ກປ ຄຳມ່ວນແຂ່ງຂັນ-ຍ້ອງຍໍຮັກຊາດ ແລະພັດທະນາ

  ພະແນກກະສິກຳ ແລະປ່າໄມ້ (ກປ) ແຂວງຄໍາມ່ວນໄດ້ເປີດຂະບວນແຂ່ງຂັນ-ຍ້ອງຍໍຮັກຊາດ ແລະພັດທະນາຕິດພັນກັບ 3 ເນື້ອໃນ 4 ເປົ້າໝາຍໃນວັນທີ 27 ມິຖຸ ນາ 2019 ຢູ່ທີ່ພະແນກດັ່ງກ່າວໂດຍການເປັນປະທານຮ່ວມຂອງທ່ານ ບຸນຈັນ ໄຊປັນຍາ ຫົວໜ້າພະແນກກະສິກໍາ ແລະປ່າໄມ້ແຂວງ, ທ່ານ ໄພວັນ ໜູນຄໍາໄຊ ຮອງຫົວໜ້າພະແນກພາຍໃນ ແຂວງ, ມີບັນດາຄະນະຂະແໜງ, ຄະນະກອງກວດກາຕະຫຼອດຮອດພະນັກ ງານວິຊາການເຂົ້າຮ່ວມ .

 ທ່ານ ສີລາ ຈັນທະລາວົງ ຫົວໜ້າຫ້ອງການບໍລິຫານພະແນກແມ່ນໄດ້ຜ່ານຂໍ້ຕົກລົງຂອງພະແນກ ແລະຜ່ານແຈ້ງການຂອງເຈົ້າແຂວງໆ ຄໍາມ່ວນສະບັບເລກທີ 29/ຄຊຂຍ.ຄມ ຈາກນັ້ນທ່ານ ບຸນຈັນ ໄຊປັນຍາ ຫົວໜ້າພະແນກກະສິກໍາ ແລະ ປ່າໄມ້ແຂວງໄດ້ຜ່ານແຜນດໍາເນີນງານຂະບວນການແຂ່ງຂັນ-ຍ້ອງຍໍ ຊຶ່ງຈຸດປະສົງຂອງການແຂ່ງຂັນແມ່ນເພື່ອຊຸກຍູ້ຂະບວນການຢ່າງແຂງແຮງ ແລະເລິກເຊິ່ງກວ່າເກົ່າໃນການຈັດຕັ້ງປະຕິບັດ “3 ເນື້ອໃນ 4 ເປົ້າໝາຍ” ແລະ ວຽກງານ 3 ສ້າງໃຫ້ເປັນຂະບວນການຟົດຟື້ນ ແລະເຂົ້າສູ່ລວງເລິກ, ເພື່ອເປັນການສືບຕໍ່ຈັດຕັ້ງປະຕິບັດຜັນຂະຫຍາຍມະຕິກອງປະຊຸມໃຫຍ່ຄັ້ງທີ IX ຂອງອົງຄະນະພັກແຂວງຄໍາມ່ວນ, ມະຕິກອງປະຊຸມໃຫຍ່ຄັ້ງທີ VI ຂອງຄະນະພັກຮາກຖານພະແນກກະສິກໍາ ແລະ ປ່າໄມ້ກໍ່ຄືແຜນພັດທະນາເສດຖະກິດ-ສັງຄົມຄັ້ງທີ VIII ຂອງລັດ (2016–2020) ແລະ ປະຕິບັດແຜນປະຈໍາປີຂອງພະແນກກະສິກໍາ ແລະ ປ່າໄມ້ວາງອອກໃຫ້ໄດ້ຮັບຜົນສໍາເລັດຢ່າງດີ, ເພື່ອເຮັດໃຫ້ພະນັກງານມີສະຕິຕື່ນຕົວເປັນເຈົ້າການປະຕິບັດລະ ບອບ, ລະບຽບກົດໝາຍ, ມີຄວາມດຸໝັ່ນ, ປະຢັດມັດທະຍັດ, ມີຈິດໃຈບຸກບືນຫ້າວຫັນ, ເຮັດສໍາເລັດໜ້າທີ່ວຽກງານທີ່ຕົນເອງຮັບຜິດຊອບ, ຕັ້ງໜ້າຝຶກຝົນຕົນເອງໃນທຸກດ້ານ, ສ້າງໄດ້ພະນັກງານດີເດັ່ນໃນຂະບວນການວຽກງານຕົວຈິງໂດຍຜ່ານຂະບວນການແຂ່ງຂັນ-ຍ້ອງຍໍ, ມີການຈັດຕັ້ງ, ມີເນື້ອໃນ ແລະມີຄາດໝາຍສູ້ຊົນຢ່າງຈະແຈ້ງ, ໂດຍສະເພາະດ້ານວຽກງານການເມືອງ-ແນວຄິດ, ດ້ານການຈັດຕັ້ງ,ດ້ານວຽກງານອົງການຈັດຕັ້ງມະຫາຊົນ,ວຽກງານນະໂຍບາຍ ແລະ ຕິດຕາມກວດກາ, ວຽກງານປ້ອງກັນຊາດ-ປ້ອງກັນຄວາມສະຫງົບ ແລະຄາດໝາຍສູ້ຊົນ 4 ຄາດໝາຍຄື: ໃຫ້ໄວ, ໃຫ້ດີ, ໃຫ້ຫຼາຍ ແລະໃຫ້ຖືກກົດໝາຍ .

   ທ່ານ  ບຸນມີ ສີບຸນເຮືອງ ກອງເລຂາຂະບວນແຂ່ງຂັນ-ຍ້ອງຍໍຮັກຊາດ ແລະ ພັດທະນາກໍ່ໄດ້ຜ່ານເນື້ອໃນແຂ່ງຂັນ-ຍ້ອງຍໍ ຊຶ່ງການແຂ່ງຂັນຕ້ອງດໍາເນີນຢ່າງເປັນຂະ ບວນຟົດຟື້ນພາຍໃຕ້ຄໍາຂວັນຮັກຊາດ ແລະພັດທະນາຕິດພັນກັບ 3 ເນື້ອໃນ 4 ເປົ້າໝາຍໃນນີ້ 3 ເນື້ອໃນປະກອບມີຄື: ວຽກດີ, ພະນັກງານໜັກແໜ້ນ, ການຈັດ ຕັ້ງເຂັ້ມແຂງສໍາລັບ 4 ເປົ້າໝາຍປະກອບມີຄື: ຄໍ້າປະກັນຄວາມໝັ້ນຄົງທາງດ້ານສະບຽງອາຫານ, ຜະລິດ ກະສິກໍາເປັນສິນຄ້າ, ພັດທະນາປ່າໄມ້ແບບຍືນຍົງ ແລະພັດທະນາຊົນນະບົດ.

  ໃນກອງປະຊຸມບັນດາຕາງໜ້າຂະແໜງການ, ກອງກວດກາ ແລະສູນອ້ອມຂ້າງພະແນກກໍ່ໄດ້ພ້ອມກັນຈັບມືແຂ່ງຂັນ, ຈາກນັ້ນທ່ານ ຄໍາໝັ້ນ ສໍປະເສີດ ກໍ່ໄດ້ຜ່ານແຈ້ງການໃຫ້ຄັດເລືອກຈັດປະເພດຍ້ອງຍໍບັ້ນສ້າງບ້ານແບບຢ່າງດ້ານກະສິກໍາ ແລະປ່າໄມ້, ນອກຈາກນັ້ນຍັງໄດ້ຮັບຟັງຄໍາເຫັນແນະນໍາຈາກທ່ານ ໄພວັນ ໜູນຄໍາໄຊ ຮອງຫົວໜ້າພະແນກພາຍໃນແຂວງເພື່ອເປັນທິດເຍືອງທາງໃນການຈັດຕັ້ງປະຕິບັດໃນຂັ້ນຕໍ່ໄປ .

ຂຽນໂດຍ: ແດງສະຫວັດ ແສນພານິດ  

แชร์