າໝາຍໄດ້ຮັບຮູ້ໄດ້ ບົດຮຽນຫຼາຍດ້ານແຕ່ຍັງມີບາງ ດ້ານທີ່ຈະຕ້ອງສືບຕໍ່ປັບປຸງເພື່ອ ເຮັດໃຫ້ການບຳລຸງຊັ້ນມັດທະຍົມປາຍມີຜົນສຳເລັດ.

ໂອກາດນີ້ທ່ານຄຳຜາຍສີສະຫວັນໄດ້ມອບໃບຢັ້ງຢືນຮັບຮອງ ເອົາເມືອງງອຍເປັນເມືອງຈົບຊັ້ນມັດທະຍົມຕອນຕົ້ນບຳລຸງ,ຈາກນັ້ນໄດ້ມີການມອບໃບຍ້ອງຍໍໃຫ້ບຸກ ຄົນ ແລະກົມກອງທີ່ມີຜົນງານດີ ເດັ່ນປະກອບສ່ວນການຮຽນ-ການ ສອນ.

ຂະນະດຽວກັນທ່ານ ຄຳຜາຍສີສະຫວັນຍັງໄດ້ມີຄຳເຫັນຊີ້ນຳໃຫ້ປະຊາຊົນກຸ່ມເປົ້າໝາຍທີ່ສຳ ເລັດການບຳລຸງຊັ້ນມັດທະຍົມຕົ້ນສືບຕໍ່ສຶກສາຮໍ່າຮຽນບຳລຸງຊັ້ນມັດທະຍົມປາຍ ແລະຄົ້ນຄວ້າຮໍ່າຮຽນເພື່ອພັດທະນາຕົນເອງຕື່ມແນໃສ່ປະກອບສ່ວນການພັດທະນາເສດຖະກິດ-ສັງຄົມຂອງທ້ອງຖີ່ນໃຫ້ດີຂຶ້ນ.

ພາບ ແລະຊາ່ວຈາກ: ໜັງສືພິມເສດຖະກິດສັງຄົມ

แชร์