ເມືອງຕຸ້ມລານລະບາດອະຫິວາໝູອາຟຣິກກາຕາຍ ແລະຕິດເຊື້ອ 2 ພັນກວ່າໂຕນ

  ພາຍຫຼັງທີ່ກົມລ້ຽງສັດ ແລະການປະມົງກະຊວງກະສິກຳ ແລະປ່າໄມ້ໄດ້ອອກແຈ້ງການກໍລະນີີພົບເຊື້ອພະຍາດອະຫິວາໝູອາຟຣິກກາ ລະບາດຢູ່ 7 ບ້ານ ຂອງຕຸ້ມລານແຂວງສາລະວັນຄື: ບ້ານສາມັກຄີໄຊ, ດິນດາກ, ໂພນງາມ, ແກ້ງຮັງ, ນາລະຈາງ, ຫວ້ຍຫວ້າ ແລະບ້ານນາຮ່ອງໃຫຍ່, ຜ່ານການເກັບຕົວຢ່າງໄປວິໄຈໃນວັນທີ 17 ມິຖຸນາຜ່ານມານີ້ພົບວ່າໝູຕິດເຊື້ອພະຍາດອະຫິວາອາຟຣິກກາ, ຕໍ່ກັບເຫດການດັ່ງກ່າວ, ອຳນາດການປົກຄອງແຂວງໄດ້ແຕ່ງຕັ້ງຄະນະຊີ້ນຳຕ້ານ ແລະສະກັດກັ້ນຂັ້ນແຂວງ, ເມືອງ, ຂະແໜງທີ່ກ່ຽວຂ້ອງໂດຍສະເພາະພະແນກກະສິກຳ ແລະ ປ່າໄມ້ແຂວງລົງສົມທົບ, ຕິດຕາມ, ເຝົ້າລະວັງ ແລະ ສະກັດກັ້ນການແຜ່ລະບາດພະຍາດ, ພ້ອມທັງຕອບໂຕ້ຢ່າງຮີບດ່ວນເພື່ອບໍ່ໃຫ້ພະຍາດແຜ່ລາມໄປຢ່າງກວ້າງຂວາງ, ໄວວາຈາກບ້ານຕໍ່ບ້ານ, ພ້ອມທັງໄດ້ຕັ້ງດ່ານສະກັດກັ້ນ, ກວດກາປ້ອງກັນບໍ່ໃຫ້ມີການລັກລອບຊື້-ຂາຍໝູ ດ້ວຍຮູບແບບຕ່າງເຊັ່ນ: ການແຍກສິ້ນສ່ວນ, ແປຮູບເປັນອາຫານ ແລະອື່ນໆ ຢູ່ 6 ຈຸດ, ໃນນັ້ນມີຈຸດຜົ່ນຢາຂ້າເຊື້ອ 2 ຈຸດ.

 ທ່ານ ອານຸສັກ ຈຳປາຄຳ ຫົວໜ້າພະແນກກະສິກຳ ແລະ ປ່າໄມ້ແຂວງສາລະວັນ ໄດ້ເປີດເຜີຍວ່າ: ພາຍຫຼັງໄດ້ມີແຈ້ງການພົບເຊື້ອພະຍາດອະຫິວາໝູອາຟຣິກກາຢູ່ເມືອງຕຸ້ມລານກໍ່ໄດ້ເຄື່ອນໄຫວຕິດຕາມສະພາບການດັ່ງກ່າວ ແລະໄດ້ອອກແຈ້ງການເຖິງອຳນາດການປົກຄອງບ້ານ, ຕະຫຼອດຮອດພໍ່ແມ່ປະຊາຊົນຜູ້ທີ່ເປັນເຈົ້າຂອງ ໝູເຝົ້າລະວັງຕິດຕາມຢ່າງໃກ້ຊິດ ແລະ ບໍ່ໃຫ້ມີການເຄື່ອນຍ້າຍ, ລັກຊື້ຂາຍ, ບໍລິໂພກຢ່າງເດັດຂາດ ແລະຖ້າພົບໝູທີ່ຕາຍຕ້ອງທຳລາຍຖິ້ມດ້ວຍການຈູດ ຫຼື ຝັງດິນຕາມຫຼັກວິຊາການ, ພ້ອມດຽວກັນນັ້ນຕ້ອງເກັບກຳຂໍ້ມູນຢ່າງລະອຽດ ແລະ ລາຍງານສະພາບການຢ່າງຕໍ່ເນື່ອງ, ຈາກການປະເມີນແລະກວດກາພົບວ່າ: ການແຜ່ລະບາດຂອງພະຍາດດັ່ງກ່າວຍັງຢູ່ໃນຂອບເຂດ 7 ບ້ານ, ແຕ່ພົບຈຳນວນໝູທີ່ຕາຍເພີ່ມຂຶ້ນລວມທັງໝົດ 1.183 ໂຕ ຊຶ່ງໄດ້ທຳລາຍຖິ້ມແລ້ວ 100% ດ້ວຍການຈູດ ແລະຝັງດິນ, ສຳລັບໝູທີ່ຍັງບໍ່ທັນຕາຍຈຳນວນ 1.132 ໂຕໃນ 7 ບ້ານ ແມ່ນຈະໄດ້ຮີບໂຮມສືບຕໍ່ທຳລາຍຖິ້ມໂດຍໄວ, ພ້ອມດຽວກັນນັ້ນກໍ່ໄດ້ນຳໃຊ້ຢາທີ່ສະກັດຈາກສະໝູນໄພຂອງທ່ານ ດຣ. ສາຍຝົນ ພູນສະຫວັນ ເຂົ້າໃສ່ໃນການປິ່ນປົວ, ຊີດໃສ່ໜ້າໝູທີ່ຕິດເຊື້ອ. ຜ່ານການຕິດຕາມໄລຍະ 2 ວັນ ເຫັນວ່າ: ຈຳນວນການຕາຍຂອງໝູຫຼຸດລົງ ແລະມີອາການດີຂຶ້ນເລື້ອຍໆ.

  ພ້ອມນັ້ນ, ໄດ້ເຜີຍແຜ່ຜົນຮ້າຍຂອງພະຍາດດັ່ງກ່າວໃຫ້ພໍ່ແມ່ປະຊາຊົນຮັບຮູ້, ເຂົ້າໃຈຕໍ່ກັບສະພາບການ ແລະປຸກລະດົມປະຊາຊົນເຂົ້າຮ່ວມເປັນເຈົ້າການໃນການສະກັດກັ້ນພະຍາດອະຫິວາໝູອາຟຣິກກາຢ່າງແຂງແຮງ, ແນະນຳປະຊາຊົນເຝົ້າຕິດຕາມອາການຂອງໝູພ້ອມທັງໃຫ້ຂັງໄວ້ໃນຄອກ ຫຼື ຜູກໄວ້ເນື່ອງຈາກການລ້ຽງໝູແມ່ນລ້ຽງແບບຄອບຄົວ ແລະຢູ່ກະແຈກກະຈາຍກັນ, ຄຽງຄູ່ກັນນັ້ນໄດ້ສຶກອົບຮົມປະຊາຊົນ,ປຸກລະດົມເຂົ້າຮ່ວມຂະບວນການຕ້ານແລະສະກັດກັ້ນພະຍາດອະຫິວາໝູອາຟຣິກກາດ້ວຍຄວາມຮັບຜິດຊອບ ແລະຖ້າພົບເຫັນໝູມີອາຫານເຫງົາແມ່ນໄດ້ຮີບໂຮມທຳລາຍຖິ້ມໂດຍໄວ ແລະແນະນຳປະຊາຊົນບໍ່ໃຫ້ຕົກໃຈຕໍ່ກັບການລະບາດຂອງພະຍາດເພາະບໍ່ສາມາດຕິດໃສ່ຄົນ ຫຼື ສັດປະເພດອື່ນໆໄດ້.

ຂຽນໂດຍ: ວິໄລວອນ ສິດທິໄຊ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์