ອາເມລິກາຂື້ນພາສີສີນຄ້ານາໍເຂົ້າຈາກເອີຣົບ 4 ຕື້ ໂດລາ

ຜູ້ແທນການຄ້າຂອງອາເມລິກາປະກາດຂຶ້ນພາສີສິນຄ້ານໍາເຂົ້າຈາກສະຫະພາບເອີຣົບມູນຄ່າ 4 ຕື້ໂດລາສະຫະລັດຄວບຄຸມສິນຄ້າເຖິງ 89 ຊະນິດໃນວັນທີ 1 ກໍລະກົດນີ້ເປັນຕົ້ນໄປ.

ຕາມຂ່າວຕ່າງປະເທດລາຍງານວ່າອາເມລິກາປະກາດຂຶ້ນພາສີສິນຄ້ານໍາເຂົ້າຈາກສະຫະພາບເອີຣົບມູນຄ່າ 4 ຕື້ໂດລາສະຫະລັດຄວບຄຸມສິນຄ້າເຖິງ 89 ຊະນິດເຊັ່ນ:ຊີ້ນ,ຊີສ,ພາສຕ້າ,ໝາກໄມ້, ກາເຟ ແລະວິດສະກີໃນວັນທີ 1 ກໍລະກົດນີ້ເປັນຕົ້ນໄປ.ໂດຍຜູ້ນໍາອາເມລິກາຍັງຂູ່ວ່າຈະຂຶ້ນພາສີລົດນໍາເຂົ້າຈາກສະຫະພາບເອີຣົບເຖິງ 25% ຊຶ່ງຈະ ສົ່ງຜົນກະທົບໂດຍກົງຕໍ່ອຸດສາຫະກຳລົດລາຍໃຫຍ່ຂອງເຢຍລະມັນ ແລະ ຝຣັ່ງ.ຊຶ່ງການປະກາດຂຶ້ນພາສີສິນຄ້ານໍາເຂົ້າຈາກເອີຣົບຂອງອາເມລິກາມີຂຶ້ນຫຼັງຈາກທີ່ອາເມລິກາ ແລະ ສປ ຈີນກັບມາເຈລະຈາທາງການຄ້າກັນອີກເທື່ອໜຶ່ງ ແລະທ່ານ ໂດນັລ ທຣຳປະທານາທິບໍດີຂອງອາເມລິກາປະກາດວ່າຈະຍັງບໍ່ຂຶ້ນພາສີສິນຄ້ານໍາເຂົ້າຈາກຈີນມູນຄ່າ 300 ຕື້ໂດລາ.

 ຢ່າງໃດກໍຕາມຄວາມສຳພັນທາງການຄ້າລະຫວ່າງສອງຝ່າຍມີມູນຄ່າສູງເຖິງ 1ພັນຕື້ໂດລາຕໍ່ປີຊຶ່ງເອີຣົບມີອັດຕາສ່ວນສົ່ງອອກສິນຄ້າໄປຍັງອາເມລິກາຫຼາຍທີ່ສຸດເມື່ອທຽບກັບພື້ນທີ່ອື່ນໆຂອງໂລກ.

ພາບ ເເລະຂາ່ວຈາກ: ໜັງສືພິມເສດຖະກິດ-ສັງຄົມ

• 05/07/2019