ເຜີຍແຜ່ເຕັກນິກການຜະລິດກາເຟໃຫ້ປະຊາຊົນ 5 ບ້ານ ເຂດຈຸດສຸມພັດທະນາ

  ໃນລະຫວ່າງວັນທີ 20-26 ມິຖຸນາ 2019 ຫ້ອງກະສິກຳ ແລະ ປ່າໄມ້ເມືອງທ່າແຕງ ໄດ້ສົບທົບກັບບໍລິສັດກັກເກະ (ວິຊາການຫຽວດນາມ) ໄດ້ເຜີຍແຜ່ເຕັກນິກການຜະລິດກາເຟທີ່ມີຄຸນນະພາບ ແລະຍືນຍົງໃຫ້ກັບ 2 ເຂດຈຸດສຸມພັດທະນາຄື: ເຂດຈຸດສຸຸມພັດທະນາທີ 1 ແລະເຂດຈຸດສຸມພັດທະນາທີ 6 ໂດຍສະເພາະ 5 ບ້ານຄື: ບ້ານຫວຍຊາຍ, ທົ່ງຫວາຍ, ດອນຊາ, ໜອງກັນ ແລະຫວຍດຳໂດຍເຂົ້າຮ່ວມຂອງ ທ່ານ ນາງໜູກອນ ໄຊສະຫງ່າ ຫົວໜ້າເຂດຈຸດສຸຸມພັດທະນາທີ 1, ທ່ານ ຫວຽນ ຍືເດື່ອງ ຫົວໜ້າບໍລິສັດກັກເກະຮັບຊື້ກາເຟ, ພ້ອມດ້ວຍພະນັກງານວິຊາການຂະແໜງການປູກຝັງ ແລະ ລ້ຽງສັດເມືອງທ່າແຕງ, ພະນັກງານວິຊາການ (ຫວຽດນາມ), ພ້ອມອົງການຈັດຕັ້ງບ້ານ ແລະພໍ່ແມ່ປະຊາຊົນພາຍໃນບ້ານເຂົ້າຮ່ວມ.

   ທ່ານ ຮຳດຶກຕຽບ ວິຊາການ ຫວຽດນາມໄດ້ໃຫ້ຮູ້ກ່ຽວກັບຫຼັກການ, ວິທີການກະກຽມການປູກ ແລະການບົວລະບັດຮັກສາເພື່ອໃຫ້ຕົ້ນກາເຟມີຄວາມແຂງ ແຮງ, ຈະເລີນເຕີບໂຕມີຄຸນນະພາບສາມາດຕ້ານທານກັບພະຍາດທີ່ມັກເກີດຂຶ້ນກັບຕົ້ນໃນນັ້ນໄດ້ແນະນໍາໂດຍເລີ່ມຈາກການກະກຽມເມັດພັນຈົນເຖິງວິທີ ການປູກ ແລະ ບົວລະບັກຮັກສາ. ຊຶ່ງກ່ອນອື່ນກໍຕ້ອງເລືອກໝາກທີ່ສົມບູນ ແລະ ສຸກດີ, ນຳມາບີບເປືອກແດງອອກ ແລະ ໝັກໄວ້ 1 ຄືນ. ຈາກນັ້ນນໍາເອົາດິນທີ່ໝຸ່ນລະອຽດດີ ແລ້ວປະສົມກັບດິນຊາຍໃນ 50% ຂອງດິນຊາຍ, ເມື່ອອາຍຸໄດ້ປະມານ 30-50 ວັນ ໃຫ້ນຳເອົາເບ້ຍໃສ່ເບົ້າທີ່ກຽມໄວ້. ໂດຍເລືອກເອົາເບ້ຍທີ່ຮາກແກ້ວຊື່, ແລ້ວປະສົມຝຸ່ນແກບເຜົາ 3 ສ່ວນ, ດິນ 2 ສ່ວນ ແລະ ຝຸ່ນຄອກ 1 ສ່ວນ. ສ່ວນໄລຍະຫ່າງຂອງການປູກແມ່ນ: 2x1 ແມັດ ແລະ 2x1,5 ແມັດ, ເມື່ອກາເຟໄດ້ອາຍຸ 2-5 ປີແມ່ນໄດ້ໃສ່ຝຸ່ນຄອກ ຫຼື ຝຸ່ນຊີວະພາບໃນອັດຕາ 1 ກິໂລຕໍ່ຕົ້ນ. ຊຶ່ງເລີ່ມໃສ່ໃນເດືອນເມສາ (ເພາະເປັນໄລຍະຝົນເລີ່ມຕົກ). ພ້ອມນັ້ນຕ້ອງໄດ້ບົວລະບັດຮັກສາດ້ວຍການຕັດກິ່ງເພື່ອໃຫ້ໄດ້ແໜງດຽວ.

 ຈາກນັ້ນກໍເຜີຍແຜ່ໃຫ້ຮູ້ກ່ຽວກັບພະຍາດທີ່ມັກເກີດກັບເບ້ຍທີ່ຍັງອ່ອນເພື່ອຫາວິທີປ້ອງກັນຫຼີກລ້ຽງດ້ວຍການບໍ່ເອົາເບ້ຍເກົ່າ ແລະໃຊ້ຢາສະໝຸນໄພ 5 ບ່ວງແກງປະສົມກັບນ້ຳ 10 ລິດ ຊີດປ້ອງກັນ ເພື່ອຂັບໄລ່ສັດຕູພືດທີ່ມາລົບກວນຄວນຊີດໃນໄລຍະ 3 ວັນຕໍ່ຄັ້ງ. ທັງນີ້ີກໍເພື່ອໃຫ້ປະຊາຊົນກໍຄືຊາວກະສິກອນຜູ້ຜະລິດຮັບຮູ້ເຖິງເຕັກນິກການຜະລິດກາເຟທີ່ມີຄຸນນະພາບ ແລະຍືນຍົງ ເຮັດໃຫ້ການຜະລິດມີຄວາມປອດໄພຕໍ່ສຸຂະພາບທັງໄດ້ຮັບດອກອອກຜົນ.

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์