ຄຊປປລ ກວຕ ແລະຫົວພັນ ຮັດແໜ້ນຄວາມສາມັກຄີ

  ເພື່ອເປັນການສືບຕໍ່ຮັດແໜ້ນຄວາມສາມັກຄີ ແລະເພີ່ມທະວີການພົວພັນຮ່ວມມືລະຫວ່າງຄະນະບໍລິຫານງານຊາວໜຸ່ມປະຊາຊົນປະຕິວັດລາວ (ຄຊປປລ) ກະຊວງວິທະຍາສາດ ແລະເຕັກໂນໂລຊີ (ກວຕ) ແລະ ຄຊປປລ ແຂວງຫົວພັນ ທີ່ໄດ້ຕົກລົງແຮກສ່ຽວກັນໃນວັນທີ 28 ເມສາ 2010 ໃຫ້ກາຍເປັນຮູບປະທຳຕົວຈິງ.

  ວັນທີ 28 ມິຖຸນາ 2019 ທີ່ນະຄອນຫຼວງວຽງຈັນ ທັງສອງພາກສ່ວນໄດ້ລົງນາມການຮ່ວມມືເຊິ່ງກັນ ແລະ ກັນໂດຍແມ່ນ ສະຫາຍ ພຸດທະສັກ ວິຈິດຕຣາ ຮັກສາການເລຂາ ຄຊປປລ ກວຕ ແລະສະຫາຍ ວົງເພັດ ບຸນມະນີ ເລຂາ ຄຊປປລ ແຂວງຫົວພັນ, ໂດຍຊ່ອງໜ້າຂອງສະຫາຍ ບໍ່ວຽງຄຳ ວົງດາລາ ລັດຖະມົນຕີ ກວຕ, ສະ ຫາຍ ວັນໄຊ ແພງຊຸມມາ ເຈົ້າແຂວງໆຫົວພັນ, ສະຫາຍ ອາລຸນໄຊ ສູນນະລາດ ເລຂາຄະນະບໍລິຫານງານ ຊປປລແລະບັ ດາສະມາຊິກຊາວໜຸ່ມ 2 ພາກສ່ວນເປັນສັກຂີພິຍານ.

  ການລົງນາມດັ່ງກ່າວສອງຝ່າຍໄດ້ຕົກລົງ ແລະເປັນເອກະ ພາບກັນໃນຫຼາຍດ້ານເປັນຕົ້ນແມ່ນ ຄຊປປລ ກວຕ ຈະຊ່ວຍເຫຼືອດ້ານວິຊາການໃນການຈັດສຳມະນາ ແລະຝຶກອົບຮົມໄລຍະສັ້ນໃນຂະແໜງວິທະຍາສາດ ແລະເຕັກໂນໂລຊີເພື່ອສ້າງຈິດສຳນຶກໃຫ້ແກ່ຊາວໜຸ່ມແຂວງຫົວພັນໃຫ້ເກີດມີຄວາມມັກຮັກວິທະຍາສາດເປັນເວລາໜຶ່ງປີ ນັບແຕ່ເດືອນສິງຫາ2019 ຫາເດືອນສິງຫາ 2020 ຈໍານວນ 3 ຄັ້ງຢ່າງເປັນຢ່າງໜ້ອຍຕາມຄວາມເໝາະສົມ; ຄຊປ ປລ ກວຕ ຕົກລົງຈະຊ່ວຍທຶນການສຶກສາລະ ດັບປະລິນຍາໂທ 1 ທຶນ ຕໍ່ປີ ສົກປີ 2019-2020 ຕາມເງື່ອນໄຂຜູ້ໃຫ້ທຶນວາງອອກໂດຍໃຫ້ ຄຊປປລ ແຂວງຫົວພັນ ເປັນຜູ້ເລືອກເຟັ້ນຊາວໜຸ່ມພາຍໃນແຂວງທີ່ມີເງື່ອນໄຂ ແລະການຮ່ວມມືດ້ານອື່ນໆອີກ.

  ໃນໂອກາດລົງນາມຄັ້ງນີ້ ຄຊປປລ ກວຕ ໄດ້ມອບອຸປະກອນເຄື່ອງໃຊ້ຫ້ອງການຈໍານວນໜຶ່ງໃຫ້ແກ່ ຄຊປປລ ແຂວງຫົວພັນຊຶ່ງ ປະກອບມີ: ຄອມພິວເຕີແລັບທອບ ຈຳນວນ 2 ໜ່ວຍ, ຄອມພິວເຕີຕັ້ງໂຕະ 1 ຊຸດ ແລະຕະກຽງໂຄມໄຟທີ່ໃຊ້ພະລັງງານແສງຕາເວັນ 50 ໜ່ວຍ, ຊຶ່ງລວມມູນຄ່າທັງໝົດ 16 ລ້ານກວ່າກີບ.

ຂຽນໂດຍ: ນໍ້າເໝີຍ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์