ອຸດົມໄຊເລັ່ງພັດທະນາໃຫ້ກາຍເປັນ 4 ໃຈກາງແຂວງພາກເໜືອ ຮອງຮັບທາງລົດໄຟ

 ອຸດົມໄຊເປັນແຂວງໜຶ່ງທີ່ມີແລວທາງລົດໄຟໄລຍະຜ່ານແຂວງຈຳນວນ 126,6 ກິໂລແມັດກວມເອົາ 30,9% ຂອງເສັ້ນທາງລົດໄຟທັງໝົດແຕ່ບໍ່ເຕນຫານະຄອນ ຫຼວງວຽງຈັນ ແລະເພື່ອເປັນການຍາດແຍ່ງເອົາກາລະໂອກາດດັ່ງກ່າວນີ້ໃຫ້ຫຼາຍເທົ່າທີ່ຈະຫຼາຍໄດ້,ອຸດົມໄຊຈຶ່ງເລັ່ງພັດທະນາແຂວງໃຫ້ກາຍເປັນ 4 ໃຈກາງຂອງບັນ ດາແຂວງພາກເໜືອ.

ທ່ານ ຄຳພັນ ເຜີຍຍະວົງ ເຈົ້າແຂວງອຸດົມໄຊ ໃຫ້ສຳພາດກັບສື່ມວນຊົນໂອກາດເຂົ້າຮ່ວມກອງປະຊຸມລັດຖະບານເປີດກວ້າງຄັ້ງທີ 1 ປະຈຳປີ 2019 ລະຫວ່າງວັນທີ 26-27 ມິຖຸນາວ່າ: ເພື່ອເປັນການຍາດແຍ່ງກາລະໂອກາດຈາກໂຄງການທາງລົດໄຟລາວ-ຈີນ ທີ່ຈະເປີດນຳໃຊ້ໃນປີ 2021 ທີ່ຈະມາເຖິງນີ້, ປະຈຸບັນແຂວງໄດ້ນຳໃຊ້ທ່າແຮງ ແລະ ກາລະໂອກາດທີ່ເອື້ອອຳນວຍ, ໂດຍການເອົາໃຈໃສ່ເກັບກຳຂໍ້ມູນເພື່ອສຶກສາການພັດທະນາເສດຖະກິດຕາມແລວທາງ ແລະ ເສດຖະກິດຄູ່ຂະໜານຕາມແລວທາງລົດໄຟຊ້ວງຜ່ານແຂວງອຸດົມໄຊໃນຈຳນວນ 126,6 ກິໂລແມັດ ກວມເອົາ 30,9% ຂອງເສັ້ນທາງລົດໄຟທັງໝົດແຕ່ບໍ່ເຕນຫານະຄອນຫຼວງວຽງຈັ ນ, ໂດຍຈະເນັ້ນໃສ່ພັດທະນາອຸດົມໄຊໃຫ້ກາຍເປັນ 4 ໃຈກາງຂອງບັນດາແຂວງພາກເໜືອເປັນຕົ້ນແມ່ນໃຈກາງດ້ານປ້ອງກັນຊາດ-ປ້ອງກັນຄວາມສະຫງົບ, ໃຈກາງທາງດ້ານເສດຖະກິດ, ໃຈກາງທາງດ້ານວັດທະນະທຳ-ສັງຄົມ ແລະໃຈກາງທາງດ້ານການບໍລິການ ແລະ ການທ່ອງທ່ຽວ, ຊຶ່ງມາຮອດປະຈຸບັນການພັດທະນາວຽກດັ່ງກ່າວແຂວງໄດ້ເຊັນບົດບັນທຶກຄວາມຊ່ວຍຈຳ (MOU) ກັບ 3 ບໍລິສັດໃຫຍ່ຄື: ບໍລິສັດດອກງີ້ວຄຳເພື່ອສຳຫຼວດ,ເກັບກຳຂໍ້ມູນ ແລະ ຂຽນແຜນພັດທະນາເສດຖະ ກິດຕາມແລວທາງລົດໄຟຕິດພັນກັບການສ້າງຕົວເມືອງໃໝ່ໃນເຂດສະຖານີລົດໄຟ (9 ສະຖານີໃນ 3 ຕົວເມືອງ) ບໍລິສັດບໍ່ເຕນແດນຄຳສຳຫຼວດ,ເກັບກຳຂໍ້ມູນ ແລະ ຂຽນແຜນພັດທະນາເຂດເສດຖະກິດພິເສດຢູ່ພູຫຼັກຄຳໃນເນື້ອທີ່ 2 ພັນເຮັກຕາ ເພື່ອເປັນຈຸດເຊື່ອມຕໍ່ລະຫວ່າງ ເມືອງນາໝໍ້ ແຂວງອຸດົມໄຊ ກັບເມືອງຫຼວງນໍ້າທາ ແຂວງຫຼວງນໍ້າທາ ແລະ ເມືອງຊີ້ມິ້ງ ສປ ຈີນ ແລະເຂດພັດທະນາຕົວເມືອງໃໝ່ຢູ່ເຂດອ່າງນໍ້າຫີນ ເມືອງໄຊ ແຂວງອຸດົມໄຊ;ບໍລິສັດອາມະຕະສຳຫຼວດ,ເກັບກຳຂໍ້ມູນ ແລະ ຂຽນແຜນພັດທະນາສ້າງຕົວເມືອງທັນສະໄໝຢູ່ເມືອງນາໝໍ້ ໃນເນື້ອທີ່ 3-5 ພັນເຮັກຕາ ແລະການປູກພືດກະສິກຳສະອາດເພື່ອການສົ່ງອອກຢູ່ເມືອງຮຸນແຂ ວງອຸດົມໄຊ, ຊຶ່ງປະຈຸບັນກຳລັງຢູ່ໃນໄລຍະທົດລອງ, ໂດຍທັງ 3 ບໍລິສັດ ແມ່ນໄດ້ສຳເລັດການສຳຫຼວດ,ເກັບກຳຂໍ້ມູນແລ້ວ ແລະກຳລັງຢູ່ໃນໄລຍະຂອງການຂຽນແຜນພັດທະນາໂຄງການຢູ່,ນອກຈາກນີ້ແລ້ວແຂວງຍັງໄດ້ເຊັນ MOU ກັບ 10 ບໍລິສັດເພື່ອພັດທະນາແຫຼ່ງທ່ອງທ່ຽວ,ພັດທະນາສິ່ງອຳນວຍຄວາມສະດວກໃຫ້ແກ່ການທ່ອງທ່ຽວຕົ້ນຕໍແມ່ນໂຮງແຮມ, ບ້ານພັກ, ຮ້ານອາຫານ ແລະໂຮງໝໍທັນສະໄໝ.

  ທ່ານເຈົ້າແຂວງຍັງໃຫ້ຮູ້ອີກວ່າ: ມາຮອດປະຈຸບັນແຂວງສາມາດເວົ້າໄດ້ວ່າບັນຍາກາດຂອງການລົງທຶນໂດຍສະເພາະພາກເອກະຊົນທັງພາຍໃນ ແລະ ຕ່າງປະເທດ ພາຍໃນແຂວງແມ່ນມີບັນຍາກາດຄຶກຄື້ນດີສົມຄວນອັນໄດ້ສົ່ງຜົນໃຫ້ການພັດທະນາເສດຖະກິດໄລຍະ 6 ເດືອນຕົ້ນປີຂອງແຂວງມີການຂະຫຍາຍຕົວໃນລະດັບ 6,7 8%, ສ້າງມູນຄ່າລວມຍອດຜະລິດຕະພັນພາຍໃນ (GDP) ບັນລຸ 3,98 ພັນຕື້ກີບ ເທົ່າກັບ 474,28 ລ້ານໂດລາ, ມູນຄ່າການສົ່ງອອກປະຕິບັດໄດ້ 12,60 ຕື້ກີບ ເທົ່າກັບ 15,18% ຂອງແຜນການ ແລະມູນຄ່າການນຳເຂົ້າ 5,14 ຕື້ກີບ ເທົ່າ 12,99% ຂອງແຜນການ, ລາຍຮັບງົບປະມານປະຕິບັດໄດ້ 44,65 ຕື້ກີບ ເທົ່າກັບ 34,4% ຂອງແຜນການ ແລະ ຄາດວ່າໃນ 6 ເດືອນທ້າຍປີແຂວງຈະສູ້ຊົນໃຫ້ GDP ຂະຫຍາຍຕົວໃນລະດັບ 7,7%, GDP ບັນລຸ 4,06 ພັນຕື້ກີບ, ລາຍຮັບເຂົ້າງົບປະມານໃຫ້ໄດ້ 129,28 ຕື້ກີບ.

 ພາບ ແລະຂ່າວຈາກ:

ໜັງສືພິມເສດຖະກິດ-ສັງຄົມ

 

แชร์