ເຊກອງ-ກວາງນາມ ເສີມຂະຫຍາຍການຮ່ວມມື

    ເພື່ອເປັນການເສີມຂະຫຍາຍການພົວພັນຮ່ວມມືພິເສດຮອບດ້ານຂອງສອງແຂວງໃຫ້ນັບມື້ແໜ້ນແຟ້ນຂຶ້ນໃນລະຫວ່າງວັນທີ 24-25 ມິຖຸນາ 2019 ທີ່ຫ້ອງວ່າການແຂວງທ່ານ ສີດາ ສຸວັນນະສາຍ ຮອງເຈົ້າແຂວງໆເຊກອງ ພ້ອມຄະນະໄດ້ເປັນກຽດຕ້ອນຮັບການມາຢ້ຽມຢາມ ແລະເຮັດວຽກຂອງ ທ່ານ ດິງ ວັນ ທູ ປະທານຄະນະກໍາມະການປະຊາຊົນແຂວງກວາງນາມ ສສ ຫວຽດນາມ ພ້ອມດ້ວຍຄະນະ.

  ການພົບປະຄັ້ງນີ້ທັງສອງຝ່າຍໄດ້ຕີລາຄາສູງຕໍ່ສາຍພົວພັນມິດຕະພາບ, ການຮ່ວມມືແບບພິເສດຂອງສອງແຂວງໃນໄລຍະຜ່ານມາທັງສອງຝ່າຍກໍໄດ້ລາຍງານສະພາບພົ້ນເດັ່ນໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມພາຍໃນແຂວງ ແລະ ສະພາບການຈັດຕັ້ງປະຕິບັດເນື້ອໃນບົດບັນທຶກການຮ່ວມມືລະຫວ່າງສອງ ແຂວງເຊກອງ-ກວາງນາມພາຍຫຼັງກອງປະຊຸມປີ 2017 ຫາກອງປະຊຸມປີ 2019. ພ້ອມນັ້ນທັງສອງຝ່າຍກໍ່ໄດ້ສະແດງຄວາມຊົມເຊີຍ ແລະຕີລາຄາສູງຕໍ່ຜົນສໍາເລັດການຮ່ວມມືຂອງສອງແຂວງໃນໄລຍະຜ່ານມາ.

 ຫຼັງຈາກກອງປະຊຸມຄະນະຜູ້ແທນຂັ້ນສູງຂອງສອງແຂວງປະຈໍາ ປີ 2017 ມາຮອດປະຈຸບັນການເຄື່ອນໄຫວຮ່ວມມືແລກປ່ຽນລະຫວ່າງສອງແຂວງເຊກອງ-ແຂວງກວາງນາມສືບຕໍ່ພັດທະນາຢ່າງເຂັ້ມແຂງ ແລະກ້າວເຂົ້າສູ່ລວງເລິກໃນທຸກຂົງເຂດວຽກງານເປັນຕົ້ນວຽກງານປ້ອງກັນຊາດ-ປ້ອງກັນຄວາມສະຫງົບ; ວຽກງານຂົງເຂດເສດຖະ ກິດ; ວຽກງານການກໍ່ສ້າງພື້ນຖານໂຄງລ່າງ; ວຽກງານສຶກສາ, ສາທາລະນະສຸກ ແລະວັດທະນະທໍາ; ວຽກງານດ່ານ ແລະສະພາບການເຄື່ອນໄຫວຂອງບັນດາດ່ານ ແລະການເຄື່ອນໄຫວພົບປະແລກປ່ຽນ, ຮ່ວມມືລະຫວ່າງບັນດາຂະແໜງການ, ທ້ອງຖິ່ນຂອງສອງແຂວງ.

  ຜ່ານການພົບປະທັງສອງຝ່າຍຍັງໄດ້ເຫັນດີເປັນເອກະພາບກັນວ່າຈະສືບຕໍ່ຮັກສາ ແລະເສີມຂະຫຍາຍສາຍພົວພັນຮ່ວມມືສາມັກຄີແບບພິເສດຮອບດ້ານອັນເປັນມູນເຊື້ອທີ່ສອງພັກ, ສອງລັດ ແລະປະຊາຊົນສອງຊາດໄດ້ຈັດຕັ້ງປະຕິບັດ. ພ້ອມນັ້ນສອງຝ່າຍຈະສືບຕໍ່ແລກປ່ຽນລະຫວ່າງຄະນະນໍາ, ວິຊາການບັນດາຂະແໜງການ ແລະ ທ້ອງຖິ່ນຢ່າງເປັນປົກກະຕິ. ນອກນັ້ນແຂວງກວາງນາມຈະສືບຕໍ່ຮັບ ແລະໃຫ້ທຶນການສຶກສາຊ່ວຍເຫຼືອລ້າ 100% ໃນໄລຍະຮຽນພາສາຫວຽດນາມ ແລະຮຽນວິຊາສະເພາະໃຫ້ແກ່ແຂວງເຊກອງ ຈໍານວນ 25 ທຶນຕໍ່ປີໄປສຶກສາຮໍ່າຮຽນທີ່ບັນດາວິທະຍາໄລ, ມະຫາວິທະຍາໄລຢູ່ແຂວງກວາງນາມ ແລະອື່ນໆ.

  ໃນໂອກາດດັ່ງກ່າວຮອງເຈົ້າ ແຂວງໆເຊກອງ ສປປ ລາວ ກໍໄດ້ກ່າວສະແດງຄວາມຂອບໃຈມາຍັງພັກ-ລັດຖະບານເວົ້າລວມ, ເວົ້າສະເພາະຄະນະພັກ-ຄະນະນໍາ ແຂວງກວາງນາມ ສສ ຫວຽດນາມ ທີ່ໃຫ້ການສະໜັບສະໜູນ ແລະຊ່ວຍເຫຼືອບໍ່ວ່າດ້ານທຶນຮອນ, ອຸປະກອນຮັບໃຊ້ຫ້ອງການ ແລະ ຫວັງຢ່າງຍິ່ງວ່າໃນຕໍ່ໜ້າກໍຈະໄດ້ຮັບການສະໜັບສະໜູນຕື່ມອີກ.

ຂຽນໂດຍ: ສັນຍາ 

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์