ຖໍ້າເດັ້ງ ເມືອງກະລຶມ ແຂວງເຊກອງ

ຫຼາຍຄົນອາດຍັງບໍ່ທັນຮູ້ເທື່ອວ່າຢູ່ເມືອງກະລຶມແຂວງເຊກອງຂອງພວກເຮົາກໍ່ມີຖໍ້າທີ່ປະຊາຊົນເອີ້ນຖໍ້າແຫ່ງນີ້ວ່າຖໍ້າເດັ້ງຊຶ່ງຕັ້ງຢູ່ບ້ານຖໍ້າເດັ້ງ ເມືອງກະລຶມ  ຫ່າງ ຈາກເທສະບານແຂວງ 79 ກິໂລແມັດ ແລະຈາກເທສະບານເມືອງກະລຶມ 16 ກິໂລແມັດເປັນຖໍ້າທີ່ມີຄວາມສວຍງາມ ແລະມີຄວາມເປັນທຳມະຊາດ, ມີທິວທັດທຳມະຊາດທີ່ອຸດົມສົມບູນທີ່ໜ້າໄປສໍາພັດ.

ຕາມການເລົ່າຂານກັນມາແຕ່ກ່ອນແມ່ນມີຊາຍຊົນເຜົ່າຄົນໜ່ຶງຫຼົງມັກສາວລາວລຸ່ມຄົນໜຶ່ງຊຶ່ງນາງເປັນລູກຄົນຮັ່ງມີ.ໃນສະໄໝນັ້ນວັນໜຶ່ງຊາຍຄົນນັ້ນ  ຈຶ່ງໄດ້ວາງ ແຜນໄປລັກເອົາລູກສາວຄົນນັ້ນມາເຊື່ອງໄວ້ໃນເບື້ອງຕົ້ນໄດ້ຈັບເອົາໄປເຊື່ອງໄວ້ຢູ່ພູກະແຕແຂວງສາລະວັນ,ແຕ່ນາງກໍ່ຍັງແນມເຫັນບ້ານຕົນເອງ ຈາກນັ້ນກໍ່ເລີຍພານາງ ຍ້າຍມາຢູ່ພູລະກຸບແຂວງເຊກອງ, ແຕ່ນາງກໍ່ຍັງແນມເຫັນບ້ານ ແລະ ຄິດຮອດບ້ານຢູ່ຄືເກົ່າໃນທີ່ສຸດຜູ້ ຊາຍຄົນນັ້ນກໍ່ໄດ້ນໍາເອົານາງມາເຊື່ອງໄວ້ທີ່ພູລະກາຍແຕ່ຍ້ອນຄວາມຄິດຮອດແລະຄິດເຖິງນາງກໍ່ໄດ້ປີນຂຶ້ນໄປເທິງຈອມພູດັ່ງກ່າວ, ນາງໄດ້ໄຫ້ນໍ້າຕາໄຫຼລົງໃສ່ຈອມພູດັ່ງກ່າວຈົນກາຍເປັນຮ່ອງຫ້ວຍສອງສາຍ ຄື:ຫ້ວຍນໍ້າຕາຂ້າງຊ້າຍເອີ້ນວ່າ: “ນາງລາວ”,ຫ້ວຍນໍ້າຕາເບື້ອງຂວາຕົກລົງແຕ່ຈອມພູເອີ້ນວ່າ:ຫ້ວຍຖໍ້ານໍ້າລອດ”.ສອງຫ້ວຍໄດ້ໄຫຼຕົກລົງມາໃສ່ຫ້ວຍໄອ່.ສ່ວນໂຕຂອງນາງລາວ ເລີຍກາຍເປັນຫີນຮູບຄົນຕັ້ງຢູ່ຈອມພູ.ດັ່ງນັ້ນ,ຈິ່ງໄດ້ເອີ້ນພູນີ້ວ່າ“ພູຖໍ້າເດັ້ງນາງ ລາວ”.

ແຫຼ່ງທ່ອງທ່ຽວຖໍ້າເດັ້ງ ເມືອງ ກະລຶມແຂວງເຊກອງ ເປັນສະ ຖານທີ່ໜຶ່ງທີ່ໜ້າທ່ຽວຊົມຊຶ່ງມີຈຸດຊົມວິວ,ທິວທັດທາງທຳມະຊາດທີ່ສວຍງາມເໝາະແກ່ການທ່ຽວຊົມພັກຜ່ອນ,ຍ່ອນອາລົມທີ່ສຸດ,ທັງ ເປັນສະຖານທີ່ທ່ອງທ່ຽວທີ່ໜ້າສຶກສາຫຼາຍເນື່ອງຈາກມີປະຫວັດ ແລະຄວາມເປັນມາທີ່ກ່ຽວຂ້ອງກັບພູຖໍເດັ້ງນາງລາວ ທັງເປັນແຫຼ່ງທ່ອງທ່ຽວຕິດກັບທໍາມະຊາດສາມາດຊົມ ວິວທິວທັດໄດ້.

ພາບ ແລະຂາ່ວຈາກ: ໜັງສືພິມເສດຖະກິດ-ສັງຄົມ

• 04/07/2019