ລາຄາໃໝ່ຄ່າໄຟຟ້າທຸກຂົງເຂດຈະປະກາດໃຊ້ໄວໆນີ້

   ເພື່ອເປັນການອຳນວຍຄວາມສະດວກ ແລະແທດເໝາະກັບຜູ້ຊົມໃຊ້ກະຊວງພະລັງງານ ແລະບໍ່ແຮ່ໄດ້ມີການປັບປຸງລາຄາຄ່າຊົມໃຊ້ໄຟຟ້າຄືນໃໝ່ນັບແຕ່ປີ 2019-2025 ແລະຈະເພີ່ມຂຶ້ນປີລະ 1% ໃນທຸກຂົງເຂດ, ທັງນີ້ແມ່ນເພື່ອແນ່ໃສ່ປະຕິບັດຕາມກົດໝາຍສະບັບປັບປຸງກ່ຽວກັບໄຟຟ້າໂດຍໃຫ້ຮັບປະກັນສອດຄ່ອງກັບ ສະພາບເສດຖະກິດສັງຄົມຂອງຊາດ ແລະແທດເໝາະກັບເປົ້າໝາຍການຊົມໃຊ້ ແລະປະເພດຜູ້ຊົມໃຊ້, ລາຄາໄຟຟ້າຕ້ອງມີສະຖຽນລະພາບທັງຮັບປະກັນຜົນຕອບແທນຂອງຜູ້ລົງທຶນ.

  ທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະບໍ່ແຮ່ ໃຫ້ສຳພາດໃນໂອກາດເຂົ້າຮ່ວມກອງປະຊຸມລັດຖະບານເປີດກວ້າງຄັ້ງທີ 1 ປີ 2019 ໃນວັນທີ 27 ມິຖຸນາວ່າ: ການປັບປຸງລາຄາໄຟຟ້າຄືນໃໝ່ແມ່ນເພື່ອຮັບປະກັນໃຫ້ລາຄາໄຟຟ້າສອດຄ່ອງກັບສະພາບການພັດທະນາເສດຖະກິດ-ສັງຄົມ ແລະແທດເໝາະກັບເປົ້າ ໝາຍການຊົມໃຊ້ ແລະ ປະເພດຜູ້ຊົມໃຊ້, ທັງຮັບປະກັນລາຄາໄຟຟ້າໃຫ້ມີສະຖຽນລະພາບ ແລະບໍ່ມີຜົນກະທົບຕໍ່ການລົງທຶນຂອງຜູ້ພັດທະນາໄຟຟ້າ, ໂດຍກະຊວງໄດ້ສະເໜີຕໍ່ກອງປະຊຸມລັດຖະບານເພື່ອພິຈາລະນາກ່ຽວກັບການປັບປຸງລາຄາໄຟຟ້າຄືນໃໝ່ສຳລັບປີ 2019-2025 ຈາກ 2 ຮູບແບບຄື: ຮູບແບບເດີມທີ່ມີ 6 ລາຄາ ແລະຮູບແບບທີ່ມີລາຄາດຽວ, ຊຶ່ງບັນດາຜູ້ແທນສ່ວນຫຼາຍແມ່ນເຫັນດີໃນຮູບແບບທີ່ມີລາຄາດຽວ, ໃນລາຄາດຽວນັ້ນແມ່ນຈະມີນະໂຍບາຍພິເສດຕໍ່ຜູ້ທີ່ມີລາຍຮັບຕໍ່າຄືຈະຫຼຸດລາຄາລົງ 50% ສຳລັບຜູ້ທີ່ ຊົມໃຊ້ໄຟຟ້າແຕ່ 0-50 ກິໂລວັດໂມງ (ຕາມການສະເໜີຂອງກະຊວງພະລັງງານ ແລະບໍ່ແຮ່), ໃນນັ້ນບັນດາຜູ້ແທນໄດ້ສະເໜີໃຫ້ຄະນະລັດຖະບານພິຈາລະນາຄືນໂດຍໃຫ້ກຳນົດແຕ່ 0-150 ກິໂລ ວັດໂມງເປັນລາຄານະໂຍບາຍ.

  ສ່ວນລາຄາດຽວໃນການຄິດໄລ່ສຳລັບທີ່ຢູ່ອາໄສແມ່ນໄດ້ເລີ່ມຕົ້ນໃນປີ 2019 ລາຄາ 700 ກີບຕໍ່ກິໂລວັດໂມງ, ສ່ວນລາຄາທີ່ບໍ່ແມ່ນທີ່ຢູ່ອາໄສໄດ້ຈັດເປັນ 3 ແຮງດັນ ຄື: ແຮງດັນທີ 1 ແມ່ນ 0,4 ກິໂລ ໂວນ, ແຮງດັນທີ 2 ແມ່ນ 22 ກິໂລໂວນ, ແຮງດັນທີ 3 ແມ່ນ 115 ກິໂລໂວນຕໍ່ການຊົມໃຊ້ເຂົ້າໃນໂຮງງານອຸດສາຫະກຳນັ້ນ ສ່ວນໃຫ່ຍລາຄາແມ່ນຫຼຸດລົງ; ສະເພາະລາຄາກະສິກຳແມ່ນໄດ້ຫຼຸດລົງສໍາລັບພາກສ່ວນທີ່ຊົມໃຊ້ລະບົບໄຟຟ້າແຮງດັນ 0,4 ເຂົ້າໃນການຜະລິດກະສິກຳລາຄາ 526 ກີບຕໍ່ກິໂລວັດໂມງ, ໂຮງງານປຸງແຕ່ງກະສິກຳທີ່ຕິດພັນກັບການຄໍ້າປະກັນສະບຽງອາຫານລາຄາ 600 ກີບຕໍ່ກິ ໂລວັດໂມງ, ໃນຂະດຽວກັນ, ລາຄາສຳລັບທຸລະກິດຂະໜາດກາງ ແລະ ຂະໜາດນ້ອຍແມ່ນຫຼຸດລົງຈາກ 779 ກີບ ເຫຼືອ 761 ກີບຕໍ່ກິໂລວັດໂມງ, ສະເພາະລາຄາໄຟຟ້າແຮງກາງ 22 ກິໂລໂວນ ແມ່ນຈະຫຼຸດລົງຕຶ່ມເປັນ12-15% ເນື່ອງຈາກວ່າບໍ່ໄດ້ລົງທຶນເຂົ້າສູ່ການຂະຫຍາຍໄຟຟ້າຈຶ່ງເຮັດໃຫ້ລາຄາຫຼຸດລົງສະເພາະການຊົມໃຊ້ໄຟຟ້າອຸດສາຫະກຳແມ່ນໄດ້ແບ່ງອອກເປັນ 3 ຂັ້ນ ຄື: ຂັ້ນທີ 1 ໃຊ້ໄຟແຕ່ 1 ແສນກິໂລວັດໂມງລົງມາລາ ຄາ 684 ກີບຕໍ່ກິໂລວັດໂມງ,ແຕ່ 100.0001 ຫາ 5 ແສນກິໂລວັດໂມງລາຄາ 651 ກີບຕໍ່ກິໂລວັດໂມງ ແລະຫຼາຍກວ່າ 5 ແສນກິໂລວັດໂມງລາຄາ 620 ກີບ, ຖ້າສົມທຽບກັບປະຈຸບັນແມ່ນ 714 ກີບ ເຫັນວ່າລາຄາຫຼຸດລົງຫຼາຍສົມຄວນສໍາລັບຜູ້ຊົມໃຊ້ຢູ່ໃນລະບົບ 115 ກິໂລໂວນນັ້ນແມ່ນຈະຫຼຸດລົງ 7%-16%, ຜູ້ທີ່ໃຊ້ໄຟຟ້າຫຼາຍກວ່າ 10 ລ້ານກິໂລວັດໂມງຕໍ່ເດືອນລາຄາ 600 ກີບ ຈາກ 714 ກີບ, ສຳລັບການຂາຍຍົກໃຫ້ນິຄົມອຸດສາຫະກໍາ, ເມືອງສະມາດຊີຕີທີ່ກຳລັງສ້າງຕັ້ງ, ເສັ້ນທາງລົດໄຟ ຫຼືວ່າກໍລະນີອື່ນໆທີ່ເປັນອັນພິເສດຂອງລັດຖະບານລາຄາແມ່ນ 620 ກີບກິໂລວັດໂມງ,ຊຶ່ງລາຄາແຕ່ລະປະເພດແມ່ນຈະເພີ່ມຂຶ້ນປີລະ 1% ຈົນຮອດປີ 2025.

  ການປັບປຸງຄາລາໄຟຟ້າໃນຄັ້ງນີ້ສ່ວນໃຫຍ່ແມ່ນຫຼຸດລົງ, ບໍ່ມີການເພີ່ມຂຶ້ນໃນປະເພດໃດໆເລີຍແຕ່ມີຈຳນວນໜຶ່ງທີ່ຍັງຮັກສາໄວ້ຄືເກົ່າ, ເນື່ອງຈາກວ່າເປັນການດຳເນີນທຸລະກິດທີ່ເຫັນວ່າມີປະສິດທິຜົນຢູ່ ແລະສຳລັບລາຄາປັບປຸງນີ້ຄາດວ່າຈະມີການປະກາດໃຊ້ໃນໄວໆນີ້ຊຶ່ງໄດ້ລໍຖ້າແຈ້ງການຂອງລັດຖະບານອອກມາຈຶ່ງຈະໄດ້ປະກາດໃຊ້.

  ທ່ານ ຄຳມະນີ ອິນທິລາດ ໃຫ້ຮູ້ອີກວ່າ: ມາຮອດປະຈຸບັນການພັດທະນາທາງດ້ານພະລັງງານໄຟຟ້າໄດ້ມີການພັດທະນາ ແລະເຕີບໃຫຍ່ຂະຫຍາຍຕົວໂດຍສະເພາະມາດຽວນີ້ມີເຂື່ອນທີ່ໄດ້ການພັດທະນາແລ້ວ 63 ແຫ່ງ,ກຳລັງການຕິດຕັ້ງ 7.213 ເມກາວັດ,ກຳລັງການຜະລິດເພື່ອສົ່ງອອກພາຍໃນ ແລະຕ່າງປະເທດທັງໝົດ 37 ພັນລ້ານກິໂລວັດໂມງ, ມີລະບົບສາຍສົ່ງ 62 ພັນກິໂລ ໃນທົ່ວປະເທດ, ມີລະບົບສະຖານີແຮງສູງ, ແຮງກາງ ແລະແຮງຕໍ່າທັງໝົດ 72 ແຫ່ງໃນທ່ົວປະເທດກວມເອົາທຸກແຂວງ ແລະທຸກເມືອງໃນ 148 ເມືອງ, 91 ໝູ່ບ້ານມີໄຟຟ້າຊົມໃຊ້ຖາວອນ, ທົ່ວປະເທດມີໄຟຟ້າ ຊົມໃຊ້ 94% ຄອບຄົວ.

ຂຽນໂດຍ: ພິມພອນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์