ທ່ຽວຊົມຕາດສະແນນ ເມືອງບໍ່ແຕນ

ເມືອງບໍ່ແຕນເປັນເມືອງໜຶ່ງທີ່ມີຄວາມອຸດົມສົມບູນທາງດ້ານການທ່ອງທ່ຽວຊຶ່ງຕັ້ງຢູ່ທາງໃຕ້ສຸດຂອງແຂວງໄຊຍະບູລີຕິດກັບຊາຍແດນປະເທດໄທທັງ 3 ດ້ານ ການໄປມາຫາສູ່ກັນແມ່ນສະດວກສະບາຍເປັນເມືອງທີ່ຕັ້ງເທິງພູພຽງ,ເນື້ອທີ່ເກືອບ 80% ຂອງເມືອງ ເປັນພູ. ເປັນເມືອງທີ່ມີສະຖານທີ່ ທ່ອງທ່ຽວທາງທຳມະຊາດ,ປະຫວັດສາດ ແລະວັດທະນະທໍາເໝາະ ສຳລັບການທ່ອງທ່ຽວພັກຜ່ອນຢ່ອນໃຈ.

ຕາດສະແນນເປັນອີກຕາດທີ່ມີຄວາມສວຍສົດງົດງາມທາງດ້ານທຳມະຊາດຊີວະນາໆພັນມີອ່າງຫຼິ້ນນໍ້າທີ່ເກີດຈາກທຳມະຊາດມີຄວາມໃສເຢັນຢູ່ຕະຫຼອດເວລາ ແລະຢູ່ບໍລິເວນກ້ອງຕາດມີຕາດນ້ອຍອີກຕາດໜຶ່ງຊຶ່ງຫ່າງຈາກຕາດສະແນນປະມານ 500 ເມັດ,ມີຜາຫີນລຽນກັນເປັນຊັ້ນ-ເປັນຊໍ່ເຫຼື້ອມຍິບຍັບຄືກັບແກ້ວເພັດມະນີໃນຕອນທີ່ມີແສງຕາເວັນສ່ອງລົງມາກະພົບຜາຫີນນັ້ນ,ເໝາະສົມສຳລັບຜູ້ທີ່ມັກຫຼິ້ນນໍ້າພ້ອມກັບນໍ້າຕົກຕາດທີ່ແສນເຍືອກເຢັນ ແລະເຕັມໄປດ້ວຍພູຜາປ່າໄມ້ ແລະຊີວະນາໆພັນ.ຕາດສະແນນຢູ່ໃນສາຍແມ່ນໍ້າຮອຍເຂດບ້ານນໍ້າດັ້ນ ເມືອງບໍ່ແຕນ, ມີຄວາມກວ້າງ ແລະຄວາມສູງປະມານ 70  ແມັດ,ຫ່າງ ຈາກເທສະບານເມືອງປະມານ 17 ກິໂລແມັດ.

ສຳລັບເສັ້ນທາງທີ່ເຂົ້າໄປຕາດນັ້ນກໍມີຄວາມສະດວກສະບາຍຈົນເຖິງຕາດ,ພິເສດໃນການເຂົ້າໄປ ທ່ຽວຊົມຕາດແມ່ນບໍ່ໄດ້ມີການເກັບຄ່າບໍລິການໃດໆ,ທຸກໆທ່ານສາມາດໄປສຳຜັດຕົວຈິງໄດ້,ທ່ານຈະໄປເປັນກຸມ ຫຼື ໄປແບບຄອບຄົວກໍດີ,ມີອາຫານການກິນແບບພື້ນບ້ານຂອງແມ່ຄ້າທີ່ຂາຍຢູ່ຕາມທາງເຂົ້າໄປຕາດນັ້ນແລະຖ້າທ່ານໃດຢາກນຳເອົາອາຫານເພື່ອໄປປຸງ ແຕ່ງຢູ່ບໍລິເວນຕາດນັ້ນໄດ້ເຊັ່ນດຽວກັນ.

ພາບ ແລະຊາ່ວຈາກ: ໜັງສືພິມເສດຖະກິດສັງຄົມ

แชร์