ຍົກລະດັບເພີ່ມສານອາຫານໃນລາວ

  ອົງການອາຫານໂລກແຫ່ງສະຫະປະຊາຊາດປະຈຳລາວໄດ້ຈັດກອງປະຊຸມວິຊາການກ່ຽວກັບການທົບທວນສະຖານະພາບໃນປະຈຸບັນຂອງການເພີ່ມສານອາຫານ ແລະສຸມໃສ່ຂັ້ນຕອນທຳອິດໃນການກຳນົດມາດຕະຖານສຳລັບການເພີ່ມສານອາຫານໃນປະເທດລາວພິທີໄດ້ຈັດຂຶ້ນວັນທີ 3-4 ກໍລະກົດ 2019 ທີ່ນະຄອນຫຼວງວຽງຈັນ ພາຍໃຕ້ເປັນປະທານຂອງທ່ານ ດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ, ທ່ານ ຮາກັນ ທອງກູລ ຮອງຜູ້ອຳນວຍການ ແລະຕາງໜ້າອົງການອາຫານໂລກແຫ່ງສະຫະປະຊາຊາດປະຈຳລາວບັນດາທ່ານຕາງໜ້າຈາກກະຊວງທີ່ກ່ຽວຂ້ອງ, ຄູ່ຮ່ວມພັດທະນາ, ອົງການຈັດຕັ້ງພາກລັດ ແລະເອກະຊົນເຂົ້າຮ່ວມ.

  ກອງປະຊຸມໄດ້ທົບທວນສະຖານະພາບເຖິງການເພີ່ມສານອາຫານ, ແຮ່ທາດ, ວິຕາມິນ ແລະທາດອາຫານໂດຍມີຈຸດປະສົງຫຼຸດຜ່ອນບັນຫາທີ່ກ່ຽວຂ້ອງກັບສຸຂະພາບທີ່ເກີດຈາກອາຫານທີ່ບໍ່ໄດ້ມາດຕະຖານ ຕາມການສຳຫຼວດລະດັບການຂາດສານອາຫານແບບຊໍາເຮື້ອປະເທດລາວແມ່ນໄດ້ຫຼຸດລົງຈາກ 44% ໃນປີ 2012 ມາເປັນ 33% ໃນປີ 2017ເຖິງຢ່າງໃດກໍ່ຕາມລາວຍັງເປັນປະເທດທີ່ມີອັດຕາສະເລ່ຍການຂາດສານອາຫານສູງທີ່ສຸດໃນພາກພື້ນອາຊຽນ,ການບໍລິໂພກທີ່ສານອາຫານທີ່ມີຄຸນ ນະພາບຍັງເປັນຄວາມທ້າທາຍຢ່າງຕໍ່ເນື່ອງ, ການຂາດສານອາຫານທີ່ມີທາດຈຸລິນຊີ ຫຼື ສິ່ງທີ່ເອີ້ນວ່າ“ຄວາມອຶດ ຫິວ ທີ່ເບິ່ງບໍ່ເຫັນ” ເປັນສິ່ງທ້າທາຍທີ່ສໍາຄັນໃນດ້ານການພັດທະນານອກນັ້ນຍັງໄດ້ສຳຫຼວດເຫັນເດັກນ້ອຍລາວອາຍຸຕໍ່າກວ່າ 5 ປີ ແລະແມ່ຍິງໄວຈະເລີນພັນມີອັດຕາໂລກເລືອດຈາງສູງ ແລະຂາດສານອາຫານສຳຮອງອື່ນໆເຊັ່ນ: ຂາດທາດແຄຊຽມ, ວິຕາມິນ B1, ວິຕາມິນ B12, ວິຕາມິນ B2, ວິຕາມິນ B3 ແລະວິຕາມິນ D.

  ໂອກາດດັ່ງກ່າວ ທ່ານ ດຣ ພູທອນ ເມືອງປາກ ໄດ້ກ່າວວ່າ: ຜ່ານມາລັດຖະບານໄດ້ຈັດຕັ້ງປະຕິບັດສຳເລັດຫຼາຍດ້ານໂດຍສະເພາະການສົ່ງເສີມການນຳໃຊ້ເກືອເສີມທາດໄອໂອດີນເພື່ອປ້ອງກັນພາວະການຂາດສານອາຫານໄອໂອດີນນອກນີ້ຍັງໄດ້ເພີ່ມສານອາຫານເຂົ້າໃນອາຫານຊະນິດອື່ນໆເຊັ່ນ: ເຂົ້າ, ນໍ້າມັນ, ອາຫານຈຳພວກເສັ້ນ, ຊ໋ອດປຸງແຕ່ງອາຫານ ແລະຜະລິດຕະພັນຈາກນົມແມ່ນຈະຕ້ອງໄດ້ຄຳນຶງເຖິງເຊັ່ນກັນສະນັ້ນພວກເຮົາຈິ່ງຕ້ອງການສະໜັບສະໜູນຈາກຜູ້ມີສ່ວນຮ່ວມທັງໝົດໃນການແກ້ໄຂບັນຫາທີ່ບໍ່ໄດ້ມາດຕະຖານກ່າວດັ່ງ ແລະກອງປະຊຸມຄັ້ງນີ້ແມ່ນເປັນບາດກ້າວໜຶ່ງທີ່ສຳຄັນເພາະເປັນຂັ້ນຕອນທຳອິດໃນການກຳນົດມາດຕະຖານການເພີ່ ມສານອາຫານໃນປະເທດລາວ ແລະ ເປັນການເພີ່ມບຸລິມະສິດທີ່ສໍາຄັນຂອງຍຸດທະສາດດ້ານໂພຊະນາການແຫ່ງຊາດຮອດປີ 2025 ແລະ ແຜນການປະຕິບັດງານ 2016-2020.

ຂຽນໂດຍ: ແພງຕາ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์