ລ້ຽງສັດ ແລະປູກເຂົ້າ ເຮັດໃຫ້ຄອບຄົວມີການພັດທະນາ

    ໂດຍປະຕິບັດຕາມແນວທາງນະໂຍບາຍຂອງພັກໃນການແກ້ໄຂຊີວິດການເປັນຢູ່ໃຫ້ຫຼຸດພົ້ນຈາກຄວາມທຸກຍາກຄອບຄົວຂອງ ທ່ານ ລື ອິນທິລາດ ກໍ່ເປັນອີກຄອບຄົວໜຶ່ງທີ່ມີຄວາມດຸໝັ່ນຫ້າວຫັນໃນການພັດທະນາ ແລະສ້າງເສດຖະກິດຄອບຄົວໂດຍໄດ້ຢຶດຖືເອົາການລ້ຽງ ສັດ ແລະປູກເຂົ້າເປັນອາຊີບຕົ້ນຕໍເພື່ອສ້າງລາຍຮັບໃຫ້ແກ່ຄອບຄົວເຮັດໃຫ້ຄອບຄົວໄດ້ຮັບການພັດທະນາດີຂຶ້ນ ແລະ ຫຼຸດພົ້ນຈາກຄວາມທຸກຍາກຈົນກາຍເປັນຄອບຄົວຕົວແບບດ້ານການຜະລິດດ້ານກະສິກຳ.

   ທ່ານ ລື ອິນທິລາດ ອາຍຸ 50 ປີ, ອາຊີບເຮັດນາຢູ່ບ້ານນາຖ້ຳໝູ ເມືອງທ່າປາງທອງ ແຂວງສະຫວັນນະເຂດ ໃຫ້ສໍາພາດວ່າ: ເມື່ອ ກ່ອນຄອບຄົວຕົນແມ່ນໄດ້ເຮັດນາ ແລະລ້ຽງສັດພໍແຕ່ກຸ້ມຢູ່ກຸ້ມກິນໂດຍອາໄສທຳມະຊາດເປັນສ່ວນໃຫຍ່ ແລະໄດ້ຂາຍພຽງເລັກໜ້ອຍຊຶ່ງຄອບ ຄົວມີສະມາຊິກທັງໝົດ 10 ຄົນ ໃນນີ້ມີແຮງງານຕົ້ນຕໍ 7 ຄົນ ຊຶ່ງໃນເບື້ອງຕົ້ນມີສັດລ້ຽງປະເພດງົວ 40 ໂຕ ທີ່ໄດ້ຈາກການສືບທອດມາ ຈາກຄອບຄົວພໍ່ ແລະ ແມ່ຕໍ່ກັນມາພ້ອມນັ້ນກໍ່ໄດ້ລົງທຶນເພີ່ມອີກຈຳນວນ 2,5 ລ້ານກີບ ໂດຍໄດ້ຊື້ແບ້ມາລ້ຽງເສີມຈຳນວນ 5 ໂຕ ພ້ອມທັງມີເນື້ອທີ່ນາຈຳນວນ 2,5 ເຮັກຕາ ໂດຍອີງໃສ່ທ່າແຮງທີ່ຕົນມີເພື່ອເປັນການຜະລິດໃຫ້ເປັນສິນຄ້າສົ່ງຈໍາໜ່າຍຕະຫຼາດສ້າງລາຍຮັບໃຫ້ຕົນເອງກໍ່ຄືຄອບຄົວໄດ້ຮັບການພັດທະນາທີ່ດີຂຶ້ນ; ປີ 2017 ເປັນຕົ້ນມາໄດ້ເລີ່ມລົງມືລ້ຽງສັດ ແລະປູກເຂົ້າຢ່າງເອົາຈິງເອົາຈັງມາຮອດປະຈຸບັນມີສັດລ້ຽງປະເພດງົວທັງໝົດ 75 ໂຕ ແລະຂາຍງົວປີລະ 10-12 ໂຕ ສາມາດສ້າງລາຍຮັບເຖິງ 28 ລ້ານ-32 ລ້ານກີບຕໍ່ປີ; ສຳລັບແບ້ມີທັງໝົດ 25 ໂຕ, ຂາຍປີລະ 6-8 ໂຕ ສ້າງລາຍຮັບເຂົ້າຄອບຄົວປີລະ 3-5 ລ້ານກີບຕໍ່ປີພ້ອມນັ້ນຍັງມີການປູກເຂົ້ານາປີໃນເນື້ອທີ່ນາທຳການຜະລິດກະສິກຳທັງໝົດ 4 ເຮັກຕາສາມາດຜະລິດເຂົ້ານາປີໄດ້ປີລະ 12 ໂຕນຕໍ່ປີ, ແບ່ງເຂົ້າຂາຍໄດ້ເຖິງປີລະ 5 ລ້ານກວ່າກີບຕໍ່ປີ, ນອກນີ້ຍັງມີໜອງປາຈຳນວນສອງໜອງນຳອີກ.

  ທ່ານ ລື ອິນທິລາດ ເວົ້າຕື່ມອີກວ່າ: ປະຈຸບັນການລ້ຽງສັດຂອງຕົນແມ່ນພົບຄວາມຫຍຸ້ງຍາກໂດຍສະເພາະແມ່ນຫຍ້າທີ່ລ້ຽງງົວໃນລະດູແລ້ງແມ່ນບໍ່ພຽງພໍໂດຍກຳລັງສະເໜີໃຫ້ພາກສ່ວນກ່ຽວຂ້ອງສະໜອງທຶນໃນການປູກຫຍ້າ, ແຕ່ເຖິງຢ່າງໃດກໍ່ຕາມຜ່ານການເຮັດການຜະລິດການປູກຝັງ ແລະລ້ຽງສັດເປັນສິນຄ້າເຮັດໃຫ້ຄອບຄົວມີຊີວິດການເປັນຢູ່ທີ່ດີຂຶ້ນສາມາດຫຼຸກພົ້ນອອກຈາກຄວາມທຸກຍາກໄດ້ ແລະມີພາຫະນະຮັບໃຊ້ຄອບຄົວສາມາດສົ່ງລູກ, ຫຼານເຂົ້າໂຮງຮຽນໃນລະດັບຕ່າງໆ, ນອກນີ້ຍັງມີເງິນແຮໄວ້ໃນຄອບຄົວເພື່ອນຳໃຊ້ຈ່າຍໃນເວລາເຈັບເປັນ ແລະດຳລົງຊີວິດປະຈຳວັນເຮັດໃຫ້ຊີວິດໃນຄອບຄົວມີຄວາມຜາສຸກ ແລະມີຄວາມອຸດົມສົມບູນດີຂຶ້ນເປັນກ້າວໆມາ.

แชร์