ເປີດໂຄງການສົ່ງເສີມການແຂ່ງຂັນເພື່ອສົ່ງອອກ 3 ແຂວງພາກເໜືອ

  ວັນທີ 24 ມິຖຸນາຜ່ານມາທີ່ຫ້ອງວ່າການແຂວງຫຼວງນໍ້າທາ, ພະແນກອຸດສາຫະກຳ ແລະ ການຄ້າເປີດໂຄງການສົ່ງເສີມຄວາມສາມາດໃນການແຂ່ງຂັນເພື່ອສົ່ງອອກຢູ່ສາມແຂວງພາກເໜືອ ໂດຍການເປັນປະທານຂອງ ທ່ານ ສົມຈິດ ອິນທະມິດ ຮອງລັດຖະມົນຕີກະຊວງອຸດສາຫະກຳ ແລະການຄ້າ ທ່ານ ບຸນຍີ່ ແກ້ວ ຄຸນເມືອງຮອງເຈົ້າແຂວງໆຫຼວງນໍ້າທາ, ມີຫົວໜ້າພະແນກ-ຮອງພະແນກອຸດສາຫະກຳ ແລະການຄ້າ, ສະພາການຄ້າ 3 ແຂວງຄື: ແຂວງຫຼວງນໍ້າທາ, ອຸດົມໄຊ ແລະ ແຂວງຜົ້ງສາລີ, ຕະຫຼອດຮອດພະນັກງານວິຊາການທີ່ກ່ຽວຂ້ອງເຂົ້າຮ່ວມ.

 ເພື່ອແນໃສ່ຊ່ວຍສົ່ງເສີມການເຕີບໂຕຂອງເສດຖະກິດໂດຍຖືເອົາວຽກງານການຄ້າທຸລະກິດ ແລະພາກເອກະຊົນເປັນຫຼັກໃນການພັດທະນາບັນດາແຂວງພາກເໜືອດ້ານຕາເວັນອອກຂອງປະເທດຊຶ່ງປະຕິບັດຕາມແຜນພັດທະນາເສດຖະກິດ-ສັງຄົມແຫ່ງຊາດຄັ້ງທີ 8 ໜຶ່ງໃນສາມເປົ້າໜາຍຕົ້ນຕໍຂອງແຜນງານດັ່ງກ່າວແມ່ນການຂະຫຍາຕົວທາງດ້ານເສດຖະກິດທີ່ເຂັ້ມແຂງ,ສະເໝີພາບ ແລະມີຄວາມຍືນຍົງ,ເພື່ອບັນລຸເປົ້າໝາຍນີ້ຈະຕ້ອງມີຫຼາກຫຼາຍຂະແໜງເສດຖະກິດນອກເໜືອຈາກຂະແໜງຊັບພະ ຍາກອນທຳມະຊາດ ແລະ ພ້ອມກັນນັ້ນຕ້ອງຫຼຸດຜ່ອນຄວາມແຕກໂຕນກັນດ້ານການພັດທະນາໃນແຕ່ລະພາກຂອງປະເທດ. ໂຄງການດັ່ງກ່າວຈະຊ່ວຍສະໜັບສະໜູນ

ໂດຍກົງໃນການຈັດຕັ້ງປະຕິບັດສອງໃນສາມເສົາຄໍ້າຍຸດທະສາດການຄ້າ ແລະ ການພັດທະນາຂອງເອກະຊົນລັດຖະບານຄື: ການປັບປຸງສະພາບແວດລ້ອມການດຳເນີນທຸລະກິດ ແລະການເພີ່ມທະວີຄວາມສາມາດໃນການແຂ່ງຂັນຂອງວິສາຫະກິດລາວທັງເປັນການເພີ່ມທະວີການລົງທຶນ ແລະສົ່ງອອກບັນດາຜະລິດຕະພັນເປົ້າໜາຍ, ຈະນຳໄປສູ່ການສ້າງລາຍຮັບທີ່ໝັ້ນຄົງໃຫ້ກັບບັນດາຄົວເຮືອນທີ່ທຸກຍາກ, ໂດຍສະເພາະແມ່ນແມ່ຍິງໃນສາມແຂວງພາກເໜືອຂອງ ສປປ ລາວ ເປັນຕົ້ນປູກເຂົ້າແຂວງຫຼວງນໍ້າທາ, ປູກສາລີແຂວງອຸດົມໄຊ ແລະ ຊາແຂວງຜົ້ງສາລີເພື່ອເສີມສ້າງຄວາມເຂັ້ມແຂງຂອງການແຂ່ງຂັນໃນການສົ່ງອອກຫັດຖະກຳ ແລະ ປະສິດທິພາບໂດຍສະເພາະແມ່ນທຸລະກິດບໍລິຫານຊຶ່ງເປັນທຸລະກິດທີ່ຈະໄດ້ຮັບຜົນປະໂຫຍດຈາກຕົ້ນທຶນທີ່ບໍລິຫານສາມາດເຂົ້າເຖິງການບໍລິການເພື່ອພັດທະນາທຸລະກິດສະເພາະດ້ານໂດຍກົງ.

  ໂອກາດດຽວກັນທ່ານ ສົມຈິດ ອິນທະມິດ ຮອງລັດຖະມົນຕີກະຊວງອຸດສາຫະກຳ ແລະການຄ້າກໍໄດ້ນໍາເອົາອຸປະກອນເຄື່ອງໃຊ້ຫ້ອງການຈຳນວນໜຶ່ງມາມອບໃຫ້ພະ ແນກອຸດສາຫະກຳ ແລະການຄ້າ, ສະພາການຄ້າ 3 ແຂວງຄື: ແຂວງຫຼວງນໍ້າທາ, ແຂວງອຸດົມໄຊ ແລະ ແຂວງຜົ້ງສາລີ, ເພື່ອຮັບໃຊ້ເຂົ້າໃນວຽກງານໃນຂັ້ນຕໍ່ໄປ.

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์