ລັດ ເປີດກວ້າງປະເພດໄມ້ປູກຈະໃຫ້ສົ່ງອອກໄດ້ທັງແປຮູບ ແລະໄມ້ທ່ອນ

  ແນໃສ່ເຮັດໃຫ້ແຜນຍຸດທະສາດການເພີ່ມພື້ນທີ່ປ່າປົກຫຸ້ມບັນລຸ 70% ໃນປີ 2020 ທີ່ຈະມາເຖິງນີ້, ຊຶ່ງລ່າສຸດກະຊວງກະສີກຳ ແລະປ່າໄມ້ໄດ້ມີນະໂຍບາຍສົ່ງເສີມໃຫ້ທຸກພາກສ່ວນມີສ່ວນຮ່ວມໃນການປູກໄມ້ໃຫ້ເປັນປ່າໂດຍກວມເອົາທັງປະຊາຊົນ, ຜູ້ປະກອບການທີ່ດຳເນີນທຸລະກິດກ່ຽວກັບໄມ້ໃນຂົງເຂດປ່າຜະລິດ, ປະຈຸບັນລັດໄດ້ເປີດກ້ວາງ ປະເພດໄມ້ປູກໃຫ້ມີການສົ່ງອອກທັງໃນການແປຮູບ ຫຼືເປັນໄມ້ທ່ອນກໍໄດ້ເຊັ່ນກັນ.

  ທ່ານ ລຽນ ທິແກ້ວ ລັດຖະມົນຕີກະຊວງກະສິກຳ ແລະປ່າໄມ້ ໃຫ້ສຳພາດກັບສື່ມວນຊົນເນື່ອງໃນໂອກາດເຂົ້າຮ່ວມກອງປະຊຸມລັດຖະບານເປີດກວ້າງຄັ້ງ 1 ປະຈຳປີ 2019 ຜ່ານມາຮູ້ວ່າ: ເພື່ອເຮັດໃຫ້ແຜນຍຸດທະສາດການເພີ່ມພື້ນທີ່ປ່າປົກຫຸ້ມໃຫ້ໄດ້ 70% ໃນປີ 2020 ທີ່ຈະມາເຖິງນີ້, ຊຶ່ງກະຊວງແມ່ນໄດ້ສຸມໃສ່ 3 ປະເພດປ່າເປັນຫຼັກໂດຍສະເພາະປ່າສະຫງວນ, ປ່າປ້ອງກັນ ແລະປ່າຜະລິດ,ສະເພາະປ່າສະຫງວນເພື່ອບໍ່ໃຫ້ຖືກທຳລາຍກະຊວງໄດ້ມີການຊຸກຍູ້ສົ່ງເສີມໃຫ້ແກ່ພາກທຸລະກິດເຂົ້າມາດຳເນີນກິດຈະການທ່ອງທ່ຽວແບບອະນຸລັກ, ທັງເປັນການປະກອບສ່ວນເຂົາໃນການປົກປັກຮັກສາ ແລະນຳໃຊ້ຜືນປ່າໃຫ້ເປັນປະໂຫຍດ ແລະສາມາດແກ້ໄຂຊີວິດການເປັນຢູ່ຂອງປະຊາຊົນທີ່ຕັ້ງຖິ່ນຖານບ້ານເຮືອນໃນເຂດປ່າດັ່ງກ່າວໃຫ້ມີອາຊີບທີ່ໝັ້ນຄົງໂດຍບໍ່ກັບເຂົ້າໄປດຳເນີນກິດຈະການຖາງປ່າເຮັດໄຮ່ ແລະປູກພືດເປັນສິນຄ້າຫັນມາຮັບໃຊ້ວຽກການບໍລິການດ້ວຍການອອກແຮງໃນຂົງເຂດວຽກບໍລິການການທ່ອງທ່ຽວໃຫ້ນັບມື້ຫຼາຍຂຶ້ນ, ພ້ອມນັ້ນຍັງໄດ້ມີການສຳຫຼວດເພື່ອຈະຂະຫຍາຍເນື້ອທີ່ເຂດປ່າສະຫງວນທີ່ມີໃນປະຈຸບັນໃຫ້ເພີ່ມຂຶ້ນຕື່ມ.

  ສຳລັບປ່າຜະລິດແມ່ນໄດ້ມີຄວາມພະຍາຍາມໃຫ້ຜູ້ປະກອບການ ແລະປະຊາຊົນມີສ່ວນຮ່ວມເຂົ້າໄປປູກໄມ້ໂດຍສະເພາະເຂດໃດທີ່ເປັນປ່າຊຸດໂຊມຍິ່ງຈະມີນະໂຍບາຍໃຫ້ປະຊາຊົນໄປປູກປ່າເພື່ອເປັນຂອງຕົນເອງ ແລະມີນະໂຍບາຍໃຫ້ເຂົາເຈົ້າໄດ້ຂາຍຕົ້ນໄມ້ດັ່ງກ່າວເພື່ອເພີ່ມລາຍຮັບໃຫ້ກັບຄອບຄົວ, ພ້ອມດຽວກັນນັ້ນກໍໄດ້ມອບໝາຍໃຫ້ຜູ້ປະກອບການດຳເນີນທຸລະກິດໄມ້ເຂົ້າໄປປູກໄມ້ໃຫ້ເປັນປ່າ ແລະນະໂຍບາຍສົ່ງເສີມໃຫ້ເຂົາເຈົ້າໄດ້ດຳເນີນທຸລະກິດຮັກສາປ່າ,ປົກປັກຮັກສາປ່າທັງເພີ່ມເນື້ອທີ່ປ່າໄມ້ໃຫ້ຫຼາຍຂຶ້ນ ແລະອີກໜຶ່ງມາດຕະການທີ່ຈະເປັນສົ່ງເສີມປະຊາຊົນ, ພາກສ່ວນໃດປູກໄມ້ລັດຈະມີນະໂຍບາຍມອບສິດນຳໃຊ້ໃຫ້ກັບພາກສ່ວນດັ່ງກ່າວ ຫຼືບຸກຄົນດັ່ງກ່າວ.

  ພ້ອມດຽວກັນນັ້ນໄມ້ທີ່ປູກມີນະໂຍບາຍໃຫ້ສົ່ງອອກເປັນທ່ອນເປັນລຳ ຫຼື ໄມ້ແປຮູບຕົ້ນຕໍແມ່ນປະເພດໄມ້ກະຖິນເທພາ, ໄມ້ວິກ, ໄມ້ສັກ, ໄມ້ຢ່າງພາລາ ແລະ ອື່ນໆທີ່ເປັນໄມ້ປູກ, ທັງໝົດນີ້ແມ່ນນະໂຍບາຍໃໝ່ທີ່ເປັນການສົ່ງເສີມປະຊາຊົນປູກປ່າເພື່ອສ້າງວັດຖຸດິນສະໜອງໃຫ້ແກ່ໂຮງງານຜະລິດກັບທີ່, ທັງເປັນການສົ່ງອອກວັດຖຸດິບໄປຕ່າງປະເທດ, ອັນນີ້ຈະເປັນອີກໜຶ່ງນະໂຍບາຍໃນການດຶງດູດນັກທຸລະກິດ, ຜູ້ປະກອບການທີ່ມີຄວາມຕັ້ງໃຈຢາກພັດທະນາປ່າໄມ້ຢູ່ແລ້ວ ແລະຄອງຄອຍມາດົນ, ຊຶ່ງກະຊວງໄດ້ວາງນະໂຍບາຍນີ້ອອກໃນກົດໝາຍປ່າໄມ້ທີ່ຫາກໍຜ່ານສະພາໃນກອງປະຊຸມສະພາຜ່ານມາ, ໂດຍນະໂຍບາຍດັ່ງກ່າວເປັນນະໂຍບາຍທີ່ດີສຳລັບການສົ່ງເສີ່ມປະ ຊາຊົນ, ພ້ອມທັງໄດ້ຮັບຮູ້ປ່າໄມ້ທີ່ເປັນໄມ້ຫວງຫ້າມກໍຕາມ, ເຖິງວ່າເປັນໄມ້ທີ່ປະຊາຊົນປູກໄວ້ໃນຮົ້ວໄຮ່ປາຍນາລ້ວນເປັນກຳມະສິດຂອງເຂົາເຈົ້າ ແລະສາມາດນຳໃຊ້ໄດ້ ພຽງແຕ່ຂຶ້ນຈົດທະບຽນສວນປູກແລ້ວກໍສາມາດມີສິດໃຊ້ ແລະ ຂາຍໄດ້.

 ນະໂຍບາຍສົ່ງເສີມດັ່ງກ່າວນັບວ່າເປັນນະໂຍບາຍໃຫຍ່ເພື່ອໃຫ້ປະຊາຊົນ ແລະຜູ້ປະກອບການທັງພາຍໃນ ແລະຕ່າງປະເທດໄດ້ປະກອບສ່ວນສຳຄັນເຂົ້າໃນການປູກໄມ້ຂະ ຫຍາຍເນື້ອທີ່ປ່າໄມ້ໃຫ້ເປັນປ່າຢ່າງກວ້າງຂວາງ, ເນື່ອງຈາກຜ່ານມາຫຼາຍພາກສ່ວນມີການປູກໄມ້ ເປັນຈຳນວນຫຼາຍ, ແຕ່ວ່າບໍ່ມີຄົນບົວລະບັດຮັກສາຈຶ່ງເຮັດໃຫ້ການປູກໄມ້ເພື່ອເພີ່ມພື້ນທີ່ປ່າບໍ່ບັນລຸຕາມເປົ້າໝາຍ ແລະການເພີ່ມນະໂຍບາຍດັ່ງກ່າວນີ້ຈະຊ່ວຍເຮັດໃຫ້ຄາດໝາຍຍຸດທະສາດຮອດ 2020 ບັນລຸໄວ້ຂຶ້ນ, ທ່ານ ລຽນ ທິແກ້ວ ກ່າວຕື່ມ.

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์