ທຸກພາກສ່ວນຈົ່ງປົກປັກຮັກສາ ສັດນ້ຳ-ສັດປ່າ

   ເພື່ອເປັນການສະກັດກັ້ນການຄ້າຂາຍສັດນໍ້າ ແລະສັດປ່າປະເພດຫວງຫ້າມ, ທັງເປັນການຊຸກຍູ້, ສົ່ງເສີມ ແລະ ປູກຈິດສຳນຶກກ່ຽວກັບການອະນຸລັກ, ປົກປັກຮັກສາ ແລະ ພັດທະນາສັດນໍ້າ ແລະ ສັດປ່າໃຫ້ເປັນຂະບວນຂອງທົ່ວປວງຊົນໃນວັນປ່ອຍປາ ແລະອະນຸລັກສັດນໍ້າສັດປ່າແຫ່ງຊາດ.

  ວັນທີ 13 ກໍລະກົດທີ່ຈະມາເຖິງນີ້, ກະຊວງກະສິກຳ ແລະປ່າໄມ້ ໄດ້ອອກຄໍາສັ່ງເລກທີ 2883/ກປ, ລົງວັນທີ 19 ມິຖຸນາ 2019 ໃຫ້ທຸກພາກສ່ວນຮ່ວມກັນສ້າງຂະບວນການໂດຍສະເພາະແມ່ນຫົວໜ້າຫ້ອງການ, ກົມ, ຕະຫຼອດຮອດບັນດາພະແນກກະສິກຳ ແລະປ່າໄມ້ແຂວງ, ນະຄອນຫຼວງຕ້ອງເປັນເຈົ້າການ.

  ໃນຄຳສັ່ງດັ່ງກ່າວໄດ້ເຊັນໂດຍ ທ່ານ ລຽນ ທິແກ້ວ ລັດຖະມົນຕີກະຊວງກະສິກຳ ແລະປ່າໄມ້ (ກປ) ໄດ້ລະບຸລະອຽດວ່າ: ໃນຊຸມປີຜ່ານມາ, ການຈັດຕັ້ງແຕ່ລະຂັ້ນໄດ້ເປັນເຈົ້າການຈັດກິດຈະກຳປ່ອຍປາລົງໃສ່ອ່າງເກັບນໍ້າ, ໜອງ ແລະສາຍນໍ້າທຳມະຊາດ, ແຕ່ງຕັ້ງຄະນະກຳມະການຄຸ້ມຄອງການປະມົງປະຈຳພື້ນທີ່, ກຳນົດເຂດວັງສະຫງວນໄປຄວບຄູ່ກັບການອອກລະບຽບການຄຸ້ມຄອງ, ວາງມາດຕະການຫ້າມລ່າສັດປ່າ, ຫາປາໃນລະດູວາງໄຂ່ ຫຼື ການຂະຫຍາຍພັນຂອງສັດນໍ້າ ແລະສັດປ່າຕິດພັນກັບການສະກັດກັ້ນການຄ້າຂາຍສັດນໍ້າ ແລະສັດປ່າປະເພດຫວງຫ້າມອື່ນໆ ອັນໄດ້ປະກອບສ່ວນເຂົາໃນການອະນຸລັກ, ປົກປັກຮັກສາ ແລະນຳໃຊ້ສັດນໍ້າ ແລະສັດປ່າຕາມທິດຍືນຍົງ, ແຕ່ກໍຍັງມີປະກົດການຫຍໍ້ທໍ້ເກີດຂຶ້ນຢ່າງແຜ່ລາມເປັນຕົ້ນໃຊ້ອາວຸດ ແລະເຄື່ອງມືແບບດັບສູນເຂົ້າໃນການລ່າເນື້ອ, ຫາປາ, ຄ້າຂາຍສັດນໍ້າ ແລະ ສັດປ່າປະ ເພດຫວງຫ້າມ, ປະເພດຄຸ້ມຄອງ.

  ດັ່ງນັ້ນເພື່ອເປັນການແກ້ໄຂປະກົດການຫຍໍ້ທໍ້ດັ່ງກ່າວ, ທັງເປັນການຊຸກຍູ້, ສົ່ງເສີມ ແລະປູກຈິດສຳນຶກກ່ຽວກັບການອະນຸລັກ, ປົກປັກຮັກສາ ແລະພັດທະນາສັດນໍ້າສັດປ່າໃຫ້ເປັນຂະບວນຂອງທົ່ວປວງຊົນ, ກະຊວງຈຶ່ງໄດ້ອອກຄຳສັ່ງສະບັບນີ້ໃຫ້ບັນດາພະແນກກະສິກຳ ແລະປ່າໄມ້ແຂວງ, ນະຄອນຫຼວງເປັນເຈົ້າການສົມທົບກັບພາກ ສ່ວນທີ່ກ່ຽວຂ້ອງສືບຕໍ່ໂຄສະນາເຜີຍແຜ່ກົດໝາຍ ແລະນິຕິກຳ ກ່ຽວຂ້ອງໃຫ້ກັບພະນັກງານ-ລັດຖະກອນ, ທະຫານ, ຕຳຫຼວດ, ຜູ້ປະກອບການ, ປະຊາຊົນບັນດາເຜົ່າ ໄດ້ຮັບຮູ້ ແລະ ເຂົ້າໃຈຢ່າງທົ່ວເຖິງດ້ວຍຫຼາຍຮູບການ, ພ້ອມດຽວກັນນັ້ນໃຫ້ຈັດກິດຈະກຳຕ່າງໆຕາມເງື່ອນໄຂຕົວຈິງຂອງທ້ອງຖິ່ນເພື່ອຈັດພິທີປ່ອຍປາລົງໃສ່ອ່າງເກັບນໍ້າ, ເຂື່ອນ ໄຟຟ້າ, ຫ້ວຍ, ໜອງ, ບຶງ, ປ່ອນສັດປ່າທີ່ໄດ້ມາຈາກການເພາະພັນ ຫຼື ຢຶດຈາກການຄ້າ-ຂາຍທີ່ຜິດກົດໝາຍຄືນສູ່ທຳມະຊາດຕົ້ນຕໍແມ່ນປ່ອຍເຂົ້າໃນປ່າສະຫງວນ ຫຼືເຂດອື່ນທີ່ເຫັນວ່າມີຄວາມປອດໄພໃຫ້ສາມາດອອກແມ່ແຜ່ລູກໄດ້ຢ່າງເປັນປົກກະຕິ.

  ພ້ອມດຽວກັນນັ້ນກໍຫ້າມບຸກຄົນ, ຄອບຄົວ ແລະ ການຈັດຕັ້ງມີການກະທຳເປັນຕົ້ນຈັບ, ຊື້-ຂາຍ, ສັດນໍ້າ-ສັດປ່າປະເພດຫວງຫ້າມໃນບັນຊີ 1 ແລະ 2 ໃນທຸກລະດູ ການ, ນຳເອົາສັດປະເພດດັ່ງກ່າວທັງສັດເປັນ, ຕາຍ ຫຼື ຊິ້ນສ່ວນ ແລະ ອະໄວຍະວະຕ່າງໆມາໄວ້ໃນຄອບຄອງ, ຫ້າມລ່າສັດນໍ້າ, ສັດປ່າປະເພດທົ່ວໄປ ຫຼື ບັນຊີ 3 ໃນສະຖານທີ່ຫວງຫ້າມ, ເຂດອະນຸລັກສັດ, ເຂດວັງສະຫງວນຕົ້ນຕໍຊ່ວງເຂົ້າພັນສາ, ບຸກຄົນທຳລາຍເຂດອະນຸລັກພັນສັດ, ວັງສະຫງວນ, ຖິ່ນອາໄສ ແລະ ແຫ່ງອາຫານຂອງສັດນໍ້າ-ສັດປ່າ ໂດຍທາງກົງ ແລະ ທາງອ້ອມ, ລວມທັງຈັບຈອງ, ຍ້າຍ, ປ່ຽນແປງ ຫຼືທຳລາຍເຄື່ອງໝາຍເຂດແດນວັງສະຫງວນ,ລວ່ງລະເມີດຫາປາໃນລະດູວາງໄຂ່, ຕັນທາງເດີນຂອງປາຂຶ້ນວາງໄຂ່ຕາມຫ້ວຍ ແລະ ສາຍນໍ້າ ດ້ວຍວິທີຕ່າງໆທີ່ເປັນອາວຸດຫາປາ ແລະ ພຶດຕິກຳອື່ນໆທີ່ເປັນການລະເມີດລະບຽບກົດໝາຍກ່ຽວກັບສັດ ນໍ້າ ແລະສັດປ່າ ແລະກົດໝາຍວ່າດ້ວຍການປະມົງ, ຫາກວ່າພົບເຫັນມີການລະເມີດແມ່ນຈະຖືກດຳເນີນມາດຕະການຕາມຄວາມຜິດເບົາ ຫຼື ໜັກ, ສ່ວນການຈັດກິດ ຈະກຳໃນວັນດັ່ງກ່າວແມ່ນຂຶ້ນກັບທ້ອງຖິ່ນມີເງື່ອນໄຂ, ແຕ່ຕ້ອງຢູ່ໃນພື້ນຖານປະຢັດມັດທະຍັດ ແລະຕ້ານການຟຸມເຟືອຍ.

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์