ສກຈຮ ຈຳປາສັກ ມອບອຸປະກອນຫ້ອງການໃຫ້ກອງພົນທີ 5

 ສະຖາບັນການເງິນຈຸລະພາກທີ່ຮັບເງິນຝາກຈໍາປາສັກ ຈໍາກັດ (ສກຈຮ) ໄດ້ປະກອບສ່ວນຢ່າງຕັ້ງໜ້າໃຫ້ແກ່ຂະແໜງການທີ່ຍັງເຫັນວ່າມີຄວາມຂາດເຂີນທາງດ້ານອຸ ປະກອນໄອທີຮັບໃຊ້ໃນຫ້ອງການເມື່ອຫຼ້າສຸດກໍ່ໄດ້ມອບຄອມພິວເຕີໂນດບຸກແລະເຄື່ອງປິນເຕີສີລວມມູນຄ່າ 7 ລ້ານກວ່າກີບ ໃຫ້ແກ່ພະແນກການເງິນກອງພົນທີ 5.

 ພິທີມອບເຄື່ອງຊ່ວຍເຫຼືອດັ່ງກ່າວໄດ້ມີຂຶ້ນໃນວັນທີ 3 ກໍລະກົດຜ່ານມາ, ທີ່ຫ້ອງປະຊຸມຂອງພະແນກການເງິນກອງພົນທີ5 ແຂວງຈໍາປາສັກ, ເປັນກຽດກ່າວມອບໂດຍທ່ານ ຈັນສະໝອນ ມີແສງໃສ ຮອງຫົວໜ້າພະແນກບໍລິຫານ ສກຈຮ ຈໍາປາສັກແລະເປັນກຽດກ່າວຮັບໂດຍ ທ່ານ ພັນໂທ ຄໍາສິງ ໄຊສຸລິວົງ ຫົວໜ້າພະແນກການເງິນກອງພົນທີ 5, ມີບັນດາທ່ານແຂກຜູ້ໃຫຍ່ພາຍໃນພະແນກ ແລະຈາກສະຖາບັນເຂົ້າຮ່ວມເປັນສັກຂີພິຍານ.

  ເຄື່ອງທີ່ນໍາມາມອບໃຫ້ໃນເທື່ອນີ້ປະກອບມີຄື: ຄອມພິວເຕີໂນດບຸກ 1 ເຄື່ອງ ແລະປິນເຕີສີ 1 ເຄື່ອງ ເພື່ອມອບໃຫ້ແກ່ພະແນກການດັ່ງກ່າວນໍາໃຊ້ເຂົ້າໃນວຽກງານປະຈໍາວັນໃຫ້ມີຄວາມສະດວກສະບາຍຂຶ້ນກວ່າເກົ່າລວມມູນຄ່າທັງໝົດ 7 ລ້ານກວ່າກີບ.

  ໃນພິທີດັ່ງກ່າວ ທ່ານ ພັນໂທ ຄໍາສິງ ໄຊສຸລິວົງ ໄດ້ກ່າວສະແດງຄວາມຂອບໃຈຕໍ່ທາງສະຖາບັນການເງິນທີ່ໄດ້ມີນໍາໃຈຊ່ວຍເຫຼືອອຸປະກອນດັ່ງກ່າວ, ຊຶ່ງມັນເປັນການປະກອບສ່ວນຢ່າງສໍາຄັນໃຫ້ກັບທາງພະແນກ, ໂດຍສະເພາະແມ່ນເພື່ອຮັບໃຊ້ໃຫ້ແກ່ວຽກງານວິຊາສະເພາະໃຫ້ມີຄວາມສະດວກສະບາຍຍິ່ງຂຶ້ນ ແລະເຊື່ອໝັ້ນວ່າທາງສອງພາກສ່ວນຈະໄດ້ສືບຕໍ່ໃຫ້ການຊ່ວຍເຫຼືອ ແລະ ຮ່ວມມືປຶກສາຫາລືກັນຫຼາຍຂຶ້ນ.

ຂຽນໂດຍ: ໂພທິຣາຊ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 04/07/2019