ລັດຖະມົນຕີ ກວຕ ໂອ້ລົມຄະນະຜູ້ແທນຊາວໜຸ່ມແຂວງຫົວພັນ

 ກອງປະຊຸມສໍາມະນາກ່ຽວກັບວຽກງານວິທະຍາສາດ ແລະ ເຕັກໂນໂລຊີໃນຍຸກອຸດສາຫະກໍາ 4.0 ໃຫ້ແກ່ຄະນະຜູ້ແທນຊາວໜຸ່ມແຂວງຫົວພັນ ມີຂຶ້ນໃນວັນທີ 28 ມິ ຖຸນາຜ່ານມາ, ທີ່ນະຄອນຫຼວງວຽງຈັນ ໂດຍມີສະຫາຍ ບໍ່ວຽງຄໍາ ວົງດາລາເລຂາຄະນະພັກ, ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ (ກວຕ), ສະຫາຍ ວົງເພັດ ບຸນມະນີ ເລຂາຄະນະບໍລິຫານງານຊາວໜຸ່ມປະຊາຊົນປະຕິວັດລາວ, ສະຫາຍ ພຸດທະສັກ ວິຈິດຕຣາ ຮັກສາການເລຂາຄະນະບໍລິຫານງານຊາວໜຸ່ມປະຊາຊົນປະຕິວັດລາວ ກວຕ ພ້ອມດ້ວຍບັນດາສະຫາຍເລຂາ, ຮອງເລຂາໜ່ວຍຊາວໜຸ່ມຈາກສອງພາກສ່ວນເຂົ້າຮ່ວມ.

ກອງປະຊຸມດັ່ງກ່າວຈັດຂຶ້ນເພື່ອແລກປ່ຽນຖອດຖອນບົດຮຽນທາງດ້ານວຽກງານວິທະຍາສາດ ແລະເຕັກໂນໂລຊີໃຫ້ແກ່ຄະນະຜູ້ແທນຊາວໜຸ່ມແຂວງຫົວພັນໃຫ້ສາມາດເຂົ້າໃຈຢ່າງເລິກເຊິ່ງຄວາມໝາຍຄວາມສໍາຄັນຂອງວຽກງານວິທະຍາສາດແລະເຕັກໂນໂລຊີໂດຍສະເພາະແມ່ນໃນຍຸກຂອງການປະຕິວັດອຸດສາຫະກໍາຄັ້ງທີ 4 ຫຼືຍຸກ 4. 0 ຊຶ່ງເປັນຍຸກທີ່ມີການນໍາໃຊ້ເຕັກໂນໂລຊີທີ່ທັນສະໄໝທີ່ສຸດໃນປະຈຸບັນ. ຊຶ່ງຜູ້ເຂົ້າຮ່ວມກອງປະຊຸມໄດ້ຮັບຟັງກ່ຽວກັບເຕັກໂນໂລຊີຊີວະພາບທີ່ເປັນໜຶ່ງໃນສາມເສົາຄໍ້າ ໃນຍຸກ 4.0 ແລະຮັບຟັງການນໍາໃຊ້ ແລະພັດທະນາລະບົບເຕັກໂນໂລຊີດິຈິຕອລ ຢູ່ ສປປ ລາວ ແລະສາກົນ.

  ຈາກນັ້ນ ສະຫາຍ ບໍ່ວຽງຄໍາ ວົງດາລາ ໄດ້ຍົກໃຫ້ເຫັນເຖິງວິວັດທະນາການ ແລະ ການພັດທະນາການປະຕິວັດອຸດສາຫະກຳໃນແຕ່ລະໄລຍະຈົນມາເຖິງຍຸກການປະຕິ ວັດອຸດສາຫະກຳຄັ້ງທີ 4 ທີ່ມີຄວາມກ້າວໜ້າຂອງລະບົບເຕັກໂນໂລຊີທີ່ທັນສະໄໝ, ມີຄວາມວ່ອງໄວທາງດ້ານໄອທີ, ດ້ານວັດຖຸສາດ ແລະ ເຕັກໂນໂລຊີຊີວະພາບມີການກ້າວກະໂດດຂັ້ນລວມເຖິງຄວາມກ້າວໜ້າຂອງລະບົບເຕັກໂນໂລຊີດິຈິຕອລ, ປະຈຸບັນນີ້ປະເທດລາວແມ່ນກຳລັງກ້າວເຂົ້າສູ່ຍຸກແຫ່ງການປະຕິວັດອຸດສາຫະກຳຄັ້ງທີ 4, ຊຶ່ງການປະຕິວັດອຸດສາຫະກຳຄັ້ງນີ້ປະກອບມີສາມເສົາຄໍ້າໃຫຍ່ເຮັດໃຫ້ການປະຕິວັດອຸດສາຫະກຳມີການຂະຫຍາຍໂຕຢ່າງຕໍ່ເນື່ອງເຊັ່ນ: 1) ແມ່ນເສົາຄໍ້າທາງດ້ານເຕັກໂນໂລຊີຂໍ້ມູນຂ່າວສານ, ທາງດ້ານໄອທີຊຶ່ງລວມມີເຕັກໂນໂລຊີຂອງອິນເຕີເນັດແຫ່ງຊັບພະສິ່ງໝາຍຄວາມວ່າອິນເຕີເນັດຈະເຊື່ອມຕໍ່ກັບທຸກໆສິ່ງຢູ່ໃນໂລກ,ສັບພະສິ່ງຢູ່ໃນໂລກເຊື່ອມຕໍ່ກັນດ້ວຍລະບົບອິນເຕີເນັດ ແລະມີການຊື້ຂາຍຜ່ານອິນເຕີເນັດ; 2) ແມ່ນເສົາຄໍ້າທາງດ້ານຟິຊິກທາງດ້ານວັດຖຸສາດ, ຢູ່ໃນເສົາຄໍ້ານີ້ແມ່ນເພີ່ນໄດ້ພັດທະນາເລື່ອງລະບົບອັດຕະໂນມັດເຊັ່ນ: ໂດຣນບໍ່ມີຄົນຂັບ, ຍົນບໍ່ມີຄົນຂັບ, ລົດບໍ່ມີຄົນຂັບ, ຫຸ່ນຍົນໂຣບອດທີ່ເຮັດວຽກຢູ່ຕາມໂຮງຈັກໂຮງງານແທນຄົນ; 3) ແມ່ນເສົາຄໍ້າທາງດ້ານເຕັກໂນໂລຊີຊີວະພາບຊຶ່ງເຕັກໂນໂລຊີຊີວະພາບນີ້ມັນຈະເຮັດໃຫ້ຄົນເຮົາກ້າວໄປເຖິງເຕັກໂນໂລຊີຢູ່ໃນຂັ້ນລະດັບນ້ອຍທີ່ສຸດຈົນເຖິງຂັ້ນນາໂນເຕັກໂນໂລຊີສະນັ້ນ, ມັນຈະລົງເລິກໄປເຖິງຈຸລັງເຊັ່ນ: ໃນປະຈຸບັນນີ້ໂລກມະເຮັງບໍ່ສາມາດປິ່ນປົວໄດ້ແຕ່ໃນອະນາຄົດໂລກມະເຮັງຈະສາມາດປິ່ນປົວໄດ້ຢ່າງແນ່ນອນຍ້ອນຄວາມກ້າວໜ້າທາງດ້ານເຕັກໂນໂລຊີຊີວະພາບ.

   ສະຫາຍ ບໍ່ວຽງຄໍາ ວົງດາລາ ຍັງໄດ້ເນັ້ນໜັກໃຫ້ບັນດາຊາວໜຸ່ມທຸກສະຫາຍ ຈົ່ງພ້ອມກັນເອົາໃຈໃສ່ຮໍ່າຮຽນລະບົບກ້າວໜ້າທັນສະໄໝດັ່ງກ່າວເພື່ອນຳມາໃຊ້ເຂົ້າໃນການພັດທະນາວຽກງານຕ່າງໆໃຫ້ກາຍເປັນເຄື່ອງມື ແລະກຳລັງແຮງອັນສຳຄັນໃນການສ້າງສາ ແລະພັດທະນາປະເທດຊາດຂອງພວກເຮົາໃຫ້ນັບມື້ນັບເຂັ້ມແຂງໃຫ້ນັບມື້ນັບສີວິໄລຈະເລີນ ຮຸ່ງເຮືອງຂຶ້ນເລື້ອຍໆ ສາມາດທຽບທັນກັບປະເທດໃນພາກພື້ນ ແລະສາກົນໄດ້.

ຂຽນໂດຍ: ນໍ້າເໝີຍ  

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์