ກວຕ-ມະຫາວິທະຍາໄລ ສັບພະວິຊາ ຮ່າໂນ້ຍຮ່ວມມືຫຼາຍດ້ານ

ກະຊວງວິທະຍາສາດ ແລະເຕັກໂນໂລຊີ (ກວຕ) ສປປ ລາວ ຮ່ວມກັບມະຫາວິທະຍາໄລ ສັບພະວິຊາ ຮ່າໂນ້ຍ, ສສຫວຽດນາມຮ່ວມກັນລົງນາມບົດບັນທຶກຄວາມເຂົ້າໃຈວ່າດ້ວຍການຮ່ວມມືໃນຂົງເຂດຄອມພິວເຕີ ແລະເອເລັກໂຕຣນິກເປັນຕົ້ນແມ່ນການຄົ້ນຄວ້າ ແລະພັດທະນາອິນເຕີເນັດແຫ່ງສັບພະສິ່ງ (IoT), ປັນຍາປະດິດ (AI), ລະບົບການບໍລິການສາທາລະນະ ແລະ ສ້າງຄວາມເຂັ້ມແຂງທາງດ້ານວິຊາການໃຫ້ ສປປ ລາວ ເພື່ອເຮັດໃຫ້ວຽກງານດັ່ງກ່າວນັບມື້ນັບມີການພັດທະນາຂຶ້ນໄປເລື້ອຍໆ.

  ພິທີເຊັນບົດບັນທຶກຄວາມເຂົ້າໃຈການຮ່ວມມືດັ່ງກ່າວໄດ້ຈັດຂຶ້ນວັນທີ 28 ມິຖຸນາ 2019 ທີ່ກະຊວງວິທະຍາສາດ ແລະເຕັກໂນໂລຊີ, ລົງນາມຝ່າຍ ກວຕ ແມ່ນທ່ານ ຄຳເພັດ ວົງດາລາ ຫົວໜ້າກົມແຜນການ ແລະຮ່ວມມື ແລະຝ່າຍມະຫາວິທະຍາໄລສັບພະວິຊາຮ່າໂນ້ຍ ແມ່ນ ຫວຽນ ວັນ ຄ໋າງ ຮອງຜູ້ອຳນວຍການໂດຍໃຫ້ກຽດເຂົ້າ ຮ່ວມຂອງ ທ່ານ ບໍ່ວຽງຄຳວົງດາລາ ລັດຖະມົນຕີ ກວຕ, ມີບັນດາຮອງລັດຖະມົນຕີພ້ອມດ້ວຍແຂກທີ່ຖືກເຊີນ ແລະພະນັກງານທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.

  ເນື້ອໃນ ແລະວັດຖຸປະສົງຂອງການບົດບັນທຶກດັ່ງກ່າວແມ່ນທັງສອງຝ່າຍເຫັນດີຈະຮ່ວມມືກັນໃນຫຼາຍດ້ານເຊັ່ນ: ການພັດທະນາອິນເຕີເນັດແຫ່ງສັບພະສິ່ງ (IoT) ຮ່ວມກັນຄົ້ນຄວ້າ ແລະພັດທະນາລະບົບການຄົມມະນາຄົມອັດສະລິຍະເພື່ອຮັບໃຊ້ການຄົມມະນາຄົມຂົນສົ່ງບົນພື້ນຖານເຕັກໂນໂລຊີອິນເຕີເນັດແຫ່ງຊັບພະສິ່ງ, ຂົງເຂດປັນຍາປະດິດ (AI) ທັງສອງຝ່າຍຈະຮ່ວມກັນໃນການຄົ້ນຄວ້າ ແລະພັດທະນາລະບົບແປພາສາລາວ-ຫວຽດນາມຫວຽດນາມ-ລາວ ດ້ວຍສຽງເວົ້າ (Lao-Vietna m Vietnam-Lao Speech translation system), ລະບົບຂໍ້ມູນພູມສາດ (GIS), ການຄົ້ນຄວ້າ ແລະ ພັດທະນາເວັບໄຊ GIS ເພື່ອການວາງແຜນ ແລະພັດທະນາຈັດສັນບ້ານ, ລະບົບການບໍລິການສາທາລະນະ (Public service) ຈະໄດ້ຮ່ວມກັນຄົ້ນຄວ້າ ແລະພັດທະນາການຫັນການໃຫ້ບໍລິການວຽກງານວິທະ ຍາສາດ ແລະ ເຕັກໂນໂລຊີຂອງກະຊວງໃຫ້ແກ່ສັງຄົມດ້ວຍລະບົບອອນລາຍ ແລະ ພ້ອມນັ້ນ, ຍັງຈະໄດ້ມີການແລກປ່ຽນບົດຮຽນ ແລະ ສ້າງຄວາມເຂັ້ມແຂງທາງດ້ານວິຊາການໃນລະດັບປະລິນຍາໂທ, ປະລິນຍາເອກ, ຝຶກອົບຮົມໄລຍະສັ້ນ ແລະໄລຍະຍາວໃຫ້ແກ່ພະນັກງານກະຊວງວິທະຍາສາດ ແລະເຕັກໂນໂລຊີ ແລະຂົງເຂດອື່ນໆທີ່ທັງສອງຝ່າຍມີຄວາມສົນໃຈໃນການຮ່ວມມື.

ພາບ ແລະຂ່າວຈາກ:

ໜັງສືພິມເສດຖະກິດ-ສັງຄົມ

แชร์