ລາວ-ຈີນກຳນົດ 14 ໂຄງການຂະແໜງຂົວທາງເປັນຍຸດການຮ່ວມມື

    ລັດຖະບານລາວ ແລະ ຈີນ ໄດ້ກໍານົດເອົາ 14 ໂຄງການເປັນຍຸດທະສາດການຮ່ວມມືຂອງສອງປະເທດໃນຂະແໜງຂົວ-ທາງ ເພື່ອສ້າງລະບົບຄົມມະນາຄົມຂົນສົ່ງເສື່ອມໂຍງ ແລະເສື່ອມຈອດທັງສອງປະເທດໃຫ້ມີຄວາມສະດວກປອດໄພ, ແນໃສ່ຊຸກຍູ້ພັດທະນາເສດຖະກິດ-ສັງຄົມ ແລະສາຍພົວພັນມິດຕະພາບລະຫວ່າງສອງຝ່າຍ.

  ທ່ານ ໄຊຍະສອນ ຊົງຢົງຢາ ຮອງຫົວໜ້າພະແນກວິສະວະກໍາທາງຫຼວງ ແລະ ທາງລົດໄຟລາຍງານຕໍ່ກອງປະຊຸມແລກປ່ຽນເຕັກນິກວິຊາການດ້ານການພັດທະນາກໍ່ສ້າງຂົວ-ທາງໃຫ້ຮູ້ວ່າ: ເພື່ອສ້າງລະບົບຄົມມະນາຄົມຂົນສົ່ງເສື່ອມໂຍງ ແລະ ເຊື່ອມຈອດທັງສອງປະເທດລາວ-ຈີນ ໃຫ້ມີຄວາມສະດວກປອດໄພ, ທັງແນໃສ່ຊຸກຍູ້ພັດທະນາເສດຖະກິດ-ສັງຄົມ ແລະສາຍພົວພັນມິດຕະພາບລະຫວ່າງສອງຝ່າຍຕາມການຕົກລົງຂອງສອງລັດຖະບານ ລາວ-ຈີນ ແມ່ນມີຈຸດສຸມຈັດຕັ້ງປະຕິບັດໂຄງ ການກໍ່ສ້າງ, ປັບປຸງ ແລະຍົກລະດັບທາງດ້ານເສື່ອມຈອດລະຫວ່າງສອງປະເທດໃຫ້ມີມາດຕະຖານທາງອາຊຽນ ຫຼື ຢ່າງໜ້ອຍໃຫ້ໄດ້ມາດຕະຖານທາງຊັ້ນ 3.

  ຈາກແຜນການຮ່ວມມືລະຫວ່າງສອງປະທດໄດ້ກໍານົດ 14 ໂຄງການເປັນຍຸດທະສາດການຮ່ວມມືລາວ-ຈີນ ໃນຂະແໜງຂົວ-ທາງ ໄລຍະ10 ປີ (2016-2025), ຕາມບັນຊີເສັ້ນທາງທີ່ສອງຝ່າຍໄດ້ເປັນເອກະພາບກັນໃນນັ້ນ: 1) ແມ່ນໂຄງການຊ່ວຍເຫຼືອກໍ່ສ້າງເສັ້ນທາງບໍລິເວນຈຸດຄົບກັນຂອງຊາຍແດນ 3 ປະເທດລາວ-ຈີນ-ມຽ ນມາລຽບແມ່ນໍ້າຂອງຕອນເໜືອຄວາມຍາວ 238 ກິໂລ ແມັດ; 2) ໂຄງການທາງດ່ວນແຕ່ນະຄອນຫຼວງວຽງຈັນ-ບໍ່ເຕັນ (ຊາຍແດນລາວ-ຈີນ); 3) ໂຄງການຍົກລະດັບການກໍ່ສ້າງເລກທີ 2w ແຕ່ປາກແບງ-ອຸດົມໄຊ-ເມືອງຂວາ; 4) ໂຄງການປັບປຸງເສັ້ນທາງເລກ 13 ເໜືອແຕ່ປາກມອງ-ຫຼວງພະບາງຄວາມຍາວ 109 ກິໂລ ແມັດ; 5) ໂຄງການປັບປຸງທາງຫຼວງແຫ່ງຊາດເລກ 1C ແຕ່ປາກມອງ-ພູເລົາຄວາມຍາວ 251 ກິໂລແມັດ; 6) ໂຄງການປັບປຸງທາງຫຼວງແຫ່ງເລກ 13 ໃຕ້ແຕ່ຫຼວງພະບາງຫາຈໍາປາສັກຄວາມຍາວ 1.160  ກິໂລແມັດ; 7) ໂຄງການກໍ່ສ້າງເສັ້ນທາງເລກ 5 ແຕ່ນາມອນ-ລາດຫ່ວງຄວາມຍາວ 147 ກິໂລແມັດ.

  ສ່ວນໂຄງການທີ 8) ແມ່ນໂຄງການກໍ່ສ້າງເສັ້ນທາງແຕ່ບ້ານທ່າສະຫວ່າງ-ເວີນຄໍາ-ແສນກິນ-ໂພນມ່ວງ; 9) ໂຄງການກໍ່ສ້າງເສັ້ນທາງແຕ່ດອນແດງ-ໜອງທາເໜື ອ-ບ້ານບໍ່ນາງົວ; 10) ໂຄງການຍົກລະດັບກໍ່ສ້າງເສັ້ນທາງແຕ່ສອງຄອນ-ລະຫານໍ້າ-ທ່າປະຊຸມ ແລະເລກ ທີ 10 ແຕ່ແຍກທາງ 13 ໃຕ້ ເຊໂນຫາເມືອງວິລະບູລີ; 11) ໂຄງການກໍ່ສ້າງເສັ້ນທາງເຊື່ອມຈອດລະຫວ່າງ ສປປ ລາວ ແລະກໍາປູເຈຍ ແລະກໍ່ສ້າງຂົວເຊື່ອມຕໍ່ໃສ່ເກາະດອນໃຫຍ່ຕາມລໍາແມ່ນໍ້າຂອງຢູ່ແຂວງຈໍາປາສັກ; 12) ໂຄງການກໍ່ສ້າງ ແລະຂະຫຍາຍໂຄງລ່າງພື້ນຖານຂອງແຂວງອັດຕະປື; 13) ໂຄງການຈັດຊື້ຂົວເບຕົງທົ່ວປະເທດ; 14 ໂຄງການກໍ່ສ້າງທາງທ່າປາງທອງ-ຕຸ້ມລານຄວາມຍາວ 88,2 ກິໂລແມັດ.

  ສະເພາະໂຄງການທາງດ່ວນແຕ່ນະຄອນຫຼວງວຽງຈັນ-ບໍ່ເຕັນ (ຊາຍແດນລາວ-ຈີນ) ມີຄວາມຍາວທັງໝົດ 450 ກິໂລແມັດແບ່ງອອກເປັນ 4 ຕອນຄື: ວຽງຈັນ-ວັງວຽງຄວາມຍາວ 109,1 ກິໂລແມັດ, ວັງວຽງ-ຫຼວງພະບາງຄວາມຍາວ 145 ກິໂລແມັດ, ຫຼວງພະບາງ-ອຸດົມໄຊຄວາມຍາວ 120 ກິ ໂລແມັດ, ອຸດົມໄຊ-ບໍ່ເຕັນຄວາມຍາວ 76 ກິໂລແມັດ ຊຶ່ງປະຈຸບັນແມ່ນໄດ້ເຊັນສັນຍາຕອນທີ 1 ວຽງຈັນ-ວັງວຽງ ມີມູນຄ່າກໍ່ສ້າງ1,3 ຕື້ໂດລາ, ໄລ ຍະກໍ່ສ້າງ 3 ປີ ແລະໄລຍະສໍາປະທານ 50 ປີ, ສ່ວນ 3 ຕອນທາງທີ່ຍັງເຫຼືອແມ່ນຈະສໍາເລັດການສຶກສາສໍາຫຼວດພາຍໃນປີ2019 ນີ້.

ຂຽນໂດຍ: ກິ່ງລັດຕະນະ  

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์