ສະຫຼຸບບັ້ນລົງຝຶກຫັດ ຂອງນັກສຶກສາໂຮງຮຽນ ປກສ

   ໃນວັນທີ  28  ທັນວາ  2018   ຜ່ານມາ  ທີ່ຫ້ອງປະຊຸມກອງບັນຊາການ ປກສ ແຂວງຫຼວງນ້ຳທາ ໄດ້ຈັດກອງປະຊຸມສະຫຼຸບບັ້ນລົງຝຶກຫັດຂອງນັກສຶກສາລຸ້ນທີ VII ໂຮງຮຽນ ປກສ ຊັ້ນກາງເລກ 1 ແຂວງຫຼວງພະບາງ ປະຈຳ 2 ເດືອນ, ໂດຍການເຂົ້າຮ່ວມຂອງທ່ານພັທນາງມະນີຈັນແກ້ວມະນີວົງຮອງຫົວໜ້າຫ້ອງຕຳຫຼວດ ປກສ ແຂວງຫຼວງນ້ຳທາ, ມີຄະ ນະຮັບຜິດຊອບ, ຄູ-ອາຈານ ພ້ອມດ້ວຍນັກສຶກສາເຂົ້າຮ່ວມ 10 ສະ ຫາຍ.

   ທ່ານພັຕແສງແກ້ວມະນີຈັນຄູ-ອານຈານຊີ້ນຳນັກສຶກສາລົງ ຝຶກຫັດໄດ້ຂຶ້ນຜ່ານບົດສະຫຼຸບການລົງຝຶກຫັດຂອງນັກສຶກສາລຸ້ນທີ VII ໂຮງຮຽນ ປກສ ຊັ້ນກາງເລກ 1 ແຂວງຫຼວງພະບາງໃນໄລຍະ 2 ເດືອນ. ຜ່ານການລົງຝຶກຫັດຄັ້ງນີ້, ປະກອບມີ 2  ຂະແໜງຄື: ຂະແໜງສືບສວນ-ສອບສວນແລະຂະແໜ່ງສືບຂ່າວອາຍາ,ການເຄື່ອນໄຫວວຽກງານວິຊາສະເພາະຕົວຈິງນັກສຶກສາແຕ່ລະສະຫາຍແມ່ນມີຄວາມສາມັກຄີເອກະພາບ. ພ້ອມນັ້ນກໍ່ມີຄວາມສາມັກຄີກັບກົມກອງທ້ອງຖີ່ນຂອງຕົສັງກັດຢູ່ຊຶ່ງສະແດງອອກຄື: ມີຄວາມເຄົາລົບນັບຖືອຳນາດການປົກຄອງບ້ານ, ເຄົາລົບນັບຖືເຊີ່ງກັນແລະກັນແລະມີຄວາມຈິ່ງໃຈຕຳນິກໍ່ສ້າງຊ່ວຍເຫຼືອກັນ, ນອກນັ້ນ, ຍັງມີຄວາມສາມັກຄີກັບພະນັກງານ-ນັກຮົບພາຍໃນກົມກອງໄດ້ເປັນຢ່າງແໜ້ນແຟ້ນ, ພ້ອມກັນນີ້ແຕ່ລະສະຫາຍໄດ້ເອົາໃຈໃສ່ປະຕິບັດໜ້າທີ່ວຽກງານວິຊາສະເພາະທີ່ໄດ້ຮັບການມອບໝາຍຈາກຂັ້ນເທີງດ້ວຍຄວາມຮັບຜິດຊອບສູງ, ຮູ້ໝູນໃຊ້ບົດຮຽນແລະມີຫົວຄິດປະດິດສ້າງ, ແບບແຜນວິທີເຮັດວຽກ, ມີການຊອກຮູ້ນຳພະນັກງານຜູ້ທີ່ມີປະສົບການເພື່ອນຳເອົາທິດສະດີທີ່ໄດ້ຮຽນມາທຽບໃສ່ພຶດຕິກຳຕົວຈິ່ງໃຫ້ຖືກຕ້ອງແລະປະຕິບັດຕາມຫຼັກການວິຊາສະເພາະແລະອີງໃສ່ກັບສະພາບຂອງສັງຄົມໃນຂົງເຂດພື້ນຖານໃຫ້ເໝາະສົມ.

   ໂອກາດດັ່ງກ່າວທ່ານພັທນາງມະນີຈັນແກ້ວມະນີວົງກໍ່ໄດ້ກ່າວສະແດງຄຳຍ້ອງຍໍຊົມເຊີຍຕໍ່ກັບຄູ-ອາຈານນັກສຶກສາທີ່ສໍາເລັດການລົງຝຶກຫັດແລະວຽກງານຫຼາຍດ້ານ. ຍັງໄດ້ຮຽກຮ້ອງໃຫ້ແຕ່ລະສະຫາຍສືບຕໍ່ຄົ້ນຄວ້າ, ຊອກຮູ້ຮໍ່າຮຽນແລະນຳເອົາບັນດາເນື້ອໃນ, ຄວາມຮູ້ພື້ນຖານດັ່ງກ່າວ. ເພື່ອໄປປະກອບໃສ່ໃນການປ້ອງກັນບົດສອບເສັງແລະປະຕິບັດໜ້າທີ່ວຽກງານຕົວຈິງ.

แชร์