ຜົນການແຂ່ງຂັນ ICT 2019

  ງານວາງສະແດງ Lao -ICT  Expo 2019 ແມ່ນສຳເລັດດ້ວຍດີພາຍຫຼັງທີ່ເລີ່ມແຕ່ວັນທີ 25-30 ມິຖຸນາ ໃນນັ້ນໄດ້ມີຫ້ອງວາງສະແດງຈາກຜູ້ປະກອບການດ້ານໂທລະຄົມມະນາຄົມ-ໄອຊີທີທັງພາຍໃນ ແລະຕ່າງປະເທດທັງໝົດ ມີ 54 ຮ້ານ, ພ້ອມນີ້ຍັງມີການປະກາດລາງວັນ ASEAN ICT Award 2019 ຊຶ່ງທີມທີ່ໄດ້ຮັບຊະນະເລີດປະຈຳປີແມ່ນ Goteddy ແລະ Lao Emergency Rescue ໂດຍຈະໄດ້ເປັນຕົວແທນຂອງປະເທດລາວໄປຮ່ວມແຂ່ງຂັນໃນອາຊຽນ.

 ພິທີມອບລາງວັນ ASEAN ICT Award 2019 ໄດ້ຈັດຂຶ້ນວັນທີ 30 ມິຖຸນາ 2019 ທີ່ໂຮງແຮມດອນຈັນພາເລດນະຄອນຫຼວງວຽງຈັນ ໃຫ້ກຽດເຂົ້າຮ່ວມຂອງທ່ານ ທອງໃສ ຊານໄຊຍະ ຮອງລັດຖະມົນຕີກະຊວງໄປສະນີ, ໂທລະຄົມມະນາຄົມ ແລະການສື່ສານ, ທ່ານ ພູທອງ ສີສະຫວັດ ຮັກສາຫົວໜ້າກົມເຕັກໂນໂລຊີການສື່ສານຂໍ້ມູນຂ່າວສານ, ກະຊວງໄປສະນີ, ໂທລະຄົມມະນາຄົມ ແລະການສື່ສານພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

  ການແຂ່ງຂັນມີທັງໝົດ 25 ຜະລິດຕະພັນ ຄັດເອົາ 15 ຜະລິດຕະພັນເຂົ້າມາແຂ່ງຂັນຮອບສຸດທ້າຍໂດຍແບ່ງອອກເປັນ 2 ໝວດຄື: ໝວດທົ່ວໄປ ແລະ ໝວດນັກສຶກສາ; ສຳລັບທີມທີ່ໄດ້ຮັບລາງວັນຊະນະເລີດແມ່ນຈະເປັນຕົວແທນຂອງປະເທດໄປເຂົ້າຮ່ວມແຂ່ງຂັນໃນເວທີສາກົນຄື ASEAN ICT Award 2019 ຜ່ານການແຂ່ງຂັນທີມທີ່ໄດ້ຮັບລາງວັນຊະນະເລີດໝວດທົ່ວໄປໄດ້ແກ່ທີມ Goteddy ຈາກ Pasong Lattana ໄດ້ຮັບໂລ້ລາງວັນ ແລະ ເງິນສົດ 14 ລ້ານກີບ, ຮອງອັນດັບໜຶ່ງໄດ້ແກ່ທີມລະບົບການຊໍາລະຄ່າທຳນຽມທາງແບບທັນສະໄໝຈາກທະນາຄານການຄ້າຕ່າງປະເທດລາວມະຫາຊົນໄດ້ຮັບໂລ້ລາງວັນແລະເງິນສົດ 7 ລ້ານກີບ, ຮອງອັນດັບສອງໄດ້ແກ່ທີມ Shop ping-D Online Supemarket ພ້ອມກັບໂລລາງວັນ ແລະ ເງິນສົດ 5 ລ້ານກີບ; ສຳລັບໝວດນັກສຶກສາທີມຊະນະເລີດແມ່ນທີມ Lao Emergency Res cue ໄດ້ຮັບໂລ້ລາງວັນ ແລະ ເງິນສົດ5 ລ້ານກີບ, ຮອງອັນດັບໜຶ່ງແມ່ນທີມ Shara way ໄດ້ຮັບໂລ້ລາງວັນ ແລະ ເງິນສົດ 2 ລ້ານກີບ ແລະ ຮອງອັນດັບສອງແມ່ນທີມ Cer Care Delivery ໄດ້ຮັບໂລ້ລາງວັນ ແລະເງິນສົດ 1 ລ້ານກີບ.

  ຈຸດປະສົງແມ່ນສົ່ງເສີມໃຫ້ນັກຮຽນ, ນັກສຶກສາ, ນັກຄົ້ນຄວ້າພັດທະນາຈາກຂະແໜງການພັກ-ລັດ, ເອກະຊົນໄດ້ມີໂອກາດສະແດງຄວາມສາມາດໃນການພັດທະນາເຕັກໂນໂລຊີດ້ານ ICT ບໍ່ວ່າຈະເປັນຜູ້ປະກອບການຜູ້ຄຸ້ມຄອງ, ຜູ້ຜະລິດ, ຜູ້ບໍລິການ, ຄຸ້ມຄອງ ICT ໄດ້ພົບປະແລກປ່ຽນບົດຮຽນ, ຄວາມຮູ້, ຄວາມເຂົ້າໃຈສ້າງການພົວພັນຮ່ວມມືທາງດ້ານການພັດທະນາຮ່ວມກັນ ແລະສົ່ງເສີມສ້າງຊື່ສຽງທາງດ້ານ ICT ໃນລາວອອກສູ່ສາກົນ.

ຂຽນໂດຍ: ແພງຕາ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์