ທ່ານ ເກຍ ອູ໊ສິດທິເດດ ເປີດເຜີຍບົດຮຽນ 3 ປີ ປ່ຽນຊີວິດຄົນຂໍທານກາຍເປັນຜູ້ຮູ້ສ້າງຢູ່ທຳກິນ

  ເຖິງວ່າໂຄງການຈະສິ້ນສຸດລົງແລ້ວກໍຕາມແຕ່ກິ່ນອາຍຜົນງານຄວາມດີຂອງທ່ານ ເກຍ ອູ໊ສິດທິເດດ ໃນການພິກປີ້ນຊີວິດຈາກຄົນຂໍທານກາຍເປັນຜູ້ຮູ້ສ້າງຢູ່ທຳກິນຍັງຄົງຈາລຶກໄວ້ໃນໃຈຂອງປະຊາຊົນບ້ານຄຳປາແໜ ແລະ ບ້ານປ່າກ້ວຍ ເມືອງຈຳພອນ ແຂວງສະຫວັນນະເຂດ ຕະຫຼອດໄປ ແລະ ກໍຈະຕ້ອງໄດ້ສືບຕໍ່ຖ່າຍທອດບົດຮຽນຂອງຜົນສຳເລັດດັ່ງກ່າວສູ່ສັງຄົມໄດ້ຮັບຮູ້ໃຫ້ກວ້າງຂວາງຂຶ້ນເລື້ອຍໆ ຊຶ່ງນັບເປັນຕົວແບບທີ່ໂດດເດັ່ນໃນການແກ້ໄຂຄວາມທຸກຍາກຂອງປະຊາຊົນໃຫ້ກັບອີກຫຼາຍໆໂຄງ ການໃນລາວ.

ທ່ານ ເກຍ ອູ໊ສິດທິເດດ ເຈົ້າຂອງໂຮງງານຜະລິດນໍ້າດື່ມ ແລະນໍ້າກ້ອນໂລມາຄຳ ນຳສະເໜີຕໍ່ກອງປະຊຸມຊຸກຍູ້ຂະບວນແຂ່ງຂັນຮັກຊາດ ແລະພັດທະນາຕິດພັນກັບການພັດທະນາຊົນນະບົດເພື່ອແກ້ໄຂຄວາມທຸກຍາກຂອງປະຊາຊົນທີ່ຈັດຂຶ້ນເມື່ອທ້າຍອາທິດຜ່ານມາຢູ່ນະຄອນຫຼວງວຽງຈັນວ່າ: ການມີສ່ວນຮ່ວມໃນໂຄງການລຶບລ້າງຄວາມທຸກຍາກຂອງປະຊາຊົນ 2 ບ້ານເມືອງຈຳພອນ ແຂວງສະຫວັນນະເຂດ ນັບແຕປີ 2016- 2018 ເບື້ອງຕົ້ນແມ່ນມີພຽງ 27 ຄອບຄົວທຸກຍາກ (ຄົນຂໍທານ) ໂດຍຮູບແບບ ການປະຕິບັດແມ່ນໄດ້ຕັ້ງທິມງານເຮັດວຽກຕົວຈິງ (ຕົນເອງເປັນຜູ້ນຳພາ) ເຮັດວຽກລັກສະນະຄ້າຍຄືເຮັດທຸລະກິດຂອງຕົນເອງ, ເຮັດຫຼາຍໜ້າວຽກໄປພ້ອມໆກັນ, ແກ້ວຽກຕົວຈິງຢູ່ໃນສະພາບຄວາມເປັນຈິງ, ຕ້ອງຢູ່ເໜືອບັນຫາເຮັດເປັນເຈົ້າການຕໍ່ເນື່ອງເພື່ອໃຫ້ເກີດຜົນປະໂຫຍດອັນໄວ, ເກີດພື້ນຖານການຜະລິດຫຼາຍຢ່າງໃຫ້ປະຊາຊົນເປັນເຈົ້າດ້ວຍຄວາມເຊື່ອ ແລະຄວາມເພີ່ງພໍໃຈຂອງເຂົາເຈົ້າ.

 ໂຄງການໄດ້ຊອກຫາຈັດສັນຫຼາຍສີ່ງຢ່າງມອບໃຫ້ປະຊາຊົນເປັນຕົ້ນ: ຈັດສັນຕັດຕາຜ້າບ້ານ, ໄດ້ດິນປຸກສ້າງ, ໄດ້ເຮືອນເຄິ່ງຖາວອນ, ໄດ້ດິນສວນປູກ, ໄດ້ແນວພັນພືດຜັກຫຼາຍຊະນິດ, ໄດ້ນໍ້າສ້າງບາດານ, ໄດ້ສະໃຫຍ່ລ້ຽງປາ, ໄດ້ດິນເຮັດນາ, ໄດ້ຮັບເຄື່ອງມືໃນການອອກແຮງງານ, ເຄື່ອງນຸ່ງຫົ່ມ, ເຄື່ອງໃຊ້ຄົວເຮືອນ, ອາຫານການກິນ ແລະໄດ້ສັດລ້ຽງປະເພດໄກ່, ເປັດ, ໝູແລະແບ້.

 ນອກຈາກນີ້ຍັງເກີດມີສາທາລະນະປະໂຫຍດເກີດຂຶ້ນໃນ 2 ບ້ານ ເປັນຕົ້ນໂຮງຮຽນ, ໂຮງໝໍ, ສາງເກັບມ້ຽນເຂົ້າ, ໂຮງສີເຂົ້າ, ກອງທຶນເຂົ້າ, ກອງທຶນສຸຂະພາບ, ຕະ ຫຼາດ, ຕໍ່າຫູກ. ໜອງສະລວມບ້ານ, ຫ້ອງການປົກຄອງບ້ານ, ສະໂມສອນບ້ານພ້ອມໂທລະໂຄ່ງຂອງບ້ານ, ມີວັດປະຈຳບ້ານ, ປະຊາຊົນທັງ 2 ບ້ານໄດ້ເຊື່ອຖືສາສະໜາພຸດທັງໝົດ, ລູກຫຼານໃນເກນອາຍຸໄດ້ເຂົ້າໂຮງຮຽນປົກກະຕິ, ຍາມເຈັບເປັນກໍໄດ້ພາກັນເຂົ້າໂຮງໝໍ.

   ຈາກການໄດ້ຮັບສິ່ງເອື້ອອຳນວຍທັງໝົດນັ້ນ ທ່ານ ເກຍ ອູ໊ສິດທິເດດ ກ່າວວ່າ: ຈຶ່ງເກີດພື້ນຖານມີລາຍຮັບໃຫ້ຫຼາຍຄອບຄົວເປັນຕົ້ນ: ມີຮ້າຍຂາຍເຄື່ອງຍ່ອຍ, ມີຮ້າຍຂາຍເຝີ, ຮ້ານສ້ອມແປງລົດຈັກ-ລົດໄຖນາ, ມີບ່ອນຕົ້ມເຫຼົ້າໝໍ້ນ້ອຍ ແລະອື່ນໆ ມາຮອດມື້ນີ້ຈິ່ງເຫັນໄດ້ເກີດມີຫຼາຍໜໍ່ແໜງເປັນພື້ນຖານໃຫ້ກັບປະຊາຊົນໄດ້ມີບ່ອນທຳມາຫາກິນທັງໃນ ແລະນອກເປົ້າໝາຍຈຳນວນ 11 ຄອບຄົວໄດ້ເປັນເຈົ້າຂອງຫຼາຍຢ່າງທີ່ເມື່ອກ່ອນເຂົາເຈົ້າບໍ່ເຄີຍມີຊີວິດການເປັນຢູ່ມີການປ່ຽນແປງທີ່ດີຂຶ້ນກວ່າເກົ່າ, ຮູ້ເລື່ອງໂພຊະນາການ, ສຸຂະນາໄມເຂົ້າເຖິງສາທາລະນະສຸກ, ເຂົ້າເຖິງການສຶກສາ ແລະວັດທະນະທຳສັງຄົມທີ່ສຳຄັນປະຊາຊົນໄດ້ຮູ້ພື້ນຖານການປູກການລ້ຽງ, ຮູ້ຊື້ຮູ້ຂາຍພ້ອມມີເປົ້າໝາຍ ແລະໄດ້ຫັນມາອອກແຮງງານເຮັດກິນກັບທີ່ຖອຍຫ່າງອອກຈາກອາຊີບເກົ່າທີ່ເລື່ອນລອຍ.

 ແນວໃດກໍດີຜ່ານການລົງມືເຮັດຕົວຈິງໃນ 3 ປີແມ່ນໄດ້ມີການໃຊ້ທຶນຂອງຕົນເອງຈຳນວນ 15 ຕື້ກີບ ໃສ່ 18 ໜ້າວຽກຊຶ່ງບັນລຸຕາມຈຸດປະສົງເປົ້າໝາຍທີ່ວາງໄວ້ຮ່ວມກັບອຳນາດການປົກເມືອງຈຳພອນນອກຈາກນັ້ນກໍຍັງມີຫຼາຍພາກສ່ວນອີກເປັນຕົ້ນອົງການຈັດຕັ້ງພັກ-ລັດ ຫຼາຍຂັ້ນ, ອົງການຈັດຕັ້ງມະຫາຊົນ, ພາກສ່ວນນັກທຸລະ ກິດ, ຊາວຄ້າຂາຍທັງພາຍໃນ ແລະຕ່າງປະເທດກໍໄດ້ເຂົ້າຮ່ວມ ຊ່ວຍເຫຼືອເປັນມູນຄ່າປະມານ 7 ຕື້ກີບ ລວມທັງໝົດ 22 ຕື້ກວ່າກີບ ທ່ານ ເກຍ ອູ໊ສິດທິເດດ ກ່າວ.

ຂຽນໂດຍ: ຂຸນນໍ້ມຶກ  

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์