໌ຼ໌54 ຮ້ານເຂົ້າຮ່ວມງານວາງສະແດງລາວ- ICT

  ກະຊວງໄປສະນີ, ໂທລະຄົມ ແລະ ການສື່ສານຮ່ວມກັບສະມາຄົມການຄ້າໄອຊີທີລາວຈັດວາງສະແດງເຕັກໂນໂລຊີສື່ສານຂໍ້ມູນຂ່າວສານປະຈຳປີ 2019 ພາຍໃຕ້ຫົວຂໍ້ “ສ້າງ ແລະສົ່ງເສີມການຫັນເປັນດີຈິຕອລໃນລາວ” ຊຶ່ງປີນີ້ມີຜູ້ປະກອບການດ້ານໂທລະຄົມມະນາຄົມ-ໄອຊີທີພາຍໃນ ແລະຕ່າງປະເທດມາຮ່ວມວາງສະແດງທັງໝົດມີ 54 ຮ້ານ.

  ພິທີໄດ້ຈັດຂຶ້ນວັນທີ 25 ມິຖຸນາ 2019 ທີ່ໂຮງແຮມດອນຈັນພາເລດ ນະຄອນຫຼວງວຽງຈັນ ໃຫ້ກຽດເຂົ້າຮ່ວມເປີດງານໂດຍຂອງທ່ານ ທອງລຸນ ສີສຸລິດ ນາຍົກລັດ ຖະມົນຕີ ທ່ານ ທັນສະໄໝ ກົມມະສິດ ລັດຖະມົນຕີກະຊວງໄປສະນີ, ໂທລະຄົມ ແລະການສື່ສານ, ມີບັນດາທ່ານລັດຖະມົນຕີກະຊວງກ່ຽວຂ້ອງ, ອົງການ ແລະບໍລິສັດຕ່າງໆເຂົ້າຮ່ວມ.

ທ່ານ ທັນສະໄໝ ກົມມະສິດ ໄດ້ກ່າວວ່າ:  ງານວາງສະແດງໃນປີນີ້ຈະເລີ່ມເປີດແຕ່ວັນທີ 26-30 ມິຖຸນາ, ມີຫ້ອງວາງສະແດງທັງໝົດມີ 54 ຮ້ານຈາກຜູ້ປະກອບການດ້ານໂທລະຄົມມະນາຄົມ-ໄອຊີທີທັງພາຍໃນ ແລະຕ່າງປະເທດທີ່ໄດ້ນຳເອົາຜະລິດຕະພັນອອກໃໝ່ ແລະທັນສະໄໝກ່ຽວກັບລະບົບສື່ສານໂທລະຄົມ,ລະບົບໂປແກຼມຮັບໃຊ້ການຫັນເປັນດີຈິຕອລ, ລະບົບການປ້ອງກັນຄວາມປອດໄພດ້ານໄຊເບີ, ເຄື່ອງອຸປະກອນໄອຊີທີພ້ອມນັ້ນກໍ່ມີຫ້ອງວາງສະແດງຂອງບັນດາກະຊວງ, ອົງການ, ບໍລິ ສັດກ່ຽວກັບຜົນສຳເລັດການນຳໃຊ້ໄອຊີທີເຂົ້າໃນໜ່ວຍງານ, ນອກນີ້ຍັງມີກອງປະຊຸມສຳມະນາລະດັບສາກົນ Lao Digital Transformaion Forum, ກອງປະຊຸມປຶກສາຫາລືການຮ່ວມພັດທະນາໄອຊີທີຂອງບັນດາປະເທດລຸ່ມແມ່ນໍ້າລ້ານຊ້າງ-ແມ່ນໍ້າຂອງ ແລະງານສຳມະນາວິຊາການດ້ານສະເພາະເຊັ່ນ: ການບໍລິຫານລັດດ້ວຍເອເລັກໂຕນິກ, ການນຳໃຊ້ໄອຊີທີເຂົ້າໃນການສຶກສາຂະແໜງການເງິນ, ບັນຫາຄວາມປອດໄພສັງຄົມສື່ອອນລາຍ,ການຄ້າການດຳເນີນທຸລະກິດດ້ານໄອຊີທີ, ເປັນເວທີສ້າງໂອກາດໃຫ້ຜູ້ປະກອບການຜູ້ຄຸ້ມຄອງ, ຜູ້ຜະລິດ, ຜູ້ບໍລິການ ແລະ ຜູ້ຄຸ້ມຄອງ ICT ໄດ້ພົບປະແລກປ່ຽນບົດຮຽນ, ຄວາມຮູ້, ຄວາມເຂົ້າໃຈ ແລະ ສ້າງການພົວພັນຮ່ວມມືທາງດ້ານການຄ້າ ແລະການພັດທະນາຮ່ວມກັນພ້ອມນັ້ນຍັງມີການປະກວດລາງວັນ ໄອຊີທີ 2019 ເພື່ອເປັນຕົວແທນຂອງ ສປປ ລາວ ສົ່ງເຂົ້າແຂ່ງຂັນ ກັບບັນດາປະເທດອາຊຽນເພື່ອຊິງລາງວັນ ASEAN ICT Award 2019.

  ປະຈຸບັນເຕັກໂນໂລຊີການສື່ສານຂໍ້ມູນຂ່າວສານ ICT ແມ່ນບົດບາດສູງເຂົ້າປ່ຽນວີທີທາງດ້ານການເຮັດວຽກຂອງອົງກອນກໍ່ຄືມະນຸດເຮົາເຊັ່ນ: ລະບົບ 5G, ລະບົບຄອມພິວເຕີ ແລະ ນະວັດຕະກຳລະບົບຂໍ້ມູນໃຫຍ່ Big Data ແລະ ການປະດິດ AI ສຳລັບ ສປປ ລາວ ເຖິງແມ່ນວ່າຍັງບໍ່ທັນຂະຫຍາຍຕົວສູງແຕ່ກໍກ້າວເຕີບໃຫຍ່ພໍ ສົມຄວນໂດຍສະເພາະການນຳໃຊ້ໂທລະສັບ ແລະອິນເຕີເນັດທີ່ເປັນຕົວຊີ້ວັດພື້ນຖານຂອງການພັດທະນາ ICT ຊຶ່ງໄດ້ຂະຫຍາຍຕົວໃນປີ 2010 ຈາກ 5% ເພີ່ມຂຶ້ນ 48% ໃນປີ 2018 ແຕ່ລະປີມີຈຳນວນຜູ້ປະກອບການດ້ານໄອຊີທີເພີ່ມຂຶ້ນສະເລ່ຍປີລະ 7% ໂດຍສະເພາະຜູ້ປະກອບການສະຕາດອັບ.

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์