ເສດຖະກິດເມືອງລະມາມພັດທະນາດີຂື້ນຕໍ່ເນື່ອງ

  ດ້ວຍຈັງຫວະການເພີ່ມຂຶ້ນຂອງຂະແໜງກະສິກໍາ, ອຸດສາຫະກໍາ ແລະ ການບໍລິການນັບມື້ກວ້າງຂວາງເຮັດໃຫ້ 6 ເດືອນຜ່ານມາການພັດທະນາເສດຖະກິດ-ສັງຄົມ ຂອງເມືອງລະມາມແຂວງເຊກອງບັນລຸຜົນສຳເລັດ, ພ້ອມທັງມີຫຼາຍດ້ານທີ່ພົ້ນເດັ່ນໂດຍສະເພາະດ້ານເສດຖະກິດເຕີບໂຕ 6,19% ລວມຍອດຜະລິດຕະພັນພາຍໃນ ຫຼື GDP ບັນລຸ 308,57 ຕື້ກີບທຽບໃສ່ແຜນເທົ່າກັບ 66,18%.

  ທ່ານ ຄຳໄລ ປັນຍາຄູນ ຮອງເຈົ້າເມືອງໆລະມາມ,ຜູ້ຊີ້ນໍາຂົງເຂດເສດຖະກິດຂັ້ນເມືອງໃຫ້ຮູ້ວ່າ: ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໃນ 6 ເດືອນຜ່ານມາໂດຍລວມແລ້ວເມືອງລະມາມສາມາດຍາດໄດ້ຜົນສຳເລັດຫຼາຍດ້ານ ແລະບັນດາຄາດໝາຍຕົ້ນຕໍແມ່ນບັນລຸຕາມແຜນການ,ການຜະລິດເປັນສິນຄ້ານັບມື້ຂະຫຍາ ຍຕົວຢ່າງກວ້າງຂວາງ, ຂະແໜງອຸດສາຫະກໍາລວມທັງຂົງເຂດການບໍລິການໄດ້ຮັບການປັບປຸງ ແລະພັດທະນາດີຂຶ້ນເປັນກ້າວໆ ຊຶ່ງເຮັດໃຫ້ພື້ນຖານເສດຖະກິດນັບມື້ຂະຫຍາຍຕົວເພີ່ມຂຶ້ນໂດຍລວມຍອດຜະລິດຕະພັນພາຍໃນ ຫຼື GDP ບັນລຸໄດ້ 308,57 ຕື້ກີບ, ໃນນັ້ນຂະແໜງກະສິກຳເພີ່ມຂຶ້ນ 6,05% ກວມເອົາ 17,26% ຂະແໜງອຸດສາຫະກຳ 7,58% ກວມເອົາ 6,71% ແລະຂົງເຂດການບໍລິການເພີ່ມຂຶ້ນ 6% ກວມເອົາ 36,03%.

  ຂະນະທີ່ການເກັບລາຍຮັບເຂົ້າງົບປະມານສາມາດປະຕິບັດໄດ້ 35% ເທົ່າກັບ 1,58 ຕື້ກີບ ຊຶ່ງປະກອບມີລາຍຮັບຈາກສ່ວຍສາອາກອນ 1,14 ຕື້ ກວ່າກີບ, ຮອງມາການຄຸ້ມຄອງຊັບສິນຂອງລັດ 222 ລ້ານກວ່າກີບ, ຄ່າບໍລິການ 114 ລ້ານກວ່າກີບແລະລາຍຮັບຈາກພາສີທີ່ດິນ 99 ລ້ານກວ່າກີບ; ສ່ວນລາຍຈ່າຍປະຕິບັດໄດ້ 44% ເທົ່າ ກັບ 15,66 ຕື້ກວ່າກີບ.

  ສ່ວນການຈັດຕັ້ງປະຕິບັດວຽກງານການລົງທຶນ, ທ່ານຮອງເຈົ້າເມືອງລະບຸວ່າ: ໃນປີ 2019 ສະພາແຫ່ງຊາດກໍຄືສະພາປະຊາຊົນແຂວງອະນຸມັດໃຫ້ເມືອງລະມາມຈັດຕັ້ງປະຕິບັດໂຄງການລົງທຶນຂອງລັດທັງໝົດ 65 ໂຄງການມູນຄ່າ 116 ຕື້ກວ່າກີບ ໃນນັ້ນໂຄງການຊໍາລະໜີ້ 42 ໂຄງການມູນຄ່າ 88,8 ຕື້ກວ່າກີບ; ໂຄງການສືບຕໍ່ 14 ໂຄງການ ມູນຄ່າ 35,3 ຕື້ກວ່າກີບແລະໂຄງການສະເໜີໃໝ່ (ບ້ວງຟື້ນຟູໄພພິບັດປີ 2019) 9 ໂຄງການມູນຄ່າ 3,76 ຕື້ກວ່າກີບຊຶ່ງມາຮອດປະຈຸບັນການຈັດຕັ້ງປະຕິບັດໂດຍລວມສໍາເລັດແລ້ວ 90%.

  ສ່ວນ 6 ເດືອນທ້າຍປີ 2019 ເມືອງ ຈະສຸມໃສ່ການພັດທະນາເສດຖະກິດໃຫ້ນັບມື້ມີການຂະຫຍາຍຕົວເພີ່ມຂຶ້ນໂດຍສຸມໃສ່ຍູ້ແຮງຂະບວນການຜະລິດເປັນສິນຄ້າ ແລະການບໍລິການດ້ານຕ່າງໆ ໄປພ້ອມໆກັບການປັບປຸງ-ກໍ່ສ້າງພື້ນຖານໂຄງລ່າງເພື່ອອຳນວຍຄວາມສະດວກແກ່ການພັດທະນາ, ຂຸດຄົ້ນນຳໃຊ້ທ່າແຮງຂອງທ້ອງຖິ່ນ, ຍາດແຍ່ງດຶງດູດການລົງທຶນຈາກພາກສ່ວນຕ່າງໆໃນທົ່ວສັງຄົມເພື່ອພັດທະນາເມືອງໃນຂົງເຂດວຽກງານຕ່າງໆໃຫ້ມີການພັດທະນາກ້າວຂຶ້ນຢ່າງບໍ່ຢຸດຢັ້ງ, ທ່ານ ຄໍາໄລປັນຍາຄູນກ່າວ.

ຂຽນໂດຍ: ສັນຍາ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

 

แชร์