ຍທຂ ຮ່ວມກັບ ວີເຄ ແລກປ່ຽນເຕັກນິກກໍ່ສ້າງຂົວ-ທາງ

  ກອງປະຊຸມແລກປ່ຽນເຕັກນິກວິຊາການດ້ານການພັດທະນາການກໍ່ສ້າງຂົວ-ທາງ ໄດ້ຈັດຂຶ້ນໃນວັນທີ 3 ກໍລະກົດທີ່ຫໍປະຊຸມແຫ່ງຊາດໂດຍການຮ່ວມມືລະຫວ່າງກະ ຊວງໂຍທາທິການ ແລະຂົນສົ່ງ (ຍທຂ) ກັບກຸ່ມບໍລິສັດ ວີເຄ ຈໍາກັດ,  ພາຍໃຕ້ການເປັນປະທານຂອງທ່ານ ວຽງສະຫວັດ ສີພັນດອນ ຮອງລັດຖະມົນຕີກະຊວງ ຍທຂ, ມີທ່ານ ແພງ ດວງເງິນ ຫົວໜ້າກົມຂົວທາງ, ທ່ານນາງ ວຽງຄໍາ ທອງນາລີ ປະທານກຸ່ມບໍ ລິສັດ ວີເຄ ຈໍາກັດ, ມີກົມ,ສະຖາບັນ,ພະແນກການອ້ອມຂ້າງກະຊວງແລະຜູ້ຕາງໜ້າບໍລິສັດກໍ່ສ້າງຂົວ-ທາງ ແລະວິສາຫະກິດການລົງທຶນພາຍໃນ ແລະຕ່າງປະເທດເຂົ້າຮ່ວມ.  

  ທ່ານ ວຽງສະຫວັດ ສີພັນດອນ ກ່າວວ່າ: ການກໍ່ສ້າງພື້ນຖານໂຄງລ່າງແມ່ນວຽກງານຫຼັກຂອງຂະແໜງໂຍທາທິການແລະຂົນສົ່ງ, ປະຈຸບັນແມ່ນກໍາລັງສຸມໃສ່ ແລະສົ່ງເສີມໃຫ້ບັນດາອົງການຈັດຕັ້ງຕ່າງໆ ແລະ ພາກສ່ວນກ່ຽວຂ້ອງໄດ້ມີສ່ວນຮ່ວມໃນການອອກແບບ, ກໍ່ສ້າງ ແລະ ນໍາໃຊ້ເຕັກໂນໂລຊີໃໝ່ເຂົ້າໃນວຽກງານດັ່ງກ່າວໂດຍສະເພາະການເລືອກເຟັ້ນຄັດເລືອກວັດສະດຸກໍ່ສ້າງທີ່ມີຄຸນນະພາບສູງ ແລະນໍາໃຊ້ອຸປະກອນປະເພດຕ່າງໆທີ່ມີຄວາມທັນສະໄໝ, ໄດ້ມາດຕະຖານ, ປະຢັດ ແລະເປັນມິດຕໍ່ສິ່ງ ແວດລ້ອມ. ດັ່ງນັ້ນ ກະຊວງໂຍທາທິການ ແລະຂົນສົ່ງ ຈິ່ງຮ່ວມມືກັບກຸ່ມບໍລິສັດ ວີເຄຈໍາກັດ ຈັດກອງປະຊຸມແລກປ່ຽນ ເຕັກນິກວິຊາການດ້ານການພັດທະນາ ການກໍ່ສ້າງຂົວ-ທາງຂຶ້ນເພື່ອຖອດຖອນບົດຮຽນດ້ານການຄຸ້ມຄອງ ແລະການນໍາໃຊ້ເຕັກໂນໂລຊີການກໍ່ສ້າງຕ່າງໆ ໃຫ້ມີປະສິດທິຜົນສູງຈາກ ສປ ຈີນ ໂດຍສະເພາະການພັດທະນາການນໍາໃຊ້ເຕັກນິກທັນສະໄໃນການກໍ່ສ້າງພື້ນຖານໂຄງລ່າງ, ມາດຕະຖານການກໍ່ສ້າງເສັ້ນທາງ ແລະການສະໜອງວັດສະຖຸອຸປະກອນຕ່າງໆທີ່ມີຄຸນ ນະພາບ.

  ກອງປະຊຸມໄດ້ມີການແລກປ່ຽນບົດຮຽນລະຫວ່າງການນໍາໃຊ້ເຕັກນິກການກໍ່ສ້າງໃນປະເທດລາວ ແລະ ສປ ຈີນ ຊຶ່ງປະກອບມີ: ຍຸດທະສາດ ແລະ ແຜນພັດທະນາເສັ້ນທາງໃນ ສປປ ລາວ, ການຄຸ້ມຄອງການນໍາເຂົ້າພາຫານະ ແລະກົນຈັກໃນ ສປປ ລາວ, ເຕັກໂນໂລຊີກົນຈັກໜັກສໍາລັບການກໍ່ສ້າງ ແລະພັດທະນາເສັ້ນທາງໃນ ສປ ຈີນ, ແຜນສະໜອງອຸປະກອນ ແລະການແກ້ໄຂອຸປະກອນການກໍ່ສ້າງເສັ້ນທາງຂອງບໍລິສັດ ວີເຄ ແລະຫົວຂໍ້ອື່ນໆ ທີ່ຕິດພັນກັບວຽກງານການກໍ່ສ້າງໂຄງລ່າງພື້ນຖານ.

  ທັງນີ້ກໍເພື່ອແນໃສ່ການສົ່ງເສີມ, ການພັດທະນາສ້າງສາປະເທດຊາດໃຫ້ມີຄວາມສີວິໄລ ແລະຍົກສູງຄຸນນະພາບຊີວິດຂອງປະຊາຊົນດີຂຶ້ນໂດຍສະເພາະກໍ່ສ້າງ ແລະນໍາໃຊ້ເຕັກໂນໂລຊີທີ່ທັນສະໄໝເຂົ້າມາຊ່ວຍເພື່ອເຮັດໃຫ້ວຽກງານການກໍ່ສ້າງຂົວ-ທາງມີຄວາມສະດວກ, ວ່ອງໄວ, ປອດໄພ, ປະຢັດ, ມີຄຸນນະພາບສູງ ແລະນໍາໃຊ້ຍາວນານ.

  ກຸ່ມບໍລິສັດ ວີເຄ ໄດ້ມີການລົງທຶນ ແລະຈົດທະບຽນວິສາຫະກິດຢູ່ 3 ປະເພດຄື: ບໍລິສັດວີເຄການຄ້າຂາອອກ-ຂາເຂົ້າ ຈໍາກັດຜູ້ດຽວ, ໂຮງງານຜະລິດ ແລະ ປະກອບລົດວີເຄແອລເອັສ ແມນູ ແຟັກທຣີ ຈໍາກັດ ແລະບໍລິສັດ ວີເຄ ອິນເຕີ ເນຊັນແນວ ຈໍາກັດຜູ້ດຽວ.

ຂຽນໂດຍ: ກິ່ງລັດຕະນະ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 04/07/2019