ອຸດົມໄຊ ເຜີຍແຜ່ບາງນິຕິກຳກ່ຽວກັບການລົງທຶນ

  ການເຜີຍແຜ່ບາງນິຕິກໍາທີ່ກ່ຽວຂ້ອງກັບການລົງທຶນທັງພາກລັດ ແລະເອກະຊົນຂອງແຂວງອຸດົມໄຊ ໄດ້ຈັດຂຶ້ນໃນລະຫວ່າງວັນທີ 20 ຫາ 21 ເດືອນມິຖຸນາ 2019 ໂດຍການເປັນປະທານຂອງ ທ່ານ ສົມຈິດ ປັນຍາສັກ ຮອງເຈົ້າແຂວງອຸດົມໄຊ, ມີບັນດາການນໍາຂັ້ນແຂວງ, ເມືອງ, ບັນດາພະແນກການຕະຫຼອດຮອດນັກທຸລະກິດພາຍ ໃນແຂວງອຸດົມໄຊ.

  ການເຜີຍແຜ່ໃນຄັ້ງນີ້ກໍເພື່ອຈັດຕັ້ງຜັນຂະຫຍາຍກົດໝາຍ, ລະບຽບການ ແລະເອກະສານທີ່ສຳຄັນຕ່າງໆ ທີ່ກ່ຽວຂ້ອງກັບການລົງທຶນໃຫ້ປະກົດຜົນເປັນຈິງ ແລະເຂົ້າສູ່ລວງເລິກ, ແນ່ໃສ່ເຮັດໃຫ້ບັນດານັກທຸລະກິດທັງພາຍໃນ ແລະຕ່າງປະເທດຮັບຮູ້, ເຂົ້າໃຈແຈ້ງຕໍ່ກັບບັນດາກົດໝາຍ ແລະນິຕິກຳຕ່າງໆ ທັງສາມາດຈັດຕັ້ງປະຕິບັດວຽກງານການລົງທຶນຢູ່ພາຍໃນແຂວງອຸດົມໄຊໃຫ້ໄປຕາມຂະບວນການ, ຮູບການ ແລະຂັ້ນຕອນຢ່າງຖືກຕ້ອງ, ຈະແຈ້ງ, ຊັດເຈນ, ໂປງໃສ ແລະ ມີປະສິດທິພາບ. ສໍາລັບກົດໝາຍ ທີ່ນໍາມາເຜີຍແຜ່ໃນຄັ້ງນີ້ແມ່ນມາຈາກຫຼາຍຂະແໜງການໂດຍສະເພາະແມ່ນກົດໝາຍວ່າດ້ວຍການລົງທຶນຂອງລັດ, ວ່າດ້ວຍການສົ່ງເສີມການລົງທຶນ, ກົດໝາຍວ່າດ້ວຍວິສາຫະກິດ, ວ່າດ້ວຍການປົກປັກຮັກສາສິ່ງແວດລ້ອມ,ກົດໝາຍທີ່ດິນ,ກົດໝາຍພາສີ,ສ່ວຍສາອາກອນ, ຄຸ້ມຄອງເງິນຕາ, ກະສິກຳ, ແຮ່ທາດ, ແຮງງານ, ການເຂົ້າອອກ ແລະ ຄຸ້ມຄອງຄົນຕ່າງປະເທດ ແລະນິຕິກຳອື່ນໆທີ່ກ່ຽວຂ້ອງໃນນັ້ນແຕ່ລະກົດໝາຍທີ່ນຳມາເຜີຍແຜ່ແມ່ນໄດ້ຄັດຈ້ອນເອົາບາງຈຸດບາງມາດຕາທີ່ເຫັນວ່າກ່ຽວຂ້ອງກັບການລົງທຶນເທົ່ານັ້ນ.

  ນອກຈາກການເຜີຍແຜ່ດັ່ງກ່າວແລ້ວຍັງເປັນການພົບປະແລກປ່ຽນຄວາມຄິດເຫັນຮ່ວມກັນລະຫວ່າງອົງການປົກຄອງແຂວງກັບພາກທຸລະກິດເພື່ອແນໃສ່ເຮັດໃຫ້ການລົງທຶນຢູ່ແຂວງອຸດົມໄຊດຳເນີນໄປຕາມແຜນການລວມຂອງແຂວງທີ່ໄດ້ກຳນົດໄວ້ກໍຄືວຽກງານການລົງທຶນມີການຂະຫຍາຍຕົວຢ່າງເປັນລະບົບ ແລະ ຕໍ່ເນື່ອງ, ຕົວເລກເສດຖະກິດນັບມື້ນັບເຕີບໂຕ.

  ຕະຫຼອດໄລຍະຂອງການດໍາເນີນກອງປະຊຸມແຕ່ລະພາກສ່ວນໄດ້ພັດປ່ຽນກັນມີຄໍາເຫັນໃສ່ແຕ່ລະບັນຫາເພື່ອຄວາມເປັນເອກະພາບກັນໃນການຈັດຕັ້ງປະຕິບັດໃນຕໍ່ໜ້າ.

ຂຽນໂດຍ: ຄານມະນີ ຮຽນດໍຈັນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์