ສຶກສາອຸດົມໄຊ ຕີລາຄາການປະຕິບັດວຽກ 3 ສ້າງ

ວັນທີ 1 ກໍລະກົດ ຜ່ານມາພະແນກສຶກສາທິການແລະກີລາແຂວງອຸດົມໄຊໄດ້ຈັດກອງປະຊຸມ ຕີລາຄາຖອດຖອນບົດຮຽນກ່ຽວກັບການຈັດຕັ້ງປະຕິບັດວຽກງານ 3 ສ້າງໄລຍະປະຈຳໄຕມາດທີ I ຂອງຂະແໜງການສຶກສາ ໂດຍ ການເປັນປະທານຂອງທ່ານ ຄຳ ພວງ ບຸນມີໄຊຄະນະປະຈຳພັກກະຊສຶກສາທິການ ແລະກີລາ,ທ່ານ ສົມດີ ສີລາທອດຫົວໜ້າພະແນກສຶກສາທິການ ແລະກີລາ ແຂວງພ້ອມດ້ວຍຄະນະແລະທິມງານພະນັກງານລົງກໍ່ສ້າງຮາກ ຖານການເມືອງ 3ສ້າງທີ່ປະຈຳຢູ່ເມືອງງາ, ເມືອງຮຸນ, ເມືອງປາກ ແບງ ແລະພະນັກງານວິຊາການທີ່ກ່ຽວຂ້ອງເຂົ້າຮ່ວມ.

ກອງປະຊຸມຄັ້ງນີ້ໄດ້ສະຫຼຸບຕີລາຄາຖອດຖອນບົດຮຽນກ່ຽວກັບການຈັດຕັ້ງປະຕິບັດວຽກງານ3 ສ້າງ ໄລຍະປະຈຳໄຕມາດທີ I ນອກນັ້ນທິມງານລົງກໍ່ສ້າງຮາກຖານການເມືອງ 3 ສ້າງ ກໍໄດ້ປະ ກອບຄຳເຫັນແລກປ່ຽນບົດຮຽນ ກ່ຽວກັບບັນຫາທີ່ພົບ,ສິ່ງທ້າທາຍ,ຜົນງານໃນການລົງກໍ່ສ້າງຮາກຖານ,ຊອກວິທີທາງການແກ້ ໄຂເພື່ອແນໃສ່ເຮັດໃຫ້ການຈັດຕັ້ງ ປະຕິບັດວຽກງານ 3 ສ້າງ ໃນຕໍ່ໜ້າບັນລຸຕາມຄາດໝາຍທີ່ວາງ ໄວ້.

ໃນໂອກາດນີ້ທ່ານ ຄຳພວງບຸນມີໄຊ ໄດ້ກ່າວວ່າ: ການປະຕິ ບັດຕາມທິດນຳຍຸດທະສາດ “ສ້າງແຂວງເປັນຫົວໜ່ວຍຍຸດທະສາດ,ສ້າງເມືອງເປັນຫົວໜ່ວຍເຂັ້ມແຂງ ຮອບດ້ານແລະສ້າງບ້ານເປັນຫົວໜ່ວຍພັດທະນາ “ໃຫ້ເປັນຈິງເທື່ອລະກ້າວ,ສາມສ້າງແມ່ນການປະຕິວັດອັນເລິກເຊິ່ງເຖິງຖອງ;ເສີມຂະຫຍາຍສິດເປັນເຈົ້າໃຫ້ແກ່ທ້ອງຖິ່ນຮາກຖານ;ຊຸກຍູ້ການພັດທະ ນາເຂົ້າສູ່ບາດລ້ຽວໃໝ່ແລະແມ່ນການສ້າງບາດກ້າວບຸກທະລຸໃນ ພາກຕົວຈິງ.

ວຽກງານ 3 ສ້າງແມ່ນວຽກ ຍາວນານ, ມີຄວາມລະອຽດອ່ອນ ສະນັ້ນຕ້ອງໄດ້ເປັນເຈົ້າການໃນ ການຈັດຕັ້ງຜັນຂະຫຍາຍບັນດານິຕິກຳຕ່າງໆໃຫ້ດຳເນີນໄປຢ່າງ ເປັນລະບົບ; ເພີ່ມທະວີການຊີ້ນຳຂອງແຕ່ລະຂັ້ນຕໍ່ວຽກງານສາມສ້າງໂດຍສະເພາະແມ່ນການສ້າງ ໂຮງຮຽນພັດທະນາໃຫ້ສອດຄ່ອງກັບຈຸດພິເສດ ແລະທ່າແຮງຂອງ ແຕ່ລະບ້ານ,ຮູ້ເສີມຂະຫຍາຍກຳ ລັງແຮງຂອງບັນດາພາກສ່ວນ ເສດຖະກິດ ແລະມູນເຊື້ອຂອງປະຊາຊົນບັນດາເຜົ່າ,ບັນດາຊັ້ນຄົນ ໃນແຕ່ລະບ້ານໃຫ້ມີສ່ວນຮ່ວມສະນັ້ນຄະນະພັກ ແລະອົງການປົກຄອງທ້ອງຖິ່ນທຸກຂັ້ນ,ທຸກຂະແໜງ ການຕ້ອງເຊື່ອມຊຶມ ແລະເປັນເຈົ້າການຈັດຕັ້ງປະຕິບັດໃຫ້ບັນລຸຜົນເປັນຈິງ.

ພາບ ແລະຂາ່ວຈາກ: ໜັງສືພິມເສດຖະກິດ-ສັງຄົມ

แชร์