ຕຳແລ້ວໜີເດືອນດຽວ 3 ລາຍຈັບໄດ້ 1

  ໃນເດືອນມິຖຸນາຜ່ານມາ, ອຸບັດເຫດທີ່ເກີດຂຶ້ນຢູ່ພາຍໃນນະຄອນຫຼວງວຽງຈັນ ມີທັງໝົດ 525 ຄັ້ງ, ສະເພາະກໍລະນີຕຳແລ້ວໜີ ອັນພາໃຫ້ຜູ້ອື່ນເສຍຊີວິດມີ 3 ລາຍ, ໃນນັ້ນສາມາດຈັບໄດ້ແລ້ວ 1 ລາຍ ທີ່ເກີດເຫດຢູ່ບ້ານສົມສະຫວັນ ເມືອງໄຊທານີ, ໂດຍຜູ້ກໍ່ເຫດເປັນຄົນສັນຊາດຈີນທີ່ເຂົ້າມາເຮັດວຽກພຽງແຕ່ 3 ເດືອນ.

 ທ່ານ ພັທ ເພັງສະຫວັນ ທຳມາບູນ ຫົວໜ້າພະແນກຕຳຫຼວດຈະລາຈອນ ນະຄອນຫຼວງວຽງຈັນ ໃຫ້ຮູ້ວ່າ: ສະເພາະເດືອນມິຖຸນາຜ່ານມາ, ຢູ່ນະຄອນຫຼວງວຽງຈັນ ມີອຸບັດເຫດເກີດຂຶ້ນທັງໝົດ 525 ຄັ້ງ,ໃນນັ້ນພາຫະນະເປ່ເພ 334 ຄັນ, ເສຍຫາຍສົມຄວນ 955 ຄັນ ແລະ ໃຊ້ການບໍ່ໄດ້ມີ 9 ຄັນ, ຊຶ່ງເຮັດໃຫ້ມີຜູ້ບາດເຈັບເລັກ ນ້ອຍ 184 ຄົນ, ສົມຄວນ 439 ຄົນ, ສາຫັດ 128 ຄົນ ແລະເສຍຊີວິດ 89 ຄົນ, ໂດຍຮ້າຍແຮງກວ່ານັ້ນສຳລັບອຸບັດເຫດທີ່ເກີດຂຶ້ນຍັງມີກໍລະນີຕຳແລ້ວໜີອີກ 3 ລາຍກໍຄືຢູ່ເສັ້ນຕານມີໄຊ, ໄຊມຸງຄຸນ ທີ່ຍັງນຳບໍ່ທັນໄດ້ເທື່ອ ແລະ ຕົກມາຮອດວັນທີ 14 ມິຖຸນາ ໄດ້ເກີດອີກ 1 ກໍລະນີຕຳແລ້ວບໍ່ຈອດຢູ່ບ້ານສົມສະຫວັນ, ຊຶ່ງທາງເຈົ້າ ໜ້າທີ່ໄດ້ສົມທົບກັບພາກສ່ວນທີ່ກ່ຽວຂ້ອງເພື່ອຕິດຕາມຊອກຫາລົດທີ່ກໍ່ເຫດ ແລະຕົກມາຮອດວັນທີ18 ມິຖຸນາ ຈິ່ງຮູ້ວ່າລົດທີ່ກໍ່ເຫດເປັນລົດກະບະໄທຕັນສີຂາວ, ໝາ ຍເລກທະບຽນ ກດ 5442 (ປ້າຍຂາວທຸລະກິດ 100%) ແລະຮູ້ວ່າຜູ້ຂັບຊື່ ທ້າວ ຈາງຊິວຈິງ ອາຍຸ 25 ປີ, ສັນຊາດຈີນ, ອາຊີບພະນັກງານຢູ່ບໍລິສັດມິງຊາວເຄ້ບີ້ນ ຕັ້ງຢູ່ບ້ານພະຂາວ ເມືອງໄຊທານີ ນະຄອນຫຼວງວຽງຈັນ, ຜູ້ກ່ຽວໄດ້ເຂົ້າມາເຮັດວຽກຢູ່ນະຄອນຫຼວງວຽງຈັນໄດ້ພຽງ 3 ເດືອນ, ຊຶ່ງຜູ້ກ່ຽວໄດ້ຮັບສາລະພາບ ແລະປະ ຈຸບັນເຈົ້າໜ້າທີ່ໄດ້ກັກຕົວຜູ້ກໍ່ເຫດພ້ອມພະຫະນະ ໄວ້ຢູ່ຄຸກຄຸມຂັງຊົ່ວຄາວຫ້ອງຕຳຫຼວດ ປກສ ນະຄອນຫຼວງ.

 ທ່ານ ພັທ ເພັງສະຫວັນ ທຳມາບູນ ໃຫ້ຮູ້ອີກວ່າ: ໃນໄລຍະຜ່ານມາ, ກໍລະນີຕຳ ແລ້ວໜີ ຫຼື ຕຳແລ້ວບໍ່ຈອດນີ້, ທາງເຈົ້າໜ້າທີ່ແມ່ນໄດ້ເອົາໃຈໃສ່ຕິດຕາມ ແລະ ຊອກຫາຜູ້ກຳທຳຜິດເພື່ອມາດຳເນີນຄະດີຢ່າງຕໍ່ເນື່ອງໂດຍບໍ່ໄດ້ປ່ອຍປະຈັກກໍລະນີ ແລະ ໃນປະຈຸບັນທາງເຈົ້າໜ້າທີ່ກໍພວມເລັ່ງໃສ່ຕິດຕາມ, ສືບຫາອີກ 2 ກໍລະນີຢູ່ບ້ານຕາມີໄຊ ແລະໄຊມຸງຄຸນ ຕື່ມເພື່ອມາດຳເນີນຄະດີໃຫ້ໄວທີ່ສຸດ ແລະເຮັດໃຫ້ສັງຄົມມີຄວາມສະຫງົບສຸກ, ແຕ່ເຖິງຢ່າງໃດກໍຕາມຢາກຮຽກຮ້ອງມາຍັງພໍ່ແມ່ປະຊາຊົນທຸກທົ່ວໜ້າຈົ່ງຊ່ວຍເປັນຫູເປັນຕາຊ່ວຍກັນ, ຫາກພົບວ່າຜູ້ກໍ່ເຫດ ຫຼື ຜູ້ຕ້ອງສົງໄສນຳເອົາພາຫະນະໄປສ້ອມແປງຢູ່ຈຸດໃດ, ສູນໃດ, ຊຸກເຊື່ອງໄວ້ບ່ອນໃດແມ່ນໃຫ້ລາຍງານຫາເຈົ້າໜ້າທີ່ທັນທີເພື່ອບໍ່ໃຫ້ຜູ້ກະທໍາຜິດສ່ວຍໃຊ້ຊ່ອງວ່າງນີ້ໜີຄວາມຜິດທີ່ໄດ້ກະທຳໄປ, ອັນເປັນເຫດພາໃຫ້ຜູ້ອື່ນເສຍຊີວິດ ແລະຊັບສິນ.

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์