ເມືອງໄຊຍະບູລີ ເລີ່ມປັກດໍາເຂົ້ານາປີ

  ພາຍຫຼັງທີ່ຊາວກະສິກອນພາຍໃນເມືອງໄຊຍະບູລີ, ແຂວງໄຊຍະບູລີ ໄດ້ສໍາເລັດການເກັບກ່ຽວມ້ຽນມັດພືດລະດູແລ້ງເປັນທີ່ຮຽບຮ້ອຍແລ້ວ, ກໍ່ໄດ້ສືບຕໍ່ສຸມໃສ່ໃນການຜະລິດພືດລະດູຝົນ, ເປັນຕົ້ນແມ່ນການປູກເຂົ້ານາປີຊຶ່ງມາຮອດປະຈຸບັນແມ່ນຕົກກ້າສໍາເລັດແລ້ວ 95% ແລະປັກດໍາສໍາເລັດແລ້ວ 1,44%.

 ທ່ານ ຄໍາພອນ ສິງງາມ, ຫົວ ໜ້າຫ້ອງການກະສິກໍາ ແລະປ່າໄມ້ ເມືອງໄຊຍະບູລີ ໄດ້ໃຫ້ຮູ້ວ່າ: ສໍາລັບການຜະລິດລະດູຝົນປີ 2019 ທົ່ວເມືອງມີຄາດໝາຍສູ້ຊົນປູກພືດໃຫ້ໄດ້ໃນເນື້ອທີ່ 22.300 ເຮັກຕາ ຊຶ່ງຜ່ານການລົງຊຸກຍູ້ສົ່ງເສີມ, ການຈັດຕັ້ງປະຕິບັດຂອງຊາວນາພາຍໃນເມືອງໄຊຍະບູລີມາຮອດປະຈຸບັນສາ ມາດປະຕິບັດໄດ້ 19.992,65  ເຮັກຕາ, ໃນນັ້ນ: ການການປູກເຂົ້ານາປີເນື້ອທີ່ແຜນການ 4.350 ເຮັກຕາ, ປະຈຸບັນຕົກກ້າສຳເລັດ 95%, ການກຽມດິນໄຖຮູດສຳເລັດ 70%,  ເຮັດນາຢອດມີ 6 ຄອບຄົວ, ຢອດເຂົ້າສຳເລັດ 4.05 ເຮັກຕາ ແລະປັກດໍາສຳເລັດເນື້ອທີ່ 58.60 ເຮັກຕາ ລວມເປັນ 62.65 ເຮັກຕາ ເທົ່າກັບ 1.44% ຂອງເນື້ອທີ່ແຜນການທີ່ວາງໄວ້ຊຶ່ງເຂດທີ່ມີການປັກດຳແລ້ວແມ່ນເຂດທີ່ໄດ້ຮັບນໍ້າຊົນລະປະທານເຊັ່ນ: ເຂດນາຫຼາ, ນາລາ ແລະທົ່ງນາໄໝສ່ວນເຂດນອກຊົນລະປະທານແມ່ນປັກດຳພຽງເລັກໜ້ອຍເນື່ອງຈາກເກີດໄພແຫ້ງແລ້ງ,ຊະນິດແນວພັນເຂົ້າທີ່ຊາວນາປູກຫຼາຍແມ່ນແນວພັນປັບ ປຸງຊຶ່ງກວມເອົາ 90% ມີຄື: ເຂົ້າທ່າດອກຄຳ, ເຂົ້າຖິ່ນແກ້ວ 17, ເຂົ້າ 450 ປີ, ເຂົ້າຈ້າວມະລິ 105 ແລະເຂົ້າພັນພື້ນບ້ານອີກຈໍານວນໜຶ່ງ, ການຜະລິດເຂົ້າໄຮ່: ມີເນື້ອທີ່ແຜນການ 2,250 ເຮັກຕາ, ມາຮອດປະຈຸບັນການປູກເຂົ້າໄຮ່ປະຕິບັດໄດ້ 2.245.80 ເຮັກຕາ, ເທົ່າກັບ 99.81%.

 ສຳລັບການປູກພືດຜັກຊະນິດຕ່າງໆເນື້ອທີ່ແຜນການ 2.980 ເຮັກຕາ, ປະຕິບັດໄດ້ 1,898.26 ເຮັກຕາ ເທົ່າກັບ 63.70% ຂອງແຜນການຊຶ່ງການຜະລິດພືດຜັກແມ່ນສາມາດສະໜອງຄວາມຕ້ອງການພືດຜັກພາຍໃນເມືອງໄດ້ໂດຍພື້ນຖານ, ພືດຜັກທີ່ຊາວສວນນິຍົມປູກຫຼາຍໃນລະດູຝົນແມ່ນຜັກກາດ ຊອມ, ຜັກກາດຕີນໝີ, ຜັກບົ້ງ, ຜັກກາດຫໍ່, ຜັກສະຫຼັດ, ຜັກຫອມຕ່າງໆ, ໝາກເຜັດ,ໝາກເຂືອ,ໝາກອຶເປັນຕົ້ນ,ການປູກພືດເສດຖະກິດເປັນສິນຄ້າ: ມີເນື້ອທີ່ແຜນການ 12,310 ເຮັກຕາ, ປະຈຸບັນປະຕິບັດໄດ້ 11,239.10 ເຮັກຕາ ເທົ່າກັບ 91.30% ໃນນີ້ພົ້ນເດັ່ນແມ່ນ: ສາລີແຂງປະຕິບັດໄດ້ 4,7 85 ເຮັກຕາ, ໝາກເດືອຍປະຕິບັດໄດ້ 4,748.4 ເຮັກຕາ ແລະ ສາລີຫວານປະຕິບັດໄດ້ 850.40 ເຮັກຕາ, ການປູກພືດອຸດສາຫະກຳ: ເນື້ອທີ່ແຜນການ 365 ເຮັກ ຕາ, ປະຕິບັດໄດ້ 249.29 ເຮັກຕາ ເທົ່າກັບ 68.30% ຊຶ່ງປູກຫຼາຍແມ່ນ: ໝາກກ້ວຍ, ໝາກນັດ ແລະ ອ້ອຍ, ການປູກໄມ້ໃຫ້ໝາກ: ເນື້ອ ທີ່ແຜນການປູກໃໝ່ 35 ເຮັກຕາ, ປະຕິບັດໄດ້ 10.2 ເຮັກຕາ ເທົ່າກັບ 19.14 ຊະນິດໝາກໄມ້ທີ່ປະຊາຊົນປູກສ່ວນຫຼາຍແມ່ນໝາກມ່ວງ, ໝາກພຸກ, ໝາກມີ້, ໝາກເງາະ, ໝາກລຳໄຍ ແລະອື່ນໆ.

ໂດຍ: ອຸ່ນເຮືອນ ໂພທິລັກ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์