ເປີດບໍລິສັດ ແກັສວັນລາວ

  ແກ໊ສ໌ LP ສ່ວນຫຼາຍແມ່ນຖືກນຳໃຊ້ພາຍໃນຄົວເຮືອນ ແລະຮ້ານອາຫານຊຶ່ງເປັນສິ່ງທີ່ຈຳເປັນໃນຊີວິດປະຈຳວັນຂອງພວກເຮົາ, ພາຍໃຕ້ສະພາບການດັ່ງກ່າວບໍລິສັດ Saisan ປະເທດຍີ່ປຸ່ນເປັນບໍລິສັດທີ່ມີປະສົບການຫຼາຍປີກ່ຽວກັບການຈຳໜ່າຍແກ໊ສ໌ຈຶ່ງໄດ້ມາຂະຫຍາຍທຸລະກິດຢູ່ ສປປ ລາວ ໃນຊື່ບໍ ລິສັດ Gas One Laos ຊຶ່ງຈະເປັນສິ່ງສຳຄັນແລະອຳນວຍຄວາມສະດວກໃນການດຳລົງຊີວິດຂອງຄົນລາວ.

 ພິທີເປີດໂຕບໍລິສັດ Gas One Laos ໄດ້ຈັດຂຶ້ນເມື່ອວັນທີ 27 ມິຖຸນາຜ່ານມາ, ຢູ່ໂຮງແຮມລາວພລາຊາ, ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມຂອງ ທ່ານ ບໍ່ວຽງຄຳ ວົງດາລາ ລັດຖະມົນຕີກະຊວງວິທະຍາສາດ ແລະເຕັກໂນໂລຊີ, ທ່ານKazuhiro KUNO, ຜູ້ຕາງໜ້າເອກອັກຄະລັດຖະທູດຍີ່ປຸ່ນປະຈຳ ສປປ ລາວ ພ້ອມດ້ວຍບັນດາແຂກຖືກເຊີນເຂົ້າຮ່ວມ.

 ທ່ານ Takehiko KAWAMOTO, ປະທານບໍລິສັດ Saisan ກ່າວວ່າ: ບໍລິສັດ Saisan ໄດ້ກໍ່ຕັ້ງຂຶ້ນໃນທ້າຍປີ 1945 ພາຍຫຼັງສົງຄາມໂລກຄັ້ງທີ II ສິ້ນສຸດລົງ, ທຳອິດແມ່ນໄດ້ເປີດເປັນບໍລິສັດຂາຍແກ໊ສ໌ອົກຊີຢູ່ແຂວງ Saitama ຕັ້ງຢູ່ທາງພາກເໜືອຂອງນະຄອນຫຼວງໂຕກຽວ ແລະຕໍ່ມາໄດ້ເນັ້ນໃສ່ແກ໊ສ໌ pro pane ຊຶ່ງຖືກເອີ້ນວ່າ “ແປວໄຟ” ຫຼັງຈາກນັ້ນກໍໄດ້ເລີ່ມພັດທະນາເປັນອຸດສາຫະກຳແກ໊ສ໌ LP ຈຳໜ່າຍພາຍໃນປະເທດຍີ່ປຸ່ນ ແລະສົ່ງຂາຍປະເທດເກົາຫຼີເປັນປະເທດທຳອິດ.

 ສຳລັບ ຊື່ແບຣນ Gas One ເປັນບໍລິສັດໃນເຄືອຂອງ Saisan ທີ່ດໍາເນີນທຸລະກິດດ້ານອຸດສາຫະກຳພະລັງງານ ແລະອຸດສາຫະກຳແກ໊ສ໌ LP ມີຖານການຂາຍ 99 ແຫ່ງໃນທົ່ວໂລກ, ມີສະຖານີເຕີມແກ໊ສ໌ LP 18 ແຫ່ງ ແລະ 38 ບໍລິສັດໃນເຄືອເຊັ່ນ: ປະເທດມົງໂກລີ, ຫວຽດນາມ, ອິນໂດເນເຊຍ,ກຳປູເຈຍ, ບັງກະລາເທດ, ເນ ປານ, ອາຟຣິກາ ແລະ ໄທທັງໝົດ 9 ປະເທດ. Gas One Laos ເປັນປະເທດທີ 10 ຂອງບໍລິສັດຍ່ອຍຢູ່ຕ່າງປະເທດໃນເຄືອ Gas One ຊຶ່ງມີເປົ້າໝາຍເປັນອັນ ດັບທີ 1 ແລະຈະເປັນຕົວເລືອກອັນດັບຕົ້ນໆໃນປະເທດທີ່ກໍາລັງພັດທະນາ.

  ໃນການຂະຫຍາຍທຸລະກິດຢູ່ ສປປ ລາວ ຄັ້ງນີ້ Gas One ພວກເຮົາມີຄວາມມຸ້ງຫວັງທີ່ຈະສ້າງສັນນະວັດຕະກຳໃໝ່ຢ່າງຕໍ່ເນື່ອງ, ສະໜອງພະລັງງານທີ່ເປັນມິດກັບສິ່ງແວດລ້ອມ ແລະ ຈະສາມາດປະກອບສ່ວນອຳນວຍຄວາມສະດວກເຂົ້າໃນການດຳລົງຊີວິດດ້ານຄົວເຮືອນຂອງຄົນລາວ.

ພາບ ແລະຂ່າວຈາກ:

ໜັງສືພິມເສດຖະກິດ-ສັງຄົມ

แชร์