ລ້ຽງສັດ ແລະປູກເຂົ້າສ້າງລາຍໄດ້ໃຫ້ຄອບຄົວຊີວິດການເປັນຢູ່ດີຂຶ້ນ

  ໂດຍປະຕິບັດແນວທາງນະໂຍບາຍຂອງພັກໃນການແກ້ໄຂຊີວິດການເປັນຢູ່ໃຫ້ຫຼຸດພົ້ນຈາກຄວາມທຸກຍາກ ແລະຫຼຸດພົ້ນອອກຈາກຄວາມດ້ອຍພັດທະນາເທື່ອລະກ້າວຄອບຄົວຂອງ ທ່ານ ລືອິນ ທິລາດ ເປັນຄອບຄົວໜຶ່ງທີ່ມີຄວາມດຸໜັ່ນຫ້າວຫັນໃນການພັດທະນາ ແລະ ສ້າງເສດຖະກິດຄອບຄົວໂດຍໄດ້ຢຶດຖືເອົາການລ້ຽງສັດ ແລະປູກເຂົ້າເປັນອາຊີບຕົ້ນຕໍເພື່ອສ້າງລາຍຮັບໃຫ້ແກ່ຄອບຄົວເຮັດໃຫ້ຄອບຄົວໄດ້ຮັບການພັດທະນາດີຂຶ້ນ ແລະຫຼຸດພົ້ນຈາກຄວາມທຸກຍາກຈົນກາຍເປັນຄອບຄົວຕົວແບບການຜະລິດດ້ານກະສິກຳ.

   ທ່ານ ລື ອິນທິລາດ ອາຍຸ 50 ປີ ອາຊີບເຮັດນາ ຢູ່ບ້ານນາຖ້ຳໝູ ເມືອງທ່າປາງທອງ ແຂວງສະຫວັນນະເຂດໃຫ້ຮູ້ວ່າ: ເມື່ອກ່ອນຄອບຄົວຕົນແມ່ນໄດ້ເຮັດນາ ແລະ ລ້ຽງສັດພໍແຕ່ກຸ້ມຢູ່ກຸ້ມກິນໂດຍອາໄສທຳມະຊາດເປັນສ່ວນໃຫຍ່ ແລະ ໄດ້ຂາຍພຽງເລັກໜ້ອຍຊຶ່ງຄອບຄົວມີສະມາຊິກທັງໝົດ 10 ຄົນ ໃນນີ້ມີແຮງງານຕົ້ນຕໍ 7 ຄົນ ໃນເບື້ອງຕົ້ນມີສັດລ້ຽງປະເພດງົວ 40 ໂຕ ທີ່ໄດ້ຈາກການສຶບທອດມາຈາກຄອບຄົວພໍ່ ແລະ ແມ່ຕໍ່ກັນມາພ້ອມນັ້ນໄດ້ລົງທຶນເພີ່ມອີກຈຳນວນ 2,5 ລ້ານກີບ ໂດຍໄດ້ຊື້ແບ້ມາລ້ຽງເສີມຈໍານວນ 5 ໂຕ ພ້ອມທັງມີເນື້ອທີ່ນາ 2,5 ເຮັກຕາ ໂດຍອີງໃສ່ທ່າແຮງທີ່ຕົນມີເພື່ອເປັນການຜະລິດໃຫ້ເປັນສິນຄ້າສົ່ງຈໍາໜ່າຍຕະຫຼາດສ້າງລາຍຮັບໃຫ້ຕົນເອງກໍ່ຄືຄອບຄົວໄດ້ຮັບການພັດທະນາທີ່ດີຂຶ້ນປີ 2017 ເປັນຕົ້ນມາໄດ້ເລີ່ມລົງມືລ້ຽງສັດ ແລະ ປູກເຂົ້າຢ່າງເອົາຈິງເອົາຈັງມາຮອດປະຈຸບັນມີສັດລ້ຽງປະເພດງົວທັງໝົດ 75 ໂຕ ສາມາດຂາຍງົວໄດ້ປີລະ 10-12 ໂຕ ທີ່ສາມາດສ້າງລາຍຮັບເຖິງ 28 ລ້ານ ຫາ 32 ລ້ານກີບຕໍ່ປີ, ສຳລັບແບ້ມີທັງໝົດ 25 ໂຕ ຂາຍປີລະ 6-8 ໂຕ ສ້າງລາຍຮັບເຂົ້າຄອບຄົວປີລະ 3 ລ້ານ ຫາ 5 ລ້ານກີບຕໍ່ປີພ້ອມນັ້ນຍັງມີການປູກເຂົ້ານາປີໃນເນື້ອທີ່ນາທຳການຜະລິດກະສິກຳທັງໝົດ 4 ເຮັກຕາ ສາມາດຜະລິດເຂົ້ານາປີໄດ້ປີລະ 12 ໂຕນຕໍ່ປີ ແບ່ງເຂົ້າຂາຍໄດ້ເຖິງປີລະ 5 ລ້ານກວ່າກີບຕໍ່ປີສໍາລັບການຈໍາໜ່າຍແມ່ນມີແມ່ຄ້າມາຮັບຊື້ກັບທີ່.

ທ່ານ ລື ອິນທິລາດ ເວົ້າຕື່ມອີກວ່າ: ປະຈຸບັນການລ້ຽງສັດຂອງຕົນແມ່ນພົບຄວາມຫຍຸ້ງຍາກໂດຍສະເພາະແມ່ນຫຍ້າທີ່ລ້ຽງງົວໃນລະດູແລ້ງແມ່ນບໍ່ພຽງພໍສະເໜີໃຫ້ພາກສ່ວນກ່ຽວຂ້ອງສະໜອງທຶນປູກຫຍ້າແຕ່ເຖິງຢ່າງໃດກໍ່ຕາມຜ່ານການເຮັດການຜະລິດການປູກຝັງ ແລະລ້ຽງສັດເປັນສິນຄ້າເຮັດໃຫ້ຄອບ ຄົວມີຊີວິດການເປັນຢູ່ທີ່ດີຂຶ້ນສາມາດຫຼຸກພົ້ນອອກຈາກຄວາມທຸກຍາກໄດ້ ແລະ ມີພາຫະນະຮັບໃຊ້ຄອບຄົວເຊັ່ນ: ລົດໄຖນາ 1 ຄັນ, ລົດຈັກ 3 ຄັນ, ສາ ມາດສົ່ງລູກ, ຫຼານເຂົ້າໂຮງຮຽນໃນລະດັບຕ່າງໆ, ມີໜອງລ້ຽງປາ 2 ໜອງ ນອກນີ້ຍັງມີເງິນແຮໄວ້ໃນຄອບຄົວເພື່ອນຳໃຊ້ຈ່າຍໃນເວລາເຈັບເປັນ ແລະດຳ ລົງຊີວິດປະຈຳວັນເຮັດໃຫ້ຊີວິດໃນຄອບຄົວມີຄວາມຜາສຸກ ແລະມີຄວາມອຸດົມສົມບູນດີຂຶ້ນເປັນກ້າວໆມາ.

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์