ວັດສີບຸນເຮືອງ ເມືອງນາກາຍ ເປີດໂຄງການ ບັນພະຊາສຳມະເນນ

ວັດສີບຸນເຮືອງ ເມືອງນາ ກາຍ ແຂວງຄໍາມ່ວນ ໄດ້ເປີດໂຄງ ການບັນພະຊາສຳມະເນນ ໃນລະຫວ່າງແຕ່ວັນທີ 24 ມິຖຸນາ ຫາວັນທີ 30 ມິຖຸນາ 2019, ເປັນກຽດເຂົ້າຮ່ວມ ໂດຍພະອາຈານ ແສງສະຫວ່າງກຳມະການເຜີຍແຜ່ ສິນນະທຳແຂວງຄຳມ່ວນ ພ້ອມ ດ້ວຍຄະນະອົງການພຸດທະສາສະໜາສຳພັນລາວ (ອພສ) ແຂວງ ຄໍາມ່ວນ, ຄະນະ ອພສ ເມືອງ,ປະທານ ອພສ ເຂດ, ເຈົ້າອະທິການວັດ, ມີທ່ານ ບຸນມີ ທານຸວົງຮອງເຈົ້າເມືອງໆນາກາຍ,ພ້ອມ ດ້ວຍບັນດາຫ້ອງການອ້ອມຂ້າງ ເມືອງ, ຄະນະພັກຮາກຖານບ້ານ, ພໍ່ແມ່ປະຊາຊົນ ແລະນ້ອງນັກຮຽນທີ່ຈະບັນພະຊາເປັນສາມະເນນເຂົ້າຮ່ວມໃນຄັ້ງນີ້.

ພະອາຈານ ສົມເດັດ ຊູນັນຕະ ສິດທິເດດເຈົ້າອະທິການວັດສີບຸນ ເຮືອງຄະນະ ອພສ ເມືອງນາກາຍໄດ້ຜ່ານແຜນດຳເນີນງານໂຄງການ ບວດເນນ, ຜ່ານບົດລາຍງານການ ກະກຽມຄວາມພ້ອມຂອງໂຄງການບັນພະຊາສຳມະເນນ,ການຈັດໂຄງການບັນພະຊາສຳມະເນນແມ່ນເພື່ອເປັນການຊຸກຍູ້ສົ່ງເສີມໃຫ້ນັກຮຽນ,ສໍາມະເນນ ແລະເຍົາວະຊົນຊາວໜຸ່ມໃຫ້ເຂົ້າໃຈເຖິງຄວາມສຳຄັນຂອງທຳມະວ່າເປັນສິ່ງຈຳເປັນ ຕໍ່ການດຳລົງຊີວິດ,ປະຕິບັດຖືກ ຕ້ອງຕາມທຳມະໄດ້ຮັບຮູ້ກ່ຽວ ກັບສາສະໜາ,ຮູ້ບາບບຸນຄຸນໂທດ,ຮູ້ບຸນຄຸນຂອງພໍ່ແມ່ຄູບາອາຈານຕະຫຼອດຮອດຮີດຄອງປະເພນີ ແລະ ວັດທະນະທຳຂອງຊາດລາວ,ຫຼີກລ້ຽງການກະທຳອະບາຍຍະມຸກທັງ ປວງກໍ່ຄືບັນຫາສິ່ງຫຍໍ້ທໍ້ຕ່າງໆໃນສັງຄົມພ້ອມກັນສ້າງແຕ່ສິ່ງທີ່ມີຜົນປະໂຫຍດເຮັດໃຫ້ເກີດຄວາມສຸກໃຫ້ແກ່ຕົນເອງ, ຄອບຄົວ ແລະສັງຄົມໃນພິທີຄັ້ງນີ້ມີລູກຫຼານເຂົ້າມາບວດເນນທັງໝົດ 59 ອົງ ພ້ອມນັ້ນ ໄດ້ມີການກະກຽມດ້ານພິທີກຳ,ພິທີການຕ່າງໆ ໄດ້ກຳນົດກິດຈະກຳການຮຽນ-ການສອນຄື: ການຂຶ້ນ ຫ້ອງບັນລະຍາຍເປັນຕົ້ນຕໍ ແລະເອົາການສ້າງກິດຈະກຳເປັນສຳຮອງ ໂດຍວິຊາທີ່ນຳເຂົ້າມາສິດສອນຄື:ສາສະນະພິທີ,ພຸດທະປະ ຫວັດ, ປັນຈະສິນ-ປັນຈະທຳ,ວາທະສາດ ,ທຳມະປະຍຸກ, ວິຊາປະຕິບັດວິປັດສະນາກຳມະຖານ, ການບັນ ຍາຍພິເສດຜົນຮ້າຍຂອງຢາເສບ ຕິດ, ການນັບຖືສາສະໜາ ແລະຊົນເຜົ່າຕ່າງໆຢູ່ ສປປ ລາວ,ຝຶກສະໝອງລອງປັນຍາ, ໂຕ້ວາທີເລື່ອງ ຊັບກັບປັນຍາອັນໃດດີກວ່າກັນ, ສົນທະນາບັນຫາພຸດທະທຳ,ກັ່ນ ສະໝອງລອງປັນຍາກັບສາລະພັນແລະໂຕ້ວາທີບ້ານນອກກັບໃນເມືອງ ອັນໃດດີກວ່າກັນ ໃນໄລຍະ 7 ວັນ ໃນຕອນເຊົ້າຈະໄດ້ຈັດການເຄື່ອນ ໄຫວດຳເນີນການບິນທະບາດຕາມ ເສັ້ນທາງຕາມເທສະບານເມືອງ,ບ້ານ,ໄປຕ່າງເມືອງຄືເມືອງຍົມມະລາດ ແລະໃນມື້ສຸດທ້າຍມື້ປິດ-ສະຫຼຸບພິທີແມ່ນຈະໄດ້ມີການໃສ່ບາດ ເປັນຂະບວນໃຫຍ່ຢູ່ທີ່ວັດສີບຸນ ເຮືອງ ບ້ານອຸດົມສຸກ.

ທັງນີ້ກໍ່ເພື່ອເຮັດໃຫ້ບັນດາສຳມະເນນກໍ່ຄືເຍົາວະຊົນ-ຊາວໜຸ່ມທີ່ເຂົ້າມາບວດໄດ້ຮູ້ກ່ຽວກັບປະຫວັດຄວາມເປັນມາ,ຫຼັກທຳຄຳສອນ ຂອງພຣະພຸດທະເຈົ້າ,ເຂົ້າໃຈ ແລະເຫັນໄດ້ຄຳວ່າສາສະນະພິທີ,ສາ ມາດປະກອບພິທີກຳຕ່າງໆທາງດ້ານສາສະໜາເປັນການປູກຈິດສຳນຶກສັດທາຂອງອົງການພະພຸດທະສາສະໜາສຳພັນລາວຊາບຊຶ້ງໃນຄຸນຂອງເພິ່ນ, ຮູ້ຈັກອະຣິຍະບົດຂອງພະພຸດທະເຈົ້າ ແລະເຫັນເຖິງ ຄວາມອັດສະລິຍະຂອງພຣະອົງ ເພື່ອສອດຫ້ອຍເຂົ້າໃນການດຳລົງ ຊີວິດປະຈຳວັນຂອງຄົນເຮົາ.

ພາບ ແລະຂາ່ວຈາກ: ໜັງສືພິມເສດຖະກິດ-ສັງຄົມ

แชร์